Read Komrem THUHMINGHEI INHNINA 12 Bible Online

THUHMINGHEI INHNINA 12 - Komrem bible

THUHMINGHEI INHNINA 12

¹Rehoboam in reng inkhat a aratha neina kha asyemsōt pha, ama leh amihei seng in RŌNGPU Dân kha andahlon jo.

²Rehoboam vairônna kum 5 tlukna RŌNGPU hnenga anmani ṭong juimakna jâra karâkna leika-om. Egypt a reng Shishak in Jerusalem re aleisō

³aremi shakor gâri 1,200 shakor remi 60,000, khana tei torlo remi katamtak, khava kâra Libya, Sukkit khana Ethiopia remi inveisa hei.

⁴Ama’n Judah rekur tukkhum khōpui ahlō hei khana Jerusalem katlunga hmating anam a kae.

⁵Shishak hnenga inphut tlânsōtna sik a anreia Jerusalema ale’ntûp Reng Rehoboam leh Judea hlamkakeihei hnenga Sânkathem Shemaiah kha vakase. Anhnenga ava ti, “Hivahi nanhnenga RŌNGPU ṭong manrôn kae: ‘Nangni’n nandahlon jo eng, khava jâra tûnchu nangni Shishak hnenga kadahlon jo chei kae.’”

⁶Rengpa leh hlamkakeihei khan kaset jo ung ti hi kahnōm jo hei, khana anti, “RŌNGPU tatlosōt hi kadik.”

⁷RŌNGPU’n hivahi ahmu pha, ama’n Shemaiah hneng ahri nôk, “Anmani’n anṭhena kha anhnōm jâra, ke’n suk manhmang mak hei ning. Tâk-kha Shishak in abuhlu hei pha, deng pahrea kahringsōt sik hei. Jerusalem chu kei hnuknat inhnaktak kha chenmak jo ning,

⁸tâk Shishak in ahlō sik, khana inphut kei razenna leh raleia vaikarônhei razenna in-ang makna kha anmanhret sik.”

⁹Reng Shishak kha Jerusalema kahonga Bek-inna inphut leh reng-innpuia karōihei alosōt jo hei. Ama’n heirakip alosōt, Solomon in aleisyem sana pho katlunga.

¹⁰Khahei kathlenga Rehoboam in sum-êng pho asyem heia reng-innpui kot kahrunga manngan hei hneng amanda hei.

¹¹Rn in Bek-inna ase akaia, akahrung hei khan pho hei kha anmatu hei khana repa hngâkna den shunga anda male nôk hei.

¹²RŌNGPU hneng atak a’npek sōt jâra, RŌNGPU hnuknat khan suk manhmang chermak a kae, khana Judah hei sik a ṭhatthei kachang joa kae.

¹³Rehoboam in Jerusalema vai arôna reng inkhat a aratha neina amanlensa a kae. Ama reng ahongchang pha akum 41 katluk jo, ama kamukna hmun sik a Israel ramṭhen pumpuia inphut akadeisōt Jerusalem khōpuia kum 17 vai aleirôn. Rehoboam anu kha Ammon ram a Naamah inti.

¹⁴Ama’n RŌNGPU lungdo jongna sik a intluk mak a, ṭhatmak atloa kae.

¹⁵Rehoboam ṭōn phutna leh achaina khana a-innshung ṭong mazetna Sânkathem Shemaiah Thuhming rabu leh Sânkathem Iddo Thuhming rabu shung heia inhmu hei khana Rehoboam leh Jeroboam kha khat leh khat re intlo ṭhak heia kae.

¹⁶Rehoboam kha kathia David khōpuia renghei thlâna anhre khana asapa Abijah khan areng hmun athleng jo.