Read Komrem RENGHEI INHNINA 9 Bible Online

RENGHEI INHNINA 9 - Komrem bible

RENGHEI INHNINA 9

¹Khava pha Elisha sânkathem in rether sânkathemhei kâra inkhat hnenga ahri, “Intluk roh, Gilead a Ramoth a vase roh. Hiva olive thaibe hi inchoi roh,

²khava hmun natlung leh Nimshi tupa, Jehoshaphat sapa Jehu kha jongsōt roh. Aṭim arehei kâra inphut ahlop a innden inkhat a ṭhōi manhlut roh,

³Olive thai hi alu chunga bunthlōn roh, khana hing’hin ti roh, ‘RŌNGPU’n nang ajōngsōt jo che, ti chu nang hi Israelhei reng sik a thai amanthi jo che kae.’ Khava sō leh inrangtak a dahlon roh.”

⁴Khava jâra sânkathem rether kha Ramoth a kase jo,

⁵khana khan sepei hlamkakeihei kha intûpna inkhat a avahmu hei. Ama’n ati, “Oja, ke’n nang sik a ṭong inkhat kahei rôn.” Jehu’n ader, “Kankâra tu hneng mo nati kha?” Ama’n amasôn, “Nang hnenga kae, Oja.”

⁶Khan chu anmani 2 innden inkhat a kahlut heia sânkathem retherpa khan Jehu luchunga thai abun a ahri, “Israel Pathen, RŌNGPU’n hing’hin aphôngsōt: ‘Kami Israelhei reng sik a nang hi thai kakano che kae.

⁷Nang in nakapu rengpa Ahab sapa kha nathat sik kae, khavakha kei sânkathemhei leh kasōk ralak-hei ankathat Jezebel kha karâkna kapek theina sik a kae.

⁸Ahab innshung mihei leh asōnhei ankhenga akathi sik hei kae. Ama innkō shunga pase rakip, khangdông leh kater inda mak hei ning.

⁹Israel Reng Jeroboam leh Israel Reng Baasha innshunga tlona kapōa ama innshung chunga katlo sik kae.

¹⁰Jezebel kha thlâna invûm mak ning; ataksa kalōng kha Jezreel ramṭhen a uihe’n antasâk sik kae.’” Hiseng ahrisōa sânkathem retherpa kha inranga kasesōt jo.

¹¹Jehu’n hlamkakei achangpui hei hneng hong inle nôk a, anmani’n ahnenga anleider, “Heirakip akaṭha mo? Khava mi invet khan heimo amadu?” Jehu’n amasôn hei, “Ama tamadu kha nangni’n nanmanhret a kae.”

¹²Anmani’n anmasôn, “Keini chu manhret mak ung. Ama’n heimo ahri, amanthei roh.” “Ama’n amanthei eng khachu RŌNGPU’n hinga aphôngsōt jo: ‘Ke’n nang hi Israelhei reng sik a thai kakano jo che kae,’ ati kae.”

¹³Khava phatak a Jehu ṭōnpui rônpui hei khan Jehu ngirna sik a kechōnna achung pena khan anpōn anmazera anleipha, pengkun antum, khōtlâng an-ôn, “Jehu reng kachang jo!” anti.

¹⁴Khava sōa Jehu’n Jezreel a aka-om Joram dōina re atlo jo; khana khan ama kha Syria Reng Hazael dōina Ramoth rea atak intônbi kha inzenna sik a aleikase kae. Khava jâra Jehu’n ahlam keipui hei hneng ahri, “Nangni’n nan-ompui eng inchu, Ramoth a inphut tûte inkhatbek sesōt mak ruh, khana Jezreel a mihei gîkna vapek mak hei ruh.”

¹⁶Khava sōa Jehu’n ashakor gâri achōnga Jezreel a kase jo. Joram chu anatbi ladamloa laka-om, Judah Reng Ahaziah khan aleiphâk a leika-om.

¹⁷Jezreel a ber chunga repa kahngâk mi inkhat in Jehu leh amihei kahong kha ahmu hei. “Shakor kachōng mi ṭhahrep ankahong kahmu” tia leika-ông. Joram in amasôn “Shakor chunga mi inkhat tir ina, thōn hei mo, inrepuihei mo vaman-en roh,” ati.

¹⁸Ṭong karônpa’n Jehu hneng kasea aleider, “Rengpa’n nang ṭhōn inkhat a mo akahong che ti kha amanhret hnōm,” ati. Jehu’n amasôn, “Khavakha naṭōn changmak! Kakahnung eijui roh,” ati. Repa hngâkna ber chunga ka-om mipa khan thang akōia, ṭong karônpa kha akahong rup-hei hnenga katlung jo, tâk hong inlemak jo, ati.

¹⁹Ahlop ṭongkarôn inkhat antir nôk, Jehu hneng in-angtlinga ṭong avader. Ave nôk a, Jehu’n amasôn, “Khavakha naṭōn changmak! Kakahnung eijui roh,” ati.

²⁰Ave nôk a mi ka-enpa khan thang akōia ṭong karônpa kha rup-hei hnenga chu katlung jo, tâk hong inlemak jo, ati. Khana ama’n ahrisa a, “Rup kâra hlamkakei kha invet kapōa ashakor gâri atôr lele, Jehu’m apō!” ati.

²¹Rn Joram in ṭong amasōa, “Kashakor gâri kha mantluk ruh.” Gâri anmantluk jo, ama leh Reng Ahaziah kha an-gâri et anchōnga Jehu inhmupui sik a antôrsōt jo. Anmani’n Naboth hlei laia ama an-inhmupui jo.

²²Joram in aleider, “Mōngna sik akahong che mo?” Jehu’n amasôn, “Heikhonga mo mōngna aka-om thei sik? Nanu Jezreel in aleiphut lim leh dôi insânna rakip nikâra a-omna shung senga hin?”

²³Joram kha hong ka-ônga, “Ahaziah, hiva hichu reng dōina kae!” atia ashakor gâri amahea katlân jo.

²⁴Jehu’n asai akei dap a aratha rakip vâng athe ajōng kâp pha Joram tukkhumtak a amasuk a amalunglai akathi jo. Joram kha atolai chunga katlua kathi jo,

²⁵Jehu’n ama inthōpui Bidkar hnenga ati, “Akalōng hi kadomsōt ina Naboth hlei laia vahlonsōt roh. Kei leh nang in Joram apa Ahab kahnunga shakor nichōnga niselai RŌNGPU’n Ahab dōina hinga aleihri hei kha mandonsōt roh:

²⁶‘Ke’n jâning khan Naboth leh asahei leithina kha kahmu. Khana kei intep eng khachu hiva hlei mama hin nang karâkna kapek sik che kae,’ aleiti. Khava jâra Joram kalōng hi losōt roh.” Jehu’n a’nthōpuipa kha ṭong apek a, “RŌNGPU intepna kha hui atlungna sik a khavakha Naboth hlei laia vahlon jo roh,” ati.

²⁷Reng Ahaziah’n akasōk omchen kha ahmu jo, Beth Haggan katlunga ashakor gâri chunga leikatlânsōt, Jehu’n aleimanlōia. Amihei hnenga, “Ama kha’m thatsōt ruh” aleiti, khana Ibleam khōpui hnenga Gur a agâri hlam a atôrlai khan atak kha anlei mantôn jo; Tâk-kha Meggiddo khōpui katlunga khanga leikasea khana khan vakathi jo.

²⁸Ama ṭōnkarôn he’n akalōng kha Jerusalema gâri inkhat a anchoia renghei thlâna anhrea kae.

²⁹Ahab sapa Joram in Israel reng achangna kum 11 tlukna khan Ahaziah’n Judah reng aleikachang kae.

³⁰Jehu kha Jezreel a hong katlung jo. Jezebel in akasōk omchenhei atheia, ahmit kajal ateia, asam hei kaṭha nenga akhuia, thlikot a inphut reng-innpuiting khō aleithlira leika-om.

³¹Jehu’n kekot a aheihlut pha ka-ônga ahei bek, “Zimri nang! Nang, mikathatpa! Heijâra mo hin akahong che?”

³²Jehu’n chungting a-enna hei kapeng, “Kei langa mi tu mo aka-om chei?” Reng-innpui ṭōnkarôn 2, 3 he’n thlisōkot a inphut anhei en,

³³Jehu’n anmani hneng ati, “Amanu kha heihlon mathla ruh!” Anmani’n anheihlon mathlâk jo, athisen in bang leh shakorhei kha achen kathek jo hei. Jehu’n ashakor leh gâri kha amanu taksa kalōng chunga atôrsōt jo,

³⁴reng-innpuia kahlut a bu asâk jo. Khava sō rōk a ama’n ati, “Hâksêr jo nuhmei kha choi-una vavûm ruh, hei-achang inum, ama reng inkhat sanu kae.”

³⁵Tâk-kha amanu kavûm sik a akase hei khan alurōk, akut leh akehei ru tei loa heite hmumak hei.

³⁶Omchen hi Jehu hneng anvahri pha ama’n ati, “Hivahi RŌNGPU’n asōk sânkathem Elijah hneng hinga kasōk sik aleiti kha kae, ‘Jezebel taksa kha Jezreel ramṭhen a uihe’n ansâk sik.

³⁷Ataksa a’nhleihei kha tute’num ahme anmanhret makna sik ek kapōa inthek inchai sik.’”