Read Komrem RENGHEI INHNINA 8 Bible Online

RENGHEI INHNINA 8 - Komrem bible

RENGHEI INHNINA 8

¹Elisha’n asapa amanhring peknu Shunema aka-om nuhmeinu hneng RŌNGPU’n kum 7 sâk amantâng sik, khava jâra a-innshung seng hmun khat a ansea anva-omna sik amanthei hei.

²Ama mantheina kha nuhmeinu khan ajuia, a-innshung seng Philisti ram a kum 7 avaka-om sik a kase jo hei.

³Kum 7 sōa, nuhmeinu khan Israel ram a hong inle, a-inn leh aram kha avea achen theina sik a rengpa hneng akader sik a vakase.

⁴Rengpa kha Elisha sōkpa Gehazi leh a’nbek hei kha nuhmeinu khan aleihmu; Rengpa’n Elisha ṭōn inlak-hei chungchânga aleimanhret hnōm.

⁵Gehazi khan heikhonga mo Elisha’n akathi amanhring ti kha rengpa hneng ahri pek pha, nuhmeinu khan reng hneng inphinna ahei phut jo. Gehazi khan ahnenga ati, “Reng Kalûr, hinahin nuhmeinu kha kahong jo khana asapa Elisha tamanhring male kha’m hin ka-om jo!”

⁶Rengpa ṭongderna masônna, amanu khan Gehazi ṭong kha ahri manchên pek jo, khava jâra rengpa’n ṭōnpui karôn inkhat abek a nuhmeinu karōi seng, khana amanu omakna kum 7 shunga ahleipuk a akasōk sâng man kha’m apekna sik a amanthei jo.

⁷Syria rengpa Benhadad adammak lai Elisha kha Damascus a kasea kae. Elisha khana khan ka-om ti ṭong rengpa hneng anhri pek pha

⁸ama’n aṭōnpui karôn inkhat, Hazael hneng, “Sânkathem hneng kutchoi choi pek ina RŌNGPU hneng kei hi alakadam sik eng mo aderna sik a vangek roh,” ati.

⁹Khava jâra Hazael in Damascus ram a akasōk neinâk akaṭha pepen Sharîngsei 40 phur arôna Elisha hneng leikase. Hazael in ama kha ahmu pha ati, “Nasōk Reng Benhadad in anat hi alakadam sik mo, akadam mak sik jo mo tia nahnenga akader sik a ahei tir eng kae.”

¹⁰Khava pha Elisha’n amasôn, “RŌNGPU’n kahnenga amalârpek eng khachu ama kathi sik jo; tâk-kha se ina ama kadam sik tia vahri pek roh.”

¹¹Hivahi ahria Elisha’n Hazael hneng kasang kanga inlaktak a alei ena, Hazael in kahōia leisak tor mak jo. Manhret lo theiloa Elisha ahmit rathli hong kasōk jo.

¹²Hazael in ader, “Oja, heijâra mo akaṭap che?” Elisha’n amasôn, “Nang in Israel mihei chunga ṭit ka-om tak omchen nahei tlo sik hei kha ke’n kamanhret jo. Nang in anmani rephōrhei hmei naro sik, rether hme kaṭhapen hei nathat sik hei, ansa naipanghei nasuk that sik hei, khana sakarôn nuhmeihei anvon na-ât khōipek sik hei.”

¹³Hazael in amasôn, “Heikhong inmo khangtuk hrep ratha kanei sik? Kei chu heite emak eng.” Elisha’n amasôn, “Nang in Syria reng kachang sik che, RŌNGPU’n amalârpek jo eng.”

¹⁴Hazael in Benhadad hneng inle jo, ama’n aheider, “Elisha’n heimo ati?” Hazael in amasôn, “Ama’n nang kadam nger sik che ati.”

¹⁵Tâk-kha ajîng kania Hazael khan jânsi pōn inkhat tuia amanchora rengpa kha amakhu manhip that joa kae. Khana Hazael khan Benhadad athlenga Syria reng inṭang jo.

¹⁶Ahab sapa Joram in Israelhei reng achangna kum 5 atlukna, Jehoshaphat sapa Jehoram in akum 32 a

¹⁷Judah reng leikachang, Jerusalema kum 8 reng kachanga kae.

¹⁸Anuhmei kha Ahab sanu kae, Ahab innshung kapōa ama’n Israel renghei ṭhatmak hlam kha aleijui jo. Ama’n RŌNGPU dōina setna aleitlo,

¹⁹tâk-kha RŌNGPU’n Judah chu suk manhmang hnōm mak, ajârchu asōkpa David sōn leh pâr he’n vaikarôn akachang ṭhak sik hei kae tia David hnenga intepna aleineia kae.

²⁰Jehoram vairôn shunga Edom in Judah kadōia re aleitlo khana ning leh hnōma aka-om rengram leikachang.

²¹Khava jâra Jehoram in ashakor gârihei leh Zair a kasesōt, khana khan Edom remi he’n anlei kekhum jo hei. Jâna ashakor gâri hlamkakeihei leh anhlam anpetana katlânsōt hei, khana aremihei kha an-inn et a inṭhensō jo hei.

²²Khana inphut Edom kha Judah inphut ning leh hnōma hong ka-om thang jo. Khava phatak a khan Libnah khōpui inum re aheitloa kae.

²³Jehoram ṭōn leitlo akhenga Judah renghei Thuhming Rabua inzet inhlut a kae.

²⁴Jehoram kha kathia David Khōpui kalena renghei thlâna anvûma kae, khana asapa Ahaziah khan athlenga reng kachang jo.

²⁵Ahab sapa Jehoram in Israelhei reng arônna kum 12 atluk pha, Jehoram sapa Ahaziah’n kum 22 atluk pha,

²⁶Judah reng hongkachang, Jerusalema kum khat vai aleirôn. Anu rahming Athaliah anti, Reng Ahab sanu kae, khana Israel a Omri tunu kae.

²⁷Innei jâra Ahaziah kha Ahab leh innshung inhnai jo hei khana Ahab innshung kapōa RŌNGPU dōina ama’n setna atloa kae.

²⁸Ahaziah rengpa’n Israel Reng Joram ajuia Syria reng Hazael kadōia re anleitlo. Gilead ram a Ramoth a re le’ntlo jo hei, khana Joram kha le’ntôn jo.

²⁹A-intônna kha adamna sik a Jezreel khōpuia le’nle khana Ahaziah’n khana khan akaphâk sik a leikasea kae.