Read Komrem THUHMINGHEI INKHATNA 22 Bible Online

THUHMINGHEI INKHATNA 22 - Komrem bible

THUHMINGHEI INKHATNA 22

¹Khava jâra David in ati, “Hivahi RŌNGPU Pathen Bek-inn omna hmun kha kachang sik. Hivahin Israel mipuihei romanvâm inthoina tōkna kachang sik.”

²Rn David in Israel ram shunga aka-om ram hlop mi rakip anhong intûpna sik a ṭong apek hei, khana ama’n ṭōn aleimantlo hei. Anmani ṭhahrep in Bek-inn sakna hlungpek ansyema kae.

³Jôtpi leh thingkot hei syemna surkim sik a thir katamtak khana tûte tate tor mak sik sum-êng kha apek hei.

⁴Tyre leh Sidon mi katamtak cedar thingtlōn ahei kachoipek sik a anei hei.

⁵David in amandon, “Kasapa Solomon tasak sik Bek-inn kha kaṭha kalen sik vânhnōia a’nthang sik kae. Tâk-kha ama rether lakae, manhretna laneimak, khava jâra khava mantlukna kha ke’n kanei sik kae.” Khava jâra David in athimak hma hmangchâk katamtak aleidadek a kae.

⁶Ama’n asapa Solomon amanbek heia Israel Pathen RŌNGPU sik a bek-inn asakna sik ṭong apek jo.

⁷David in ahnenga ati, “Sapa, RŌNGPU ka-Pathen kajana, bek-inn inkhat kasak hnōm.

⁸Tâk-kha kei hi mi katamtak kaleithat jo hei khana re katamtak katlo jo tia RŌNGPU’n amanthei eng. Khava jâra ke’n thisen katamtak kamasō jo jâra ama sik a bek-inn amansak mak jo ning.

⁹Kha’num, ama’n intepna kahnenga anei. Ama’n ati, ‘Nang in kamōng tak a vaikarôn sapa inkhat nanei sik, ajârchu ama kha a’nrepui rakip heia inphut mōngna kapek sik. Ama rahming kha Solomon inti sik, ajârchu ama vairôn shunga Israel kha mōngna leh inhukna kapek sik kae.

¹⁰Ama’n bek-inn inkhat kei sik a asak sik. Ama kei sapa kachang sik, khana kei apa kachang sik eng. Ama innshung in Israel kha ahei tik a vai anrôn sik a kae.’”

¹¹David in ahrisa, “Tûn, sapa, RŌNGPU na-Pathen khan ompui che rasoh, ama sik a bek-inn sakna hme nasōna sik a ama intepna kha hui mathlung rasoh.

¹²RŌNGPU na-Pathen khan Israel kha ama Dân dungjuia vai narôn torna sik inritak a singna kha mannei che rasoh.

¹³Nang in dân rakip RŌNGPU’n Israel sik a Moses hneng apek kha najui inchu, nang hmesōna nanei sik. Tlo sik a intluk roh khana intaksen roh, heite inkhat in ṭitna pek mak che rasoh.

¹⁴Bek-inn sik a khan chu kei mantlukna thōia sana ton 4,000 leh dangka ton 40,000 asakna sik kamantûp jo. Hiva chunga sum-êng leh thir chu teitor loa ka-om jo. Thing leh hlungum kanei jo hei, kha’num nang in avât inchu najongsa sik kasōk.

¹⁵Nang in ṭōnkatlo mi katamtak naneihei. Hlung hmun a hlung kahemtan sik, hlung ṭōnkatlo leh thingṭōn katlo thei khana ahlam katamtak a ṭōntlo kathem mi

¹⁶sana, dangka, sum-êng, thir ṭōnkatlo thei ka-om hei. Tûnchu ṭōn kha phut jo roh, RŌNGPU’n a-ompui sik che.”

¹⁷David in Israel hlamkakei rakip Solomon inthōpui sik a ṭong apek jo hei.

¹⁸Ama’n ati, “RŌNGPU nan-Pathen in ahei ompui jo chei khana ahlam rakip a mōngna apek jo chei. Ama’n hiva ram a aleika-om mi rakip amantor eng, khana tûnchu anmani nangni leh RŌNGPU mipui hongkachang jo hei.

¹⁹Tûnchu RŌNGPU nan-Pathen kha nanmalung leh nanratha pumpuia razen ruh. Bek-inn sakna sik a intluk ruh, ashunga khan RŌNGPU Intepna Bôm leh ama kamukna hmangchâk intheng ralak-hei kha nanda theina sik.”