Read Komrem THUHMINGHEI INKHATNA 26 Bible Online

THUHMINGHEI INKHATNA 26 - Komrem bible

THUHMINGHEI INKHATNA 26

¹Hihei hi Bek-inn kahrung Levihei ṭōn mannganna kae. Korah phungṭhena inphut Asaph innshunga Kore sapa Meshelemia kha leika-om.

²Ama’n sapa 7 anei hei, ankum dungjuia man-gôrna kha: Zechariah, Jediael, Zebadiah, Jathniel,

³Elam, Jehohanan, khana Eliehoenai.

⁴Obed Edom inti inkhat um leika-om, Pathen in mahâmṭhat apek a sapa 8 aleinei, ankum dungjuia man-gôrna kha: Shemaiah, Jehozabad, Joa, Sakhar, Nethanel,

⁵Ammiel, Issachar, khana Peullethai.

⁶Obed Edom sapa upapen sapa Shemaiah kha sapa 6 anei hei: Othni, Rephael, Obed, Elzabad, Elihu, khana Semachiah. Anphung shunga torna kanei anchang jâra apui karôn mi rōk hei kae; naipang 2 hei hi them leh singna kaneihei kae.

⁸Obed Edom innshung hi hiva ṭōn katlo sik a mi 62 akathemtak leika-om hei.

⁹Meshelemia innshunga mi 18 akathemtak leika-om hei.

¹⁰Merari phungṭhen innshunga Hosa kha leika-om, ama hi sapa 4 anei hei: Shimri (ama hi upa achangmak inum apa khan hlamkakei amanchang),

¹¹Hilkiah, Tebaliah, khana Zechariah. Bek-inn kahrung Hosa innshung mihei kha ankhenga 13 hei kae.

¹²Bek-inn kahrunghei kha rup hnia anṭhen hei, innshung dungjuia, anmani kha Levi ralak-hei kapōa, Bek-inn ṭōn tlona manngan hei kae.

¹³Innshung rakip, akasin akalen ṭhenloa, khova kekot kha mo hrung sik tina tlâ ansân et a kae.

¹⁴Shelemiah khan nisō kekot a, khana asapa Zechariah, mi hnenga akaṭha ṭong mansena kaneiṭhakpa khan sak tinga kekot a anchen jo.

¹⁵Obed Edom khan thlâng ting kekot khana asahei kha karōi bukna anmanhngak heia kae.

¹⁶Shuppim leh Hosa hei kha tlaitlâk tinga kekot leh chungtinga hlam a Shellekhet Kekot kha anpek hei. Hrungna ṭōn kha inkhat bânna inkhat, apha dungjuia anṭhensōt a kae.

¹⁷Nisō ting, mi 6 sâm in ani katai anhrung, sak ting 4 in, thlang ting 4 in anhrung. Ani tina karōi bukna heia mi 4 sâm in anhrung, karōi bukna inkhat a mi 2 sâm kangir hei.

¹⁸Tlaitlâk tinga telaia hlam sira akahrung mi 4 kangir hei khana telaibât a khan 2 kangir hei.

¹⁹Hivahi Korah leh Merari phungṭhen hnenga hrungna ṭōn mannganna kha kae.

²⁰Anloi Levi ralak-hei kha Bek-inn karōi bukna leh Pathen hnenga tōksōt kutchoi manbukna kahrung sik a manngan hei kae.

²¹Gershon sahei kâra Ladan kha asapa Jehiel innshung inveina, tenlaia innshung rup katamtak hei anpusōn kae.

²²Ladan sapa 2 hei, Zetham leh Joel kha Bek-inn karōi bukna leh neinâk bukna denhei kahrunga manngan hei kae.

²³Ṭōnhlam mannganna kha Amram, Izhar, Hebron, khana Uzziel sōn leh pârhei hneng um anleinei hei.

²⁴Moses sapa Gershom phungṭhena Shebuel kha Bek-inn karōi bukna akatinta apui karônpen ṭōnkarôn kha kae.

²⁵Gershom naipa Eliezer a inphut ama kha Shelomith leh inhnaina annei. Eliezer sapa kha Rehabiah, ama sapa kha Jeshaiah, ama sapa kha Joram, ama sapa kha Zichri, ama sapa kha Shelomith kae.

²⁶Shelomith leh ama innshung mi rakip Reng David in Pathen hneng kutchoi tōksōtna anei rakip akatinta kachang hei — innshung hlamkakeihei, phungṭhen rup hlamkakeihei, khana remi ṭōnpui karônhei.

²⁷Anmani’n re shunga neinâk chomsōt ṭhahrep anloa Bek-inna hmangchâk sik a tōk manthengna annei.

²⁸Shelomith leh a-innshung mihei kha Bek-inna hmangchâk sik a tōksōt rakip aka-ensuihei kae — sânkathem Samuel, Reng Saul, Ner sapa Abner, khana Zeruiah sapa Joab hei kutchoihei seng um inveisa.

²⁹Izhar, Chenaniah leh asahei sōn leh pârhei kha invairônna ka-ensui sik a manngan hei kae: Lekharabu katinta leh Israel mipuihei innâk-inse hri mandaina ṭōn heia.

³⁰Hebron, Hashania khana ama innshung kasōk mi 1,700, ankhenga tlotorna kaneihei sōn leh pârhei kha Jordan Tuidung tlaitlâk tinga Israelhei beklanga leh mipuihei ṭong leh hla ka-ensui sik a manngan hei kae.

³¹Jeriah kha Hebron sōn leh pârhei hlamkakei kae. David reng changna kum 40 tlukna Hebron sōn leh pârhei innshung hrui jongsōtna annei, khana ama innshung mi tlotorna kaneihei Gilead ram a Jazer a leika-om hei ti kha inhret a kae.

³²Rn David khan Jeriah innshunga inphut tlotorna kanei innshung hlamkakei 27,00 akadei heia Jordan Tuidung nisōa Israelhei beklanga leh mipui ṭong leh hla ka-ensui sik a amanngan hei, Reuben, Gad, leh Manasseh ramṭhen shung heia.