Read Komrem THUHMINGHEI INHNINA 16 Bible Online

THUHMINGHEI INHNINA 16 - Komrem bible

THUHMINGHEI INHNINA 16

¹Judah Reng Asa vairôn kum 36 tlukna, Israel Reng Baasha khan Judah chunga re aleisō khana Judah ram shunga se leh hong khârna sik a Rama kha rekur atukkhum joa kae.

²Khava jâra Asa khan Bek-inn leh reng-innpui shunga sana dangka alosōt heia Damascus a ka-om Syria Reng Benhadad hneng hiva ṭong manrônna leh inṭhōia aleitir:

³“Nipahei taleitlo kapōa, eini inthlop rih. Hiva sana leh dangka hi nang sik a kutchoi kae. Tûnchu Israel Reng Baasha hin aremihei kei ramṭhen shunga inphut alosōtna sik a ama leh nan-inthlop kha bâng jo roh.”

⁴Benhadad khan Asa mantlukna kha kahnōm joa aremi hlamkakeihei leh aremi rup-hei Israel khōpuihei chunga re kasō sik atir jo hei. Anmani’n Ijon, Dan, Abel Beth Maacah, khana sâk leh in manbukna Nephtali khōpui rakip anlosō jo.

⁵Omchen kasōk kha Reng Baasha khan athei pha, ama’n Rama rekur atukkhum kha kahai joa adahlon jo.

⁶Khava sōa Reng Asa khan Judah ram pumpuia inphut mi akhôm mantûp heia Rama rekur syemna Baasha taleihmang hlung leh thing hei kha aman rathak hei, Geba leh Mizpah khōpuihei khârna ahmangchâk hei.

⁷Khava pha khan sânkathem Hanani Reng Asa hnenga kasea ati, “Nang in na-Pathen RŌNGPU hnenga in-ngai sik kanek a Syria reng hnenga na’nngai jâra, Israel rengpa remihei kha nanga inphut katlânsōt jo hei.

⁸Ethiopia leh Libya remihei kha shakor gâri leh shakor katôr remi katamtak antanei hei changmak mo? Tâk-kha nang in RŌNGPU hneng na’nngai jâra anmani torna kha aleipek che kae.

⁹Pathen in vânhnōi pumpui a-en ṭhak, ahnenga malungtak a aṭong kajuihei kha rathahrat pekna sik a atlo. Nang chu kamotak a ṭōn natlosōt jo, khava jâra tûnna inphut chu re rōk nathōk sik jo kae.”

¹⁰Hiva ṭonghri jâra hin Asa kha ahnuk kana hêr joa ama kha akhit a ada joa kae. Hiva phalai hin kae Asa khan mi ṭhahrep êng kasetak a aleirazen hei kha.

¹¹Asa vairôn shunga omchen kasōk a’nphutna leh a’nchaina akhenga Judah leh Israel Renghei Thuhming Rabu shunga inzet hei.

¹²Asa khan kum 39 reng achang shunga, ama kha nat kasetak in ake amankhoipek jo; tâk-kha khava katlunga’m RŌNGPU hneng hong inhe mak a thempuhei hneng inzenna aneia kae.

¹³Kum 2 sōa ama kathi jo

¹⁴khana ama’n abinga amankhōr David khōpuia hlung thlân shunga anhre jo. Anmani’n bero leh marim katui thai anhmanga ataksa hrena sik antlo, ama thina ṭajai suina sik a hmei kalentak anmansûk a kae.