Read Komrem THUHMINGHEI INKHATNA 21 Bible Online

THUHMINGHEI INKHATNA 21 - Komrem bible

THUHMINGHEI INKHATNA 21

¹Seitan in Israel mipuihei hneng bōina apek hnōm hei, khava jâra David kha mija teina sik a malung apek jo.

²David in Joab leh ṭōnkarôn ralak-hei hneng ṭong apek hei, “Israel ram shunga se ruh, arakir inkhat a inphut arakir inkhat katlung, mija tei hei ruh. Mi heija mo akatluk hei kamanhret hnōm.”

³Joab in amasôn, “RŌNGPU’n Israel mipuihei kha tûnna kanek a aja katamtak manpungsa chet rasoh! Reng Kalûr, anmani ankhenga nasōk-hei kae. Heisa mo hivahi tlo sik khana jât pumpui themmô manchen sik a namadu?”

⁴Tâk-kha rengpa khan Joab kha aṭong amanjui jo, Joab kha kasesōt jo, Israel ram pumpuia kalôn jo, khana Jerusalema hong inle jo.

⁵Ama’n Reng David hnenga pase remi ṭōn katlo tor aja amanthei: Israel a 1,100,000 khana Judah a 470,000

⁶Joab in rengpa ṭongpek madu mak a, ama’n Levi leh Benjamin phunghei aja chu teimak a kae.

⁷Ṭōn tlosōtna chunga khan Pathen kha leitlai mak, khava jâra Israel chunga karâkna apek hei.

⁸David in Pathen hneng ati, “Ke’n hiva tlona jâra setna ṭit ka-om tak katlo jo! Lungset a arangei mandam roh. Kei kamotak a ṭōn katlo jo.”

⁹Khana RŌNGPU’n David sânkathem Gad hneng ati,

¹⁰“Se roh David hneng vahri pek roh, ke’n ama takadei sik a ahlam 3 kapek, ama takadei kha ke’n katlosōt sik kae.”

¹¹Gad kha David hneng kasea, RŌNGPU tahri kha amanthei khana ader, “Khō kha mo nakadei sik?

¹²Kum 3 sâk katâng sik? Achangmak leh na-inrepui remi heia inphut thla 3 tlân lele sik? Achangmak leh ni 3 shunga RŌNGPU’n achemjâm vânga abuhlu sik che khana naram shunga hri leh rai akatla sik, ama ngeva khan Israel pumpuia thina apek sik? Hei masônna mo ke’n RŌNGPU hneng kapek sik?” ati jo.

¹³David in Gad hneng amasôn, “Kei hi akhôkna phatak a ka-om jo eng! Tâk-kha mihring karâkna khachu madu mak eng. RŌNGPU khet kha karâkna anikape chang rasoh, ajârchu ama chu maritna kasip a kae.”

¹⁴Khava jâra RŌNGPU’n hrise Israel mipui chunga ajōngtir jo, khana mi 70,000 kathi jo hei.

¹⁵Khava sōa ama’n Jerusalem kasuk inhmang sik a ngeva inkhat ajōngtir, tâk-kha amalung athlenga ngeva hneng ati, “Inhnga roh! Khavakha katluk set jo!” Ngeva kha Jebush mi Arauna saphōr hnenga kangira leika-om.

¹⁶Ngeva khan ramhânga kangira, chemjâm akut a amatua Jerusalem suk manhmang sik a a’ntluk kha David in aleihmu. Khava sōa David leh mipui hlamkakeihei, ankhenga borapōn akasi hei, inkun heia anhmai raleia anmakhup jo.

¹⁷David in derna anei, “Eh Pathen, dikmak katlo kha kei eng kae. Mija teina ṭong kapek kha kei eng kae. Hiva mihei hin heimo antatlo? RŌNGPU, ka-Pathen kei leh ka-innshung karâkna apek roh, khana namihei chu ṭhensōt hei roh.”

¹⁸David kha ase leh RŌNGPU sik a maichâm inkhat Arauna saphōra asakna sik, ṭong kapek sik a RŌNGPU ngeva khan Gad hneng amanthei.

¹⁹David khan RŌNGPU ṭong kha ajuia Gad in amanthei kapōa kase jo.

²⁰Khava saphōra khan Arauna leh asapa 4 he’n gehu anleivōk a ka-om hei, anmani’n ngeva kha anhmu pha, asapahei kha katlân heia inthup jo hei.

²¹Arauna khan Reng David ahong kha ahmutak leh saphōr hmun kha adahlona inkun jo, ahmai in ralei amantôna.

²²David in ahnenga ati, “Nasaphōr hmun hi kei hneng jōr jo roh, RŌNGPU sik a maichâm inkhat sakna sik, khana hrise abângna sik a kae. Ke’n aman katluk a kapek sik che.”

²³“Arauna khan ati, “Inlo roh, Reng Kalûr, khana namadutak kha intlo roh. Hinahin maichâma ro-inthoina sik a sehratche ka-om hei, hmei ti sik a cheirông ka-om hei, tōkna sik a gehu ka-om jo. Akhenga kapek che kae.”

²⁴Tâk-kha reng in amasôn, “Changmak, ke’n aman katluk a kapek sik che. Nang neinâk heikhat ke’n aman pek loa RŌNGPU hneng inthoina pek mak ning.”

²⁵Khana ama’n Arauna hneng sana cheng 600 saphōr man apek jo.

²⁶Khana khan ama’n RŌNGPU maichâm inkhat asak a ro-inthoina leh inlôikhômna inthoina tōkna anei jo. Ama’n derna anei, khana RŌNGPU’n aderna amasôn pek a maichâm chunga inthoina kha akângna sik a marvâna inphut hmei ajōng mathlâk pek a kae.

²⁷RŌNGPU’n ngeva hneng achemjâm adana sik amanthei, khana ngeva khan ṭong ajuia kae.

²⁸RŌNGPU’n aderna arangei pek jo ti kha hiva omchen hina inphut David in amanhret jo, khava jâra Arauna saphōra maichâm chunga inthoina tōkna anei jo.

²⁹RŌNGPU omna Pōn-inn, Moses’n ramhânga aleisyem kha leh ro-inthoina maichâm kha Gibeona kamukna hmun a tûn katlung laka-om hei;

³⁰tâk-kha David chu khava hmun a RŌNGPU kamukna leise tor mak a kae, ajârchu RŌNGPU ngeva chemjâm kha aṭit a kae.