Read Komrem THUHMINGHEI INHNINA 17 Bible Online

THUHMINGHEI INHNINA 17 - Komrem bible

THUHMINGHEI INHNINA 17

¹Jehoshaphat in apa Asa kha athlenga reng kachang jo khana Israelhei kanek a ama omje amanngar chet a kae.

²Ama’n Judah hei rekur tukkhum khōpui heia, Judah hei khō leh ven heia, khana Asa taleihlō Ephraim ramṭhen shunga khōpui heia remi rup aleimatung hei.

³RŌNGPU’n Jehoshaphat kha mahâmṭhat apek, ajârchu ama’n apa hringkhōa ahma kakei omchen kha aleijuia Baal kamuk mak a kae.

⁴Ama’n apa Pathen kha arazen, Pathen ṭongpek kha ajui, khana Israel renghei kapōa ṭōn kaṭhamak tlomak a kae.

⁵RŌNGPU’n Jehoshaphat kha Judah rengram chunga torna ratha apek jo, mi rakip in ahnenga kutchoi anheirôn pek, khava jâra ama kha mikahao leh kaja ka-om tak hongkachang jo.

⁶RŌNGPU razenna chunga ama’n inlensakna anei khana Judah ram shunga khōvel kamukna hmun rakip leh Asherah pathennu limhei kha asuk manhmangsō hei.

⁷Ama vairônna kum 3 changna shunga athōia ṭōnkarônhei hi Judah khōpui heia mi inthei sik a aleitir hei: Benhail, Obadiah, Zechariah, Nethanel, khana Micaiah.

⁸Anmani kha Levi 9 leh thempu 2 he’n anleijui hei. Levihei kha Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobija, khana Tobadonija hei kae; khana thempuhei kha Elishama leh Jehoram hei kae.

⁹Anmani’n RŌNGPU Dân Rabuk anchoia Judah khōpui rakip antlâk a kase hei, mipui anmanthei hei.

¹⁰RŌNGPU’n khava kimvea rengram rakip hei kha Jehoshaphat chunga re dōi sik kha ṭitna aleimannei hei.

¹¹Philisti ṭhahrep he’n Jehoshaphat hnenga dangka leh kutchoi ralak katamtak anheichoi pek, khana Arab ṭhahrep he’n kemōng 7,700 leh ke 7,700 anhei keipek.

¹²Khava jâra Jehoshaphat kha ratha ahongnei chet-chet jo. Judah ram pumpuia rekur atukkhum hei khana khōpui aleisyem hei,

¹³khava shunga sâk leh in katamtak anleibuk heia kae. Jerusalema apui karôn ṭōnkarônhei kha amatung hei,

¹⁴anphung et dungjuia. Adna kha Judah phungṭhena rerup hlamkakei kae, ama thōia remi 300,000 anei hei.

¹⁵Inhni changna apui karôn Jehohanan khan remi 280,000 anei hei,

¹⁶khana 3 changna apui karôn Zichri sapa Amasiah khan remi 200,000 anei hei. (Amasiah khan RŌNGPU razenna sik a abinga inpek sōt a kae.)

¹⁷Benjamin phungṭhena inphut rerup hlamkakei kha Eliada kae, pho leh the a’nvon remi 200,000 hei hlamkakei rahming kanei remi kae.

¹⁸Ama 2 changna hlamkakei kha, kaṭhatak a revon invon mi 180,000 kanei Jehozabad kha kae.

¹⁹Hiva remihei hin Jerusalema reng anrazen khana hiva chunga remi ralak-hei kha rekur tukkhum Judah khōpui heia matungna anei hei.