Read Komrem THUHMINGHEI INKHATNA 13 Bible Online

THUHMINGHEI INKHATNA 13 - Komrem bible

THUHMINGHEI INKHATNA 13

¹Rn David in remi 1,000 leh 100 rehlam kakeihei kha inbek intōna aneipui hei.

²Khava sōa ama’n Israel mipuihei hneng aphôngsōt, “Nangni seng in nanhnōm inchu, khana RŌNGPU lungdo achang inchu, nimipuihei hneng, thempuhei hneng leh Levihei hneng ankhōpui et a mi tir hei rih, hinahin eini leh ni intûpna sik a vamanthei hei rasoh.

³Khan chu eini kase sik mea kha Saul in reng achanglai aleidon mak jo Pathen Intepna Bôm kha nivalo sik.”

⁴Mipuihei kha khava mantlukna chunga katlai jo heia kahnōm jo hei.

⁵Khava jâra David in aram shunga Israel mipuihei kha amantûp jo hei, thlang tinga Egypt ramria inphut sak tinga Hamath Rakanna katlung, Intepna Bôm kha Kiriath Jearima inphut Jerusalema heichoina sik a antlo jo.

⁶David leh amihei kha Baalah khōpuia, ti chu Judah ramṭhen shunga, Kiriath Jearima, mathla kanei ranhringhei chunga RŌNGPU rahming a’nzet Pathen Intepna Bôm kha avakalo sik a kase jo hei.

⁷Abinadab innshunga inphut Intepna Bôm kha anlosōt a gâri kather inkhat chunga anda jo. Uzzah leh Ahio khan gâri kha an-ensui,

⁸khava pha khan David leh amipuihei chu Pathen kajana, antor chenna kalâm hei. Anmani hla ansak a mahring kanei anmanhring — serângdâr, khōng, sumkutben leh pengkunhei.

⁹Chidon a saphōr hmun anheitlung pha, gâri kakei sehratche kha hong inpaia, Uzzah khan akut ahei kabâna Intepna Bôm kha avamatu jo.

¹⁰Khava phatak a RŌNGPU kha Uzzah chunga ahnuk kana joa Intepna Bôm atôn jâra athat jo. Ama kha khana khan Pathen hmaikunga kathi jo,

¹¹khava jâra khava hmun kha Perez Uzzah antithang jo. RŌNGPU’n Uzzah hneng hnuk nattak a karâkna anei jâra David kha ahnuk inthak hêr jo.

¹²Kha’num David in Pathen aṭit a ati, “Heikhonga mo Intepna Bôm hi tûn ke’n kalo tor sik?”

¹³Khava jâra David in Jerusalemting inchoi mak jo. Khava kanek a, Gath khōpuia mi, arahming Obed Edom intipa inna adahlon jo.

¹⁴Khana khan thla 3 ka-om, khana RŌNGPU’n Obed Edom innshung khana akarōi rakip chunga mahâmṭhat apek a kae.