Read Komrem THUHMINGHEI INKHATNA 15 Bible Online

THUHMINGHEI INKHATNA 15 - Komrem bible

THUHMINGHEI INKHATNA 15

¹David in abinga hmangchâk sik a David Khōpuia inn asak hei. Ama hin Pathen Intepna Bôm indana sik a hmun leh pōn-inn matungna sik um amantluk.

²Khana ama’n ati, “Levi mi rōk in Intepna Bôm kha ankadom sik, ajârchu khava indom sik a leh ahei tik a inzen sik a RŌNGPU takadeisōt kha anmani kae.”

³Khava jâra David in Israel mi rakip Intepna Bôm avakalo sik a khana ama hmun mantlukna khan andana sik a Jerusalema abek jo hei.

⁴Abânna Aaron sōn leh pârhei leh Levihei kabek sik a mi atir hei.

⁵Levi phunga inphut Kohath phungṭhena Uriel kha kahong, ama hi phungṭhen mi 120 hei ka-ensui kae;

⁶Merari phungṭhena inphut Asaiah kahong, mi 220 ka-ensui kae;

⁷Gershon phungṭhena inphut Joel kahong, mi 130 ka-ensui kae;

⁸Elizaphan phungṭhena inphut Shemaiah kahong, mi 200 ka-ensui kae;

⁹Hebron phungṭhena inphut Eliel kahong, mi 80 ka-ensui kae;

¹⁰Uzziel phungṭhena inphut Amminadab kahong, mi 112 ka-ensui kae.

¹¹David thempu Zadok leh Abiathar khana Levi mi 6 leh, Uriel, Asaiah, Joel, Shemaiah, Eliel, khana Amminadab abek jo hei.

¹²Ama’n Levihei hneng ati, “Nangni hi Levi phungṭhen hei hlamkakei chei kae. Nangni leh nan-Levi changpui hei nanbinga inthengsōt ruh, ke’n kamantlukna hmun a Israel Pathen RŌNGPU Intepna Bôm nanheichoi leh nandana sik a tlo ruh.

¹³Ajârchu ahma kakeipen kadomna khan nangni leiom mak cheia, RŌNGPU ni-Pathen in nikamuk sik dôr kha nitlo mak jâra karâkna aleipek jo me.”

¹⁴Khava sōa Israel Pathen RŌNGPU Intepna Bôm thonsōtna sik a thempu leh Levihei kha inthengsōt jo hei.

¹⁵Moses hneng RŌNGPU’n ṭong aleipek kapōa, Levi he’n thingtlōn vâng andâra ankadom jo.

¹⁶Levi ralak he’n hla ansakna sik leh mahring kanei serângdâr leh sumkutben kahōitak a anmanhringna sik a David in Levi hlamkakeihei hneng ṭong apek hei.

¹⁷Hlakasak phungṭhen kadeisōt hei kâra aṭhōia mihei hi sum-êng sumkutben inhring sik hei kae: Joel sapa Heman, ama u leh nai Berechiah sapa Asaph, khana Merari phungṭhena Kushaia sapa Ethan. Anmani kabôm sik a aṭhōia Levihei hi serângdâr inhrektak a’nhring sik a ankadei hei: Zechariah, Jaaziel, Shemiramoth, Jehiel, Unni, Eliab, Maaseiah, khana Benaiah. Serângdâr kadâi nenga a’nhring sik a athōia Levihei hi ankadei hei: Mattithiah, Eliphelehu, Mikneiah, Azazia, khana Bek-inn kahrunghei, Obed Edom leh Jeiel.

²²Chenaniah kha manhringna ting athem jâra Levihei hlasakna ka-ensuia ankadei.

²³Berechiah leh Elkana khana Obed Edom leh Jehia inveina Intepna Bôm kahrunga ankadei hei. Thempu Shebaniah, Joshaphat, Nethanel, Amasai, Zechariah, Benaiah, khana Eliezer hei kha Intepna Bôm hma pengkun katum sik a ankadei hei.

²⁵Khava jâra, Reng David leh Israel hlamkakeihei, khana remi hlamkakeihei kha Obed Edom inna Intepna Bôm kalo sik a kase hei, khana anmani rehōi kalentak anleitloa kae.

²⁶Anmani’n sehratche 7 leh kemōngche 7 Pathen in Intepna Bôm indom Levihei kha a’nthōpuina sik a inthoina anleitōk.

²⁷David in hruipōn innem pōn a’nsi, mahring inhring hei, anhlam kakei Chenaniah, khana Intepna Bôm indom Levihei kha’m ret kaṭha a invon hei. David chu zakkō kabong inkhat a’nvonsa a kae.

²⁸Khang’khan Israel rakip in inpâk a ôngna leh pengkun, sharaki, sumkutben, serângdâr manhringna leh inṭhōia Intepna Bôm kha Jerusalem katlunga anjui jo.

²⁹Intepna Bôm kha khōpui shunga anheichoi manhlut pha, Saul sanu Michal khan thlikot a inphut ahei-en pha, David reng in inpâk a akalâm leh a’nthok kha aheihmu jo.