Read Komrem THUHMINGHEI INKHATNA 19 Bible Online

THUHMINGHEI INKHATNA 19 - Komrem bible

THUHMINGHEI INKHATNA 19

¹Pha chomkhat sōa Ammon Reng Nahash kha kathi jo, khana ama sapa Hanun kha reng hongkachang jo.

²Rn David in ati, “Ke’n Hanun hneng, apa’n kei hneng aleitlo kapōa, ṭhōn maritna kha kamalâr sik kae.” Khava jâra David in mi atira alungsetna kha avaphông. Anmani Ammon a antlunga Reng Hanun anbek pha,

³Ammon hlamkakeihei khan reng hnenga anti, “Hivahi David in napa kajana nahnenga lungset phôngsōtna ahongnei kae tia namandon mo? Changphit mak! Ama’n ram hi ahlōna sik khō kathlir mi hin ahei tir hei kae!”

⁴Hanun in David mi tir hei kha asur heia anhnerhme avo pek hei, ankhôn tinga anpōnsi a-eptan pek heia, atirsōt jo hei.

⁵Anmani kha inna hong inle sik inzak hêr jo hei. Omchen kasōk kha David in athei pha, anmani kha Jerichoa khanga anleiomna sik khana anhnerhme aseimak kârseng anhong inle makna sik a ṭong apek hei.

⁶Reng Hanun leh Ammonhei khan David kha inrepui inkhat a ansyem jo ti hi inhret heia, sak tinga Mesopotamia, Maacah leh Zoba a Syria ramheia inphut shakor gâri leh gâri katôr mi nekna sik a dangka ton 40 anpek jo hei.

⁷Antanêk shakor gâri 32,000 leh Maacah rengpa kha kahong heia Medeba hnenga rephōr anmatung jo. Ammonhei kha’m ankhōpui rakip a inphut kahong heia re intuk sik a intluk jo hei.

⁸Omchen kasōk kha David in athei pha, Joab leh remi rakip atirsōt jo hei.

⁹Ammonhei kha hmating kasōk heia ankhōpui reng inn, Rabbah sōngkot hlutna khan anngirna ansyem jo, khana ankabôm sik a akahong renghei khan ramhânga ngirna ansyem jo.

¹⁰Inrepuihei khan hmating leh hnungtinga inphut re anheisō sik ti hi Joab in amanhret jo, khava jâra Israel remi kathem pen hei kha Syriahei kahnget a ada jo hei.

¹¹Aremi alakseng khan anaipa Abishai hlamkeina thōia, Ammonhei kahnget a ada hei.

¹²Joab in ahnenga ati, “Syria he’n kei antor jo eng tia nahmu’nchu, hong inna avabôm roh, khana Ammon he’n nang antor jo che’nchu, kei kahong sik eng kavabôm sik che.

¹³Ratha nei roh khana ngar roh! Nimihei sik leh ni-Pathen khōpuihei sik a rahnaktak a re hi tuk rih. Pathen lungdo kha intlo rasoh.”

¹⁴Joab leh amihei khan re sōna sik a hma annam jo, khana Syriahei kha katlânsōt jo hei.

¹⁵Syriahei tlânsōt kha Ammon he’n anhmu pha, Abishai a inphut katlânsōt heia khōpui shunga kahlut jo hei. Khava sōa Joab kha Jerusalema inle jo,

¹⁶Syriahei kha Israel he’n antor jo hei ti kha inhret heia, Syria ram a Euphrates Tuidung nisōa inphut remi anheiṭhōi hei, Zoba a Reng Hadadezer rehlam kakei, Shobach hlamkeina thōia anda hei.

¹⁷David in khavakha athei pha, Israel rerup amantûp jo hei, Jordan Tuidung anrakana, Syriahei inhngetpui amanngir jo hei. Re intukna kha anphut jo,

¹⁸Israel he’n Syriahei kha anhnong male jo hei. David leh ami he’n Syria shakor gâri katôr 7,000 leh ke remi 40,000 anleithat hei. Anmani’n Syria rehlam kakeipa Shobach kha anleithatsa jo.

¹⁹Hadadezer thōia aleika-om renghei khan Israel torna hei kha anmanhret jo pha, anmani’n David leh inchamna ansyema ama ram mi kachang jo hei. Syria he’n Ammonhei bômna sik a avea mandon mak jo hei.