Read Komrem THUHMINGHEI INKHATNA 28 Bible Online

THUHMINGHEI INKHATNA 28 - Komrem bible

THUHMINGHEI INKHATNA 28

¹Rn David in Israel ṭōnpui karôn rakip Jerusalema anhong intûpna sik a ṭong apek hei. Khava jâra phung shunga ṭōnkarôn rakip rengram shunga vaikarôn seng, phungṭhen hlamkakeihei, reng leh asapahei karōi leh ranhring ka-ensuihei, reng-innpuia ṭōnkarôn rakip, remi hlamkakeihei, apui karôn mihei Jerusalema intûp jo hei.

²David kha anhmai kunga kangira ṭong ahri pek hei: “Kaṭhōnhei, kaṭong rangei ruh. Ke’n Intepna Bôm, RŌNGPU ni-Pathen kechōnna sik a aka-om ṭhak sik inn inkhat kasak hnōm. Ama kajana ke’n Bek-inn sakna sik a intluk jo eng,

³tâk-kha ama’n khava tlo sik kha ahnōm pek mak, ajârchu kei chu remi inkhat eng kae khana thisen katamtak kamasō joa kae.

⁴RŌNGPU Israel Pathen khan kei leh kasōnhei ahei tik a Israel vai karôn sik a akadei ung. Ama’n Judah phung kha hlamkakei sik a akadei, khana Judah phung shunga inphut kapa innshung kha akadei. Khava innshung rakip a inphut Israel pumpui sik a alosōt enga reng amanchang eng hi ama tlaina kha kae.

⁵Ama’n sapa katamtak apek eng, ankhengpet chunga Solomon kha RŌNGPU rengram, Israel vai karôn sik a akadeia kae.

⁶“RŌNGPU’n kei hneng ati, ‘Kei Bek-inn kasak sik kha nasapa Solomon kha kae. Ama kha kei sapa sik a kakadei jo, khana kei ama pa kachang sik eng.

⁷Atuna ama’n atlo kapōa, kadân leh kaṭong pek rakip inrintak a ajui ṭhak inchu arengram ahei tik a kaman omṭhak sik.’

⁸“Khava jâra, kamihei, tûnchu, ni-Pathen hmaikunga khana Israel rakip intûpna shunga, RŌNGPU mihei, hiva ram kaṭha hi nanchen ṭhakna sik leh abânna khanghei hneng ahei tik a manhlōna sik hei RŌNGPU ni-Pathen ṭong pek me rakip kha inrintak a nanjuina sik a kamanse chei kae.”

⁹Khana Solomon hneng ama’n ati, “Kasapa, napa-Pathen hneng manhretna nanei sik leh malung hlop neiloa khana intluktak a narazen sik a kamanse che kae. Ama’n eini maduna leh mandonna amanhret a kae. Ahnenga nase’nchu arahlâng sik che; tâk-kha ahnenga inphut nasesōt inchu ahei tik a sik a adahlon sik che.

¹⁰Ama Bek-inn intheng kasak sik a RŌNGPU’n akadeisōt che ti hi namanhret sik kae. Tûnchu tlosōt jo roh, intluktak a tlo jo roh.”

¹¹David in Solomon hnenga Bek-inn sakna, neinâk manbukna leh dân ralak sakna, setna rangei mandamna A’nthengpen Hmun sakna sik heia mantlukna rakip kha apek jo.

¹²Ama’n amalunga amantlukna rakip, telai sumpuk hei leh ankimvea denhei, khana Bek-inn hmangchâk leh RŌNGPU hnenga tōksōt neinâk manbukna hei kha ahnenga apek jo.

¹³David in thempuhei leh Levihei anṭōnhlam tlosōtna sik mantlukna hei, Bek-inn ṭōn tlosōtnahei, khana Bek-inn be leh bûr hei mantlukna hei kha’m apeksa jo hei.

¹⁴Ama’n heituk dangka leh sana mo be leh bûr syemna sik a akahlut sik ti kha’m mantheina anei hei,

¹⁵thaihmei leh thaihmei intungna inkhat et sik a,

¹⁶dangka dokhâng sik a, khana sana dokhâng inkhat achunga Pathen hnenga tōkna buhlom pheng dana sik a.

¹⁷Ama’n sana intheng heituk mo chaiche, thlengkam, bephu syemna akahlut sik, khana dangka leh sana heituk mo thleng syemna akahlut sik,

¹⁸khana sana intheng heituk mo maichâm, achunga bero rona syemna leh RŌNGPU intepna bôm chunga mathla kanei ranhringhei gâri syemna akahlut sik ti kha amanthei hei.

¹⁹Reng David in ati, “RŌNGPU ama khet in tlosōt sik apek eng dungjuia, hihei rakip hi mantlukna shunga inzet heia kae.

²⁰Reng David in asapa Solomon hneng ati, “Nabinga intaksenna nei roh khana intluk roh. Ṭōn phut jo roh khana hei-inkhat in naṭōn kha akhârna sik tlomak roh. Ke’n karazen RŌNGPU’n a-ompui sik che. Ama’n adahlon mak ning, ama Bek-inna ṭōn tlo sik kha nachai mak kârseng a-ompui sik che.

²¹Thempuhei leh Levihei kha Bek-inn ṭōnhlam katlo sik a manngan jo hei kae. Kut themna kanei mi rakip in nang anbôm hnōmhêr che, khana mipuihei leh anhlam kakei rakip nang ṭong thōia aka-om jo hei kae.”