Read Komrem THUHMINGHEI INHNINA 15 Bible Online

THUHMINGHEI INHNINA 15 - Komrem bible

THUHMINGHEI INHNINA 15

¹Pathen rathla kha Oded sapa Azariah chunga jōng katlung,

²khana ama’n Reng Asa hneng vakase. Ama abek a, “Reng Asa, Judah leh Benjamin mipuihei kaṭong hi rangei ruh! Nangni’n RŌNGPU hneng nan-omlai seng, ama’n nangni a-ompui sik chei. Nangni’n ama nanjong inchu, amanhmu sik chei, tâk-kha nan-inhesōt inchu, ama’n adahlon sik chei.

³Pha kasôttak Israel in akadik Pathen kasea, an-inthei sik thempu kasea, khana dân kasea leika-om jo hei.

⁴Tâk-kha inrengna kha ajongtlung pha, Israel Pathen RŌNGPU hneng inhe hei. Anmani’n ama anjong khana anhmua kae.

⁵Khava pha khan chu tûte inkhat in inhuktak a se leh hong tlotor mak hei, ajârchu inrengna leh bōina ramtina leikasōk a kae.

⁶Jât inkhat in jât inkhat chunga asuk manrim, khōpui inkhat in khōpui inkhat asuk manrim, ajârchu Pathen in anchunga inrengna leh inrimna kha ahei rôn jo kae.

⁷Tâk-kha nangni chu akangar sik chei kae khana malung tlâkna nantanei mak sik kae. Nanṭōn tlo kha tloman a’npek sik kae.”

⁸Oded sapa Azariah ṭongsân kha Asa’n athei pha, malung ngarna anei jo. Judah leh Benjamin ram shunga leh Ephraim tlângram heia limsyem rakip hei kha ahlon sōt jo hei. Ama khan Bek-inn sumpuk a akangir RŌNGPU maichâm kha asyem manthersa a kae.

⁹Mi katamtak Ephraim, Manasseh leh Simeon a inphut, khana arengram shunga aka-om hei kha Asa langting hongkangir jo hei, ajârchu RŌNGPU’n ama a-ompui kha anhmua kae. Asa’n anmani ankhenga khana Judah leh Benjamin mihei kha abek mantûp hei.

¹⁰Anmani Asa reng changna kum 15 tlukna thla 3 Jerusalema le’ntûp hei.

¹¹Khava ning anmani’n neinâk anta heichomsōt heia inphut RŌNGPU hneng inthoina antōksōt a kae: sehrat 700 leh kemōng 7,000.

¹²Anmani’n intepna inkhat ansyem khana khan RŌNGPU, anpu sōnhei Pathen kha anmalung leh anratha pumkhat a kamukna sik a inhnōmtō hei.

¹³Tu inkhat, kater a-emak leh naipang, nuhmei a-emak leh pase, ama inmukmak kha that sik kae.

¹⁴Kare kasōktak a RŌNGPU rahminga intepna kha nitna sik antlosōt jo, khava sōa ka-ông heia pengkun antum jo.

¹⁵Judah mi rakip inpâk jo hei ajârchu hiva intepna hi anmalung pumpuia antasyem jo kae. RŌNGPU kamukna khan anmani kahōi ansak jo, khana ama’n arahlâng heia ramkei rakip a mōngna apek jo hei.

¹⁶Reng Asa khan api Maacah kha rengnu anu changna ṭōnhmun a inphut alosōt jo, ajârchu amanu hin vonchoi theina pathennu Asherah mater ka-om limsyem inkhat asyema kae. Asa’n limsyem kha atuktana, atuk rachen a Kidron Phaichama ahar-ahak hei kha hmeia aro hei.

¹⁷Asa khan ram shunga khōvelhei kamukna hmun rakip asuk manhmang mak he’num, ahringkhō katlung bit a RŌNGPU hnenga ṭong kajui leikachanga kae.

¹⁸Apa Abijah’n Pathen hnenga aleitōksōt neinâk rakip, khana ama tatōksōt sana leh dangka neinâk-hei kha ama’n Bek-inn shunga ada hei.

¹⁹Ama vairôn kum 35 atluk mak hma seng re leh sha heite leisōk mak a kae.