Read Komrem THUHMINGHEI INHNINA 14 Bible Online

THUHMINGHEI INHNINA 14 - Komrem bible

THUHMINGHEI INHNINA 14

¹Rn Abijah kha kathia David khōpuia renghei thlâna anhre jo. Asapa Asa khan athlenga reng kachang jo, Asa thōia ram shunga kum 10 mōngna leh chamna anleichen.

²Asa khan akadik leh akaṭha atloa apathen RŌNGPU kha amantlai.

³Ama’n ram hlop hei maichâm khana khōvelhei kamukna hmun alosōt hei, khana a’ntheng hlung kachohei, khana Asherah pathennu limhei atuktan hei.

⁴Ama’n Judah mipuihei hnenga anpu anpahei Pathen RŌNGPU lungdo antlona sik khana ama mantheina leh aṭongpek juina sik a ṭong apek hei.

⁵Ama’n khōvel kamukna hmunhei leh bero rona maichâmhei Judah khōpuia inphut alosōt hei jâra rengram kha ama vai rôna thōia kamōng tak a leika-oma kae.

⁶Ama pha shunga Judah khōpuihei kha rekur atukkhum hei, khana kum katamtak re leh sha leisōk mak, ajârchu RŌNGPU’n mōngna aleipek a kae.

⁷Ama’n Judah mipuihei hneng ahri pek hei, “Eini’n khōpuihei hi bang leh berhei syem me sona rekur tukkhum hei rih, khana kamthei leh khârthei kekot syem hei rih. Eini’n RŌNGPU ni-Pathen lungdo kha nitlo jâra ram hi nihrung tor jo kae. Ama’n ramkei rakip a inhrungna leh inhukna apek me.” Khang’khan anmani’n ansyem heia khangna annei jo.

⁸Reng Asa khan Judah inphut remi 300,000 anei hei, pho leh kasei vânga invon hei, khana Benjamin a inphut remi 280,000 pho leh the vânga a’nvon anei hei. Ankhenga re kahrânghei khana inthem chûkna akaneihei kae.

⁹Ethiopia mi inkhat arahming Zerah inti khan Judah ram a 1,000,000 remi leh shakor gâri 300 leh Mareshah katlunga hmating anheinam jo.

¹⁰Ama re intukpui sik a Asa kha kasesōt jo, rup 2 hei kha Mareshah hnenga Zephatha Phaichama intluktak a ka-om jo hei.

¹¹Asa khan apathen RŌNGPU hnenga derna anei, “O RŌNGPU, ratha katlasam remihei kha nang in ratha kaneitak inkhat a naman chang tor hei. Tûn a’nthōpui roh, RŌNGPU kan-Pathen, ajârchu keini hi nang hnenga inngamna kantanei kae, khana nang rahminga hiva remi katamtak hei kadōi sik a ahei kasōk ung kae. RŌNGPU, nang kan-Pathen che kae; tûte inkhat in nang torna sik a inhōrna nei tor mak hei.”

¹²Asa leh Judea remihei khan re ansō hei pha RŌNGPU’n Ethiopia remihei kha ator jo hei. Anmani katlânsōt jo hei,

¹³Asa leh aremi rup he’n Gerar katlunga anleihnong hei. Ethiopia mi katamtak anleithat hei khan chu anremihei khan inpunkhôma re kha tuktor mak jo heia kae. Anmani kha anremihei leh RŌNGPU’N anam mathlâk hei khana Judah remihei khan neinâk katamtak anleichomsōt a kae.

¹⁴Khava sōa anmani’n Gerar kimvea khōpuihei ansuk manhmang tor jo hei, ajârchu khana ka-om mihe’n RŌNGPU kha ṭit-inpirna annei joa kae. Remihei khan khōpui rakip kha anvōkkhōi jo hei khana neinâk katamtak anchomsōt joa kae.

¹⁵Khana anmani’n kemōng kakhemhei rephōr ṭhahrep um anbuhlua kemōng leh sharîngsei katamtak ansur heia kae. Khava sōa Jerusalema inle jo hei.