Read Komrem THUHMINGHEI INKHATNA 16 Bible Online

THUHMINGHEI INKHATNA 16 - Komrem bible

THUHMINGHEI INKHATNA 16

¹Anmani’n Intepna Bôm kha David in amantluk pōn-inn shunga anda jo. Khan chu Pathen hnenga inthoina tōkna leh inlôikhômna tōkna annei jo.

²David in inthoina tōknahei kha achaisōa, ama’n RŌNGPU rahminga mipui hnenga mahâmṭhatna apek hei

³khana ankheng hnenga thlai asempek hei. Israel a pase leh nuhmei rakip hnenga buhlom inkhat leh ro manhmin jo hme ahlom inkhat et leh vomhrui kachâr ahlek asempek hei.

⁴David in Israelhei Pathen, RŌNGPU kha Intepna Bôm hma a hla sak leh choi ka-ân pum a kamukna khan hlamkakei sik a Levi ṭhahrep akadei hei.

⁵Asaph kha hlamkakeia, khana Zechariah khan a’nthōpuia akadei hei. Jeiel, Shemiramoth, Jehiel, Mattithiah, Eliab, Benaiah, Obed Edom, khana Jeiel he’n serângdâr anmanhring sik. Asaph khan sumkutben amanhring sik kae,

⁶khana thempu 2 hei, Benaiah leh Jahaziel he’n Intepna Bôm hmaikunga injônjet apengkun antatum sik kae.

⁷Khavakha David in Asaph leh Levi ralak-hei RŌNGPU manpâkna hla kasak sik a ahma inkeipena amannganna hei kha kae.

⁸RŌNGPU hneng manpâkna pek ruh, alenna kha hrimanthang ruh; Ama ṭōntlo kha jât-hei hripek hei ruh.

⁹RŌNGPU hneng choi ka-ân hla sak ruh; ama ṭōntlo inlak-hei kha hrisōt ruh.

¹⁰Eini ama mi nichang jâra inpâk ruh; ama inmuk rakip in hōi ruh!

¹¹Inthōpuina sik a RŌNGPU hneng se ruh, khana injônjet a ama kamuk ruh.

¹²Nangni Jacob sōn leh pâr, Pathen sōk-hei, Pathen takadeisōt Israel sōn leh pârhei, Pathen tatlosōt ṭōn-inlak kha ama tapek me ṭong tanna kha mandonsōt ruh.

¹⁴RŌNGPU hi ni-Pathen kae; ama ṭongpek kha vânhnōi pumpui sik a kae.

¹⁵Pathen intepna kha mahngi hêrmak ruh, khava ahei tik a aka-om ṭhak sik asyem kha,

¹⁶Abraham leh ṭongkamna asyem kha, Isaac leh intepna asyem kha.

¹⁷ RŌNGPU’n Jacob leh intepna asyema kae, ahei tik a aka-om ṭhak sik inkhat kha.

¹⁸Ama’n ati, “Ke’n Canaan ram kapek sik che. Khavakha nang karōi kachang sik jo.”

¹⁹Pathen mihei mija katlôm hei, Canaan ram a khōhme kachang hei.

²⁰Anmani ram inkhat a inphut inkhat a kalôn lele hei, rengram inkhat a inphut inkhat a kase lele hei.

²¹Tâk-kha Pathen in anchunga tûte inkhat mansuk manrim mak hei; anmani hrungna sik a, ama’n renghei agîk hei:

²²“Ke’n kakadeisōt sōk-hei kha sukset mak hei ruh; kasân kathemhei kha tônmak hei ruh,” ati.

²³Vânhnōi pumpui in RŌNGPU hneng hla sak ruh! Ani tina ama’n ahukna me ṭong kaṭha kha phôngsōt ruh.

²⁴Jât-hei hneng ama lûrna kha phôngsōt ruh, mi rakip hneng aṭōn kalen tlo kha hrisōt ruh.

²⁵RŌNGPU kha kalen inshângtak a manpâk sik kae; ama kha pathen rakip hei kanek a kakhea kaja sik kae.

²⁶Jât rakip hei pathenhei kha limsyem rōk hei kae, tâk-kha RŌNGPU’n marvân asyem hei.

²⁷Lûrna leh kajana khan akake khum, rathahrat leh hōina’n abek-inn kasip sō.

²⁸Raleichunga mi rakip, RŌNGPU kha manpâk ruh, alûrna leh aratha neina kha choi ka-ân ruh.

²⁹RŌNGPU lûrna rahming kha choi ka-ân ruh; inthoina heichoi ruh khana ama Bek-inna hong ruh. A’ntheng Inkhat kha ahong inlâr pha, ahmai kunga inkun ruh;

³⁰ralei pumpui in ahmaikunga innok ruh! Ralei in ahmun kahnet a ka-om inhlingtor mak.

³¹Ralei leh bōirōk inpâk ruh! RŌNGPU kha reng kae tia jât-hei kha manthei hei ruh.

³²Tuipui leh ashunga ka-om ranhring rakip, ông ruh; hleipuk-hei leh nanshunga aka-om rakip in nanning manṭhat ruh!

³³Ratu shunga thingkung he’n inpâk a ka-ông sik hei RŌNGPU’n ralei vai karôn sik a ajōng pha khan.

³⁴Manpâkna kha RŌNGPU hneng pek ruh, ajârchu ama kha akaṭha kae; ama lungsetna kha aheitik a kae.

³⁵Ahnenga ti ruh, “Eh Pathen kankahukpa, ahuk roh; keini amantûp roh; jât-heia inphut ahuksōt roh, narahming kanmanpâkna sik leh kanchoi ka-ânna sik a.”

³⁶Israel Pathen, RŌNGPU kha choi ka-ân ruh! Tun um aheitik a’m ama choi ka-ân ruh! Khava sōa mi rakip in “Amen,” anti, khana RŌNGPU anmanpâk jo.

³⁷Intepna Bôm dana hmun a kamukna neina akaia Reng David in Asaph leh Levi ralak-hei kha akatinta ṭhak sik a ada jo hei. Khana khan akani akani ninga anṭōnhlam antatlosōt sik jo kae.

³⁸Jaduthun sapa Obed Edom leh ama phungṭhen mi 68 he’n anta’nthōpui sik hei kae. Hosa leh Obed Edom kha sōngkot kahngâk a nganse hei kae.

³⁹Zadok leh aloi thempuhei nôk khan Gibeona kamukna hmun a RŌNGPU kamukna ṭōn ka-ensuihei kae.

⁴⁰Ani katai jîngkâr khōhleia anmani’n inthoina kha RŌNGPU’n Israel hnenga aleipek hei dân dungjuia maichâma antaro sik hei kae.

⁴¹Khana anmani leh inṭhōia Heman leh Jeduthun khana ahlopdet a kadeisōt aralak-hei kha kumleikōa RŌNGPU lungsetna jâra choi ka-ânna hla kasak sik a ka-om hei.

⁴²Heman leh Jeduthun hei kha pengkun leh sumkutben khana aralak mahring kaneihei, inpâkna hla ansak pha mahring kanei sik a akatinta inṭangsa hei. Jeduthun phungṭhena mihei kha sōngkot kahrunga inṭang hei.

⁴³Khava sōa mi rakip an-inn et a kase jo hei, David kha’m a-innshunghei leh pha bongkhat akahmang sik a-inna kase jo.