Read Komrem THUHMINGHEI INKHATNA 29 Bible Online

THUHMINGHEI INKHATNA 29 - Komrem bible

THUHMINGHEI INKHATNA 29

¹Reng David in ahon’tûp mipuihei hneng khan ahria, “Kasapa Solomon hi Pathen in akadei jo, tâk ama hi naipang lakachanga lungria heikhat manhretna lakatlâksam, khannum atlo sik ṭōn chu kalentak a kae, khana asak sik inn hi mihring omna sik innpui changmak, RŌNGPU Pathen Bek-inn sik kae.

²Hiva Bek-inn sik a hin ke’n kator chenna neinâk kamantluk, sana, dangka, sum-êng, thir leh thing, hlung mankatam, leh mukta ret sik a hlunghei khana simvâr hlung akhenga kamantluksō jo.

³Hiva kakhea Pathen Bek-inn intheng sak sik kamaduna mônga kei bing karōi bukna inphut sana, dangka katōk a kae.

⁴Ke’n sana intheng ton 100, dangka ton 240, hivahei hi Bek-inn banga ret rabek syemna sik leh kut kathem he’n aret heirakip ansyemna sik a kae.

⁵Tûn RŌNGPU Bek-inn sakna sik a neinâk katōk hnōm laka-om chei mo?” tia ader hei.

⁶Phung upahei, phung ṭōnkarônhei, rehlam kakeihei, rengpa innshung vaikarôn he’m ama ama tator et kutchoi anhongtōk jo.

⁷Bek-inn sakna sik a anta hongtōksōt akhenga sana ton 170 inhlei, dangka ton 340, sum-êng ton 620, Thir ton 3,400 aphâk a kae.

⁸Hlung mankatam kanei he’n RŌNGPU Bek-inna neinâk manbukna anhongtōk, Khahei kha Gershon phunga Levi mi Jehiel in a-ensuia kae.

⁹Mipuihei khan RŌNGPU hneng pek hnōmtak a anpek, anmani’n khaseng anpek tor jâra khan inpâk heia kae. Reng David um inpâk hranghra a kae.

¹⁰Hiva mipuihei intûpna hin reng David in RŌNGPU kha amanpâk a kae. Ama’n ahria “Kanpu Jacob, RŌNGPU Pathen aheitik chenna manpâk a omṭhak roh!

¹¹Nang chu akalenpen akahratpen, akalûr, ngam kanei leh kaja ka-om che kae. Marvân leh raleichunga neinâk heirakip nangta kae, heirakip chunga reng vaikarôn Chunghnung che kae.

¹²Karōi neina leh haona nanga inphut kajōng, nang in heirakip chunga naratha neina leh nahratna vâng vai narôn, nang in mi inkhat akalen akahrat a nasyem tor.

¹³Tûnhin kan-Pathen, nang kanmanpâk che, khana narahming kalûr kanchoi ka-ân che.

¹⁴“Khannum kamipuihei leh ke’n nang ângshunga tōk sik kadiktak a heite neimak ung, ajârchu neinâk rakip hi nang tapek ung kae, nata kachangsa kha kanta hongtōk male che kae.

¹⁵O RŌNGPU, nang in namanhret ung, ti chu kanpu sōnhei tatlo kapōa, rehring sur leh khōhmea kanhringkhō leikathleng jo. Kanhringkhō hi kani daihlim aseri kapō kha kae, thina kha keini’n pesōt tor mak ung.

¹⁶O RŌNGPU kan-Pathen, narahming kajana Bek-inn inkhat sakna sik a hiva karōihei hi keini’n kanhei choi mantûp, tâk hihei seng hi nanga inphut akajōng, nangta hei kae.

¹⁷Nang in mi rakip malung na-enmansin ti ke’n kamanhret, khana malung intheng hei chunga namalung katlâi. Ke’n malung inthengtak a khana pek hnōmtak a hiseng hi katōk che kae, khan chu nimipuihei hinna ahon’tûp seng hin inpâktak a nang hneng tōk sik a anta heichoi kahmu sōt a kae.

¹⁸O RŌNGPU, kanpu Abraham, Isaac khana Jacob Pathen namipuihei malunga hiva kapō kamukna hi ahei tik a manhnet pek hei roh. Khana nakataksen ṭhak manchang hei roh.

¹⁹Kasapa Solomon hi naṭongpek rakip a malung akhenga anjui hnōmna sik, khana kaleimantluk Bek-inn asakna sik lungthim ratha pek roh,” atia kae.

²⁰Khava sōa, David in mipuihei hneng ahri, “RŌNGPU nan-Pathen kha manpâk ruh”. Khana mipui seng in anpusōn RŌNGPU Pathen kha anmanpâk a, anmani’n anlu anmankuna RŌNGPU Pathen leh rengpa kajana anpek hei.

²¹Ajîng kania anmani’n ranhei inthoina antha a RŌNGPU hneng suk manthengna tōkna annei, khava sōa mipui hneng antasâk sik a anpek jo hei. Khava chung nôk a anmani’n sehratche 1,000, kemōngche 1,000 leh kemōngte 1,000 kha maichâm chunga apum a anroa inthoi hei. Khan chu anmani’n vomhrui theiju um anheichoia kae.

²²Khava kani ning khan RŌNGPU ângkunga anmani’n ansâk a an-ina inpâk hranghra heia kae. Vōihni tlukna anmani’n Solomon kha reng kachang jo tia khōtlâng an-ôn manthang jo, RŌNGPU rahminga ama kha anvaikarôn sik khana Zadok khan thempu sik a thai anmanthi jo hei.

²³Khang’khan Solomon in RŌNGPU talei matungsōt apa David len in-ongna chunga khan apa hmun ahlō joa kae. Ama reng hmesōna kanei inkhat kae, Israel jât rakip in aṭong anjui.

²⁴Ṭōnkarôn, rehlam kakei rakip leh David sapahei seng inum Solomon kha reng inkhat a aṭong antajui sik a intep pet jo hei.

²⁵RŌNGPU’n Israel jât rakip in Solomon ṭitna amannei hei, Israel vai leikarôn renghei kanek a ama chunga lûrna apek chet a kae.

²⁶Jesse sapa David khan Israelhei seng chunga reng vai

²⁷kum 40 aleirôn. Hebrona kum 7, Jerusalema kum 33 vai aleirôn.

²⁸Ama hringkhō pui katluk a ater jo pha kathi, anei, ahao, min ankaja, khana asapa Solomon in reng kachanga ahmun ahlō.

²⁹Reng David thuhming aphut a inphut atorna katlunga sânkathem mi 3, Samuel, Nathan, khana Gad hei mazet manhlutna lekha shunga ka-om hei.

³⁰Ama’n heikhonga mo vai arôn, ratha heituk a anei mo, khana ama chunga, Israel chunga, inhnaipui rengramhei chunga heimo aleikasōk kha lekharabua hin mantheina ka-oma kae.