Read Komrem THUHMINGHEI INHNINA 10 Bible Online

THUHMINGHEI INHNINA 10 - Komrem bible

THUHMINGHEI INHNINA 10

¹Rehoboam kha Shechema vakase, khana khan sak tinga Israel he’n ama reng manchangna sik a le’ntûp hei.

²Nebat sapa Jeroboam, Reng Solomon a inphut Egypt a akatlânsōtpa khan hiva ṭong hi athei pha innting hong inle.

³Sak tinga phunghei khan Rehoboam hnenga mi anva manbek a, khana anmani ankhenga kase heia ahnenga anvahri,

⁴“Napa khan kanchunga phurhrik aleimanrôn ung. Hiva phurhrik hi nang in namanyâng det a kanhringkhō hi namanhōi det inchu, keini nang ṭong kajui mipui kachang sik ung.”

⁵Rehoboam in amasôn hei, “Hiva mandonna sik a ni 3 apek ruh. Khava sō leh hong inle ruh.” Khava jâra mipuihei kha kase jo hei.

⁶Reng Rehoboam in apa Solomon mansena aleikanei re-upahei inbek puina anei hei. Ama’n ader hei, “Hiva mipuihei hi heikhonga masônna mo kapek sik hei?”

⁷Anmani’n anmasôn, “Nang in hiva mipuihei hi lungset narôn heia anmani tlaina sik a akatluk hrep masônna napek he’nchu anmani’n ṭong kajuitak a anrazen sik che.”

⁸Tâk-kha ama’n re-upahei mansena kha leidon mak a khava kanek a retherhei, ama loi leh re, tûntûna ama inse hei hneng jôk a kase jo.

⁹Ama’n ader hei, “Heimo tlo sik a nanta manthei sik eng? Mipuihei, anphur rôn amanyâng pek roh tia ani kader hei hneng heimo kavahri sik?”

¹⁰Anmani’n anmasôn, “Namanthei sik hei kha hi kae: ‘Kakutte hi kapa khōn kanek a kahngara insâdet,’ ti roh.

¹¹Manthei hei roh, ‘Kapa’n phurhrik amanrôn chei; khavakha ke’n kamanhrik chet sik. Ama’n mi vōkna hrui vânga avōk chei; ke’n Shakor che vōkna hrui vânga kavōk sik chei!’”

¹²Ni 3 sōa Jeroboam leh mipui rakip, ama’n aleimanthei hei dungjuia, Reng Rehoboam hnenga kahong jo hei.

¹³Reng in re-upahei mansena kha donloa mipuihei hneng retherhei mansena kapōa,

¹⁴hnuk kasetak a ṭong aleihri. Ama’n ati, “Kapa’n nanchunga phurhrik amanrôn chei; ke’n khavakha kaman hrikdet sik. Ama’n mi vōkna hrui vânga avōk chei; ke’nchu shakor che vōkna hrui vânga kavōk sik chei.”

¹⁵RŌNGPU Pathen in Shiloa inphut sânkathem Ahijah ahmanga Nebat sapa Jeroboam hnenga aleimanhri kha hui mathlung sik hi alungdo kae.

¹⁶Mipuihei khan rengpa’n anṭong arangei pek mak ning tia anmanhret jo pha, anmani ka-ông jo hei, “David leh a-innshung tlâksukna chang rasoh! Anmani’n eini sik a heimo antatlo pek jo me? Israel mipuihei, inna inle jo rih! Rehoboam chu abinga mandon jo rasoh!” Khava jâra Israel mihei kha inphin jo hei,

¹⁷khanga Rehoboam kha Judah ramṭhen a aka-om hei rōk sik a, reng sik a, andahlon jo.

¹⁸Khava sōa Reng Rehoboam in Adoniram, rumhrat a ṭōn mantlohei ka-ensuipa kha Israelhei hnenga akase sik a aleitir, tâk-kha anmani’n hlung vânga andeng hlona kathi jo. Khan chu, Rehoboam inrangtak a ashakor gâri achōnga Jerusalema katlânsōt jo.

¹⁹Khava pha a inphut Israel ramsak tinga mipuihei hin David reng innshung chunga dōina inphinna anheitlo ṭhak joa kae.