Read Komrem THUHMINGHEI INHNINA 11 Bible Online

THUHMINGHEI INHNINA 11 - Komrem bible

THUHMINGHEI INHNINA 11

¹Rn Rehoboam in Jerusalema aheitlung pha, Benjamin leh Judah phunga remi kahrângpen 180,000 abek mantûp hei. Ama khan ramsak tinga Israel phunghei chunga re vasōa vai rôn nôk sik heia le’ntluk.

²Tâk-kha RŌNGPU’n sânkathem Shemaiah hneng

³hiva ṭong hi Reng Rehoboam khana Judah leh Benjamin phung mipui rakip hnenga hripek sik a amanthei:

⁴“Nang innshung mi kalalen chunga re tlomak roh. Nankhenga, inna inle ruh. Akasōk omchen kha kei lungdo kae.” Anmani’n RŌNGPU ṭongpek anjuia Jeroboam re katuk sik a semak jo hei.

⁵Rehoboam kha Jerusalema ka-oma athōia Judah leh Benjamin khōpuihei hi kur atukkhum hei:

⁶Bethlehem, Etam, Tekoa,

⁷Bethzur, Socoh, Adullam,

⁸Gath, Mareshah, Ziph,

⁹Adoraim, Lachish, Azekah,

¹⁰Zorah, Aijalon, khana Hebron.

¹¹Khahei kha kahnettak a kur atukkhum hei khana khava hmun rakip sik a hlamkakei akadei hei, khava ashung rakip a thlai, olive thai leh ju,

¹²khana pho leh kasei he’m ada hei. Hing’hin Judah leh Benjamin kha ama thōia ada jo hei.

¹³Israel ramṭhen rakip a thempu leh Levihei kha thlang tinga Judah ram a kahong jo hei.

¹⁴Levihei khan anse khemna ramhâng leh anram ralak anhei dahlona Judah leh Jerusalema kahong jo hei, ajârchu Israel a Reng Jeroboam leh asōn he’nchu anmani kha RŌNGPU inzena thempu manchang mak jo hei ninga kae.

¹⁵Jeroboam inchu ama thempu khōvel pathen kamukna hmun heia leh ramṭai kamukna khana sehratche lim antasyem hei kamukna inzen sik a mi aleikadei hei.

¹⁶Israel phung rakip heia inphut RŌNGPU Israelhei Pathen kha malung inthengtak a kamuk sik a indu hei khan chu anpa anpuhei Pathen RŌNGPU hnenga inthoina antōk theina sik a, Jerusalemting Levihei kahnung anleijui jo hei.

¹⁷Hivahin Judah rengram kha ratha anmannei chet jo, khana kum 3 Solomon sapa Rehoboam kha anlei thlop a Reng David leh Reng Solomon vairônna thōia anleiom kapōa ka-om jo hei.

¹⁸Rehoboam in David sapa Jeri-moth sanu Mahalath kha aleiompui, anu kha Jesse tunu khana Eliab sanu Abihail kae.

¹⁹Anmani’n sapa 3 annei, Jeush, Shemariah khana Zaham hei seng kae.

²⁰Hnung leh chu ama’n Absolom sanu Maacah a-ompuia sapa 4 annei hei: Abijah, Attai, Ziza leh Shelomith hiseng.

²¹Akhenga, Rehoboam in nuhmei 18 khana amanbo nuhmei 60 anei hei, khana asapa 28 leh asanu 60 hei pa leikae. Anuhmei leh anuhmei manbohei kâra Maacah kha alungsetpen leikae,

²²khana asapahei kâra amanu sapa Abijah kha amaritpen kae khana ama kahlâng kathlenga reng sik a aleikadeia kae.

²³Rehoboam khan kasing tak a asapahei hneng ṭōn mannganna aleinei hei, Judah leh Benjamin ram pumpuia rekur tukkhum khōpui heia aleida hei. Ama’n kaṭhatak a sâk leh in aleipek hei khana anmani sik a nuhmei katamtak alei jongsōt pek hei.