Read Komrem THUHMINGHEI INHNINA 18 Bible Online

THUHMINGHEI INHNINA 18 - Komrem bible

THUHMINGHEI INHNINA 18

¹Judah Reng Jehoshaphat kha anei ahao joa arahming ahong inthang jo pha, ama’n Israel Reng Ahab innshung leh ama innshung jōr inlona aleisyema kae.

²Kum ṭhahrep sōa Ahab inhmupui sik a Samaria vakase. Jehoshaphat leh aloihei seng kajana malârna sik a, Ahab in kemōng leh sehrat katamtak revei sik a athat hei. Ama’n Jehoshaphat hnenga Gilead ram a ka-om Ramoth resōna chunga a’nveina sik a aleingek.

³Ama’n angêk a, “Ramoth resōna kei leh akase sik me mo?” ati. Jehoshaphat in amasôn, “Nang in na’nrin pha khan sena sik a kei leh kamihei intluk a ka-om jo ung. Keini’n kanbôm sik che.”

⁴Khava sōa ahrisa, “Tâk-kha ahma kakeia RŌNGPU hnenga der hi rih.”

⁵Khava jâra Ahab in sânkathem 400 kapō hei kha abek heia ader hei, “Kei akase enga Ramoth re kasō sik mo, kasō mak sik mo?” Anmani’n anmasôn, “Re sō roh. Pathen in torna apek sik che.”

⁶Tâk-kha Jehoshaphat in ader, “RŌNGPU hneng dertheina sik a sânkathem alak om mak jo mo?”

⁷Ahab in amasôn, “Imla sapa Micaiah inti inkhat chu laka-om. Tâk-kha ke’n kamater, ajârchu ama’n kei sik ṭong kaṭha heite sânphung mak; ahei tik a akaṭhamak rōk ahria kae.” Jehoshaphat in amasôn, “Nang in khanga nahri mak sik kae.”

⁸Khava jâra Reng Ahab in reng inna ṭong karônpa abek a, ama kha ase leh Micaiah kha inrangtak a ajōngna sik avakabek sik a amanthei jo.

⁹Samaria kekot vângtinga saphōr hmun a anreng in-ongna et chunga in-ong jo hei, khana sânkathem rakip in anmani 2 hmaikunga ṭong ansân jo.

¹⁰Ankâra inkhat, Chenaana sapa Zedekiah khan thir raki asyem heia Ahab hneng ati, “Hivahi RŌNGPU tahri kae, ‘Hiva sharaki vâng hin Syriahei nasuk sik hei khana pui katluktak a nator sik hei.’ ”

¹¹Sânkathem ralak-hei kha’num in-angtlinga anleihri. Anmani’n anti, “Ramoth kadōi sik a se roh, nang in nator sik. RŌNGPU’n torna kha apek sik che.”

¹²Khava pha, Micaiah kaṭhōi sik a avakase ṭōnkarônpa khan ahnenga ati, “Sânkathem ralak seng in rengpa hmesōna sik a ansânsōt jo, nang um khanga nasânsōt inchu kaṭha sik.”

¹³Tâk-kha Micaiah khan amasôn, “Akahring RŌNGPU rahminga ka-Pathen mantheina seng rōk kha ke’n kahri sik!”

¹⁴Reng Ahab hma kunga a’nlâr pha, rengpa khan ahnenga ader, “Micaiah, Reng Jehoshaphat leh kei hi Ramoth re kasōa akase sik ung mo, akase mak sik ung mo?” Micaiah’n amasôn, “Re sō ruh! Nantor sik a kae. RŌNGPU’n hmesōna apek sik chei.”

¹⁵Tâk-kha Ahab in amasôn, “Nang in RŌNGPU rahminga kahnenga ṭong nahri pha, akadiktak kha hri roh! Khavakha hmun heija mo nahnenga kahri sik?”

¹⁶Micaiah’n amasôn, “Ke’n Israel remihei kha hmebung heia ankakhem kase kemōng kapōa a’nchekchai kahmu hei. Khana RŌNGPU’n ati, ‘Hiva mihei hi hlamkakei neimak hei; an-ina kamōnga inle hei rasoh,’ ati.”

¹⁷Ahab in Jehoshaphat hneng ati, “Ama hin kei sik a akaṭha ahei tik a hrimak; akaṭhamak rōk ahri kae tia kamanthei jo che kha kae!”

¹⁸Micaiah khan ahrisa: “Tûnchu RŌNGPU’n heimo ahri kha rangei roh! RŌNGPU’n marvâna areng in-ongna a’n-ong kha kahmu, angeva rakip he’n asira kangir hei.

¹⁹RŌNGPU’n ader hei, ‘Ahab in Ramoth a asena sik, khana khan mihe’n anhei thatna sik, ahnenga tu’n mo avahōn sik?’ Ngeva ṭhahrep he’n ṭong inkhat anhri, ṭhahrep he’n ṭong ralak anhri,

²⁰rathla inkhat ahei sōksōt mak lai seng khanga anhri, ama khan chu RŌNGPU hneng aheijōna ati, ‘Ke’n kahōn sik.’ RŌNGPU’n ader, ‘Heikhonga?’

²¹Rathla khan amasôn, ‘Kei kase sik eng khana Ahab sânkathem rakip maleisei kamanjôm sik hei.’ RŌNGPU’n ati, ‘Se’na ama vahōn jo roh. Nang in hme nasō sik.’”

²²Khana Micaiah khan achaina ahri, “Omchen kasōk kha hi kae. RŌNGPU’n hiva nang sânkathemhei hi nahnenga maleisei amanjôm hei kae. Tâk-kha ama khet khan chu nang inrengna nathōk sik a ṭong akam jo kae!”

²³Khava sōa sânkathem Zedekiah kha Micaiah hneng asora ahmaia akaben pek jo, khana ader, “Heitik khan mo RŌNGPU rathla khan kei hi adahlon enga nang hnenga ṭong avahri?”

²⁴Micaiah khan amasôn, “Nang in kahnungtinga innden shunga inthupna sik nase pha namanhret sik.”

²⁵Khava pha Reng Ahab in aṭōn karôn inkhat kha ṭong apek, “Micaiah kha sur roh khana Amon khōpui vaikarônpa hnenga leh rengsapa Joas hnenga ṭhōi roh.

²⁶Ama hi kurkhum shunga hlon manhlutna sik, khana kahong inlemak kârseng buhlom leh tui vâng rōk a veina sik a manthei hei roh.”

²⁷Micaiah khan ka-ônga ahri, “Nang kahringa nahong inle achang inchu, RŌNGPU’n kei hnenga ṭong ahri mak kachang sik jo!” Khana ama’n ahrisa, “Kaṭong hri hi mi rakip in rangei ruh!”

²⁸Khan chu Israel Reng Ahab leh Judah Reng Jehoshaphat kha Gilead a ka-om Ramoth khōpuia re kasō sik a kase jo hei.

²⁹Ahab in Jehoshaphat hneng ati, “Re shunga nise pha kei chu kahme milak inhlem sik eng, nang chu nareng von hei kha invon roh.” Khang’khan Israel reng khachu ahmelak inhlema rehmun a leikase.

³⁰Syria rengpa khan ashakor gâri hlamkakeipa hneng Israel reng tei loa alak inkhatbek anbuhlu makna sik a ṭong pekna aleinei.

³¹Anmani’n Reng Jehoshaphat kha anhmu pha anmani’n ama kha Israel reng kae tia anmandon joa, ama indōipui sik a kahong jo hei. Tâk-kha Jehoshaphat khan vōi khat ka-ôngsōt a kae, khana RŌNGPU Pathen khan ahuksōt a ahnenga dōina kha amahesōt pek jo.

³²Shakor gâri hlamkakeipa khan ama kha Israel rengpa changmak ti hi amanhret pha, ama kha hnongmak jo hei.

³³Vângṭhat inkhat a, Syria remi inkhat in Reng Ahab revon dâr inmatnatak a the vâng akâp masuk jo. Ama’n shakor gâri katôrpa hneng, “Kei intôn jo eng!” tia hong ka-ông jo. “Inhe inna rehmun a inphut akeisōt jo roh!” aleiti.

³⁴Re kha a’nhnak lai seng khan chu, Reng Ahab kha ashakor gâri chunga Syriahei dōina aleibôm heia kae. Kani atlâk jo pha ama kha kathi jo.