Read Komrem THUHMINGHEI INHNINA 1 Bible Online

THUHMINGHEI INHNINA 1 - Komrem bible

THUHMINGHEI INHNINA 1

¹Rn David sapa Solomon in Israel rengram kha kahnettak a athōia ada jo, khana RŌNGPU apathen in mahâmṭhat apek a ratha amannei hêr jo.

²Rn Solomon in Israel lishing hlamkakei leh raja hlamkakeihei, sarkâr ṭōnkarônhei rakip, innshung hlamkakei rakip, khana mipui senghei hneng,

³ama leh inṭhōia Gibeona kamukna hmun a ansena sik ṭongpekna inkhat anei hei. Khava hmun a khan RŌNGPU sōkpa Moses’n ramhânga aleisaksōt RŌNGPU omna Pōn-inn kha a-om jâra khava hmun a aleikase hei kae. (

⁴Kha achang inum, Intepna Bôm khachu Jerusalema leika-om, Reng David in khava Bôm kha Kiriath Jearima inphut ahei rôn sōt pha aleisyemsōt pōn-inna anda a kae.)

⁵Khana Hur tupa, Uri sapa, Bezalel tasyem sum-êng maichâm kha’m Gibeona RŌNGPU omna Pōn-inn hmating ka-oma kae. Khava hmun a Reng Solomon leh mipui he’n RŌNGPU ankamuk a kae.

⁶Pōn-inn hmating khan reng in sum-êng maichâm chunga inthoina tōkna aneia RŌNGPU kha aleikamuk, ama’n ran 1,000 athat a maichâm chunga khan pumro tōkna aneia kae.

⁷Khava jân a khan Solomon hneng Pathen ho’nlâra ader, “Ke’n heimo kapek sik chea namadu?”

⁸Solomon in amasôn, “Nang in kapa David sik a lungset kalentak kha namalâr ṭhak, khana tûnhin kei ama kathlenga reng namanṭang eng.

⁹O RŌNGPU Pathen kapa hnenga naṭong tepna kha pui mathluk roh. Nang in kei hi mipui katamtak tei torlo hei reng inkhat a nasyem jo eng,

¹⁰khava jâra anmani chunga vairôn theina sik karangei singna leh themna kha apek roh. Achangmak inchu, heikhonga mo hiva namipui katamtak hei hi vai karôn tor sik hei?”

¹¹Pathen in Solomon hneng amasôn, “Nang in akadiktak kadeina kha nanei jo. Nang in neina, karōi, rahming inthang, nakadōihei thina sik, khana nabing hringkhō seina hei kha nader sik eng kanek a, nang in singna leh themna khana anchunga reng kamanchangna che kamipuihei vai rôn theina sik a nader a kae.

¹²Ke’n themna leh singna kha kapek sik che. Khava chunga, neina, karōi, khana reng tûte inkhat in rahming inthangna aleichen jo leh alachen nôk sik khahei seng kakhe chet a kapek sik che.”

¹³Khava jâra Solomon in RŌNGPU omna Pōn-inn omna Gibeon kha adahlon jo, khana Jerusalema hong inle jo. Khana khan ama’n Israel chunga vai arôna ka-om jo.

¹⁴Ama’n remi shakor gâri 1,400, shakor kachōng remi 12,000 asyemsōt hei. Ṭhahrep chu Jerusalema ada hei, alak-hei chu khōpui hmun ralak a ada hei.

¹⁵Ama vairôn shunga sana leh dangka kha hlung kapōhrep a inhmu hei, khana cedar thing kha Judah hmebunga sycomore kung kapōa katam hei.

¹⁶Rengpa mihei hin Musri leh Cilicia inphut shakor miram a jōrsōt sik hei leh

¹⁷khana Egypt a inphut shakor gâri miram a jōrsōt sik hei kha an-en mathlip heia kae. Anmani’n Hit leh Syria renghei hneng shakor leh gâri anpek hei, gâri inkhat a dangka 600 sâm khana shakor inkhat a dangka 150 sâma anjōr heia kae.