Read Komrem THUHMINGHEI INHNINA 13 Bible Online

THUHMINGHEI INHNINA 13 - Komrem bible

THUHMINGHEI INHNINA 13

¹Israel Reng Jeroboam vairônna kum 18 atluk shunga, Abijah kha Judah reng hongkachang,

²khana Jerusalema kum 3 vai aleirôn. Anu kha Gibeah khōpuia Uriel sanu Micaiah kae. Abijah leh Jeroboam hei kâra re kasōk jo.

³Abijah khan remi 400,000 asyemsōt hei, khana Jeroboam in remi 800,000 vânga adōia kae.

⁴Remihei kha Ephraim tlângrama re intlo jo hei. Reng Abijah khan Zemaraim Tlânga kaketoua Jeroboam leh Israel mihei abek hei: Ama’n ati, “Kaṭong rangei ruh!

⁵Israel Pathen RŌNGPU’n David leh asōnhei kha Israelhei chunga ahei tik a reng changna sik apek jo hei, vōkkhōi theilo intepna ahnenga aleisyem kha manhret mak chei mo?

⁶Nebat sapa Jeroboam in arengpa, Solomon dōina re aleitlo.

⁷Khan chu ama’n hnemna kase mihei amantûp hei, khana anmani maduna kha Solomon sapa Rehoboam hnenga rumhrat anvatlo, ama kha khangdông achang jâra anmani khârna kha leimanhret mak a kae.

⁸Tûnhin RŌNGPU sōnhei hnenga apek jo ratha neina kha dōina sik a intluk chei. Nangni’n remi katamtak leh Jeroboam taleisyem nan-pathen sik a sana sehratche limsyem kha nannei hei.

⁹Nangni’n RŌNGPU thempuhei, Aaron sōnhei, Levihei kha nanhnongsōt hei. Anmani ṭōnhmun a, jât ralak-hei tatlo kapōa thempu nankadei hei. Sehratche inkhat achangmak leh kemōng 7 ahei kakeihei kha nangni pathenhei thempu sik a mantheng sōtna anchen theia kae.

¹⁰“Tâk-kha tûn katlung keini chu RŌNGPU ni-Pathen kha kanrazen khana ama kha dahlon mak ung. Aaron sōn he’n anṭōnhlam antlo manjōm, khana Levi he’n anlabôm ṭhak hei.

¹¹Jîngkâr leh khōhlei akaia bero leh ran pumro inthoina annei hei. Anmani’n bekdâna a’ntheng buhlom kha dokhâng chunga tōkna annei, khana ani tina sana thaihmei matungna khan thaihmei andet a kae. Keini’n Pathen ṭongpek kha kantlo, tâk-kha nangni chu ama kha nandahlon joa kae.

¹²Pathen khet kha keini hlamkakei kae khana ama thempuhei hinahin, nangni dōina re katlo sik a, keini hei bekna pengkun anmatua akatum sik a intlukdek jo hei. Israel mipuihei, nangni pusōnhei RŌNGPU dōina re tukmak ruh. Re tor mak tin chei!”

¹³Khava pha, Jeroboam in aremi ṭhahrep Judea remihei kahnungtinga inphut ahei kahlō sik a aleitir hei, khana ṭhahrep he’n hmating amandōi hei.

¹⁴Judeahei khan ankimve an-en pha mihei kekhumna kha anhmu jo. Anmani’n RŌNGPU hneng inthōpuina ander jo khana thempu he’n pengkun antum jo.

¹⁵Judea he’n inhnaktak a ka-ông heia, Abijah hlamkeina re ansō jo; Pathen in Jeroboam leh Israel remihei kha ator jo hei.

¹⁶Israelhei kha Judea heia inphut katlân jo hei, khana Pathen in Judeahei kha torna ratha amannei heia kae.

¹⁷Abijah leh aremi he’n Israel sahei kha antorcher jo hei — remi kahrâng 5,00,000 anleithat hei.

¹⁸Khang’khan Judah mihe’n Israel chunga re antor jo hei, ajârchu anmani anpu sōnhei Pathen RŌNGPU hnenga inhnga heia kae.

¹⁹Abijah khan Jeroboam remihei kha amanlōi heia akhōpui ṭhahrep ahlō jo: Bethel, Jeshana, leh Ephron, khana khōpuihei hnenga khōtete hei seng.

²⁰Jeroboam khan Abijah pha shunga ratha avea heinei nôk mak joa kae. Achaina RŌNGPU’n arachâk nenga, kathi jo.

²¹Abijah chu hei-achang inum ratha ahongnei chet a kae. Ama nuhmei 14 anei hei khana sapa 22 leh sanu 16 hei pa hongkachang.

²²Abijah thuhming bân hei, heimo ahri khana heimo atlo hei khachu Sânkathem Iddo Thuhming Rabu a inzet a kae.