Read Komrem THUHMINGHEI INHNINA 2 Bible Online

THUHMINGHEI INHNINA 2 - Komrem bible

THUHMINGHEI INHNINA 2

¹Rn Solomon in RŌNGPU kamukna sik a bek-inn khana ama reng-innpui sakna sik a amantluk jo.

²Neinâk rathakna sik a mi 70,000, hlung mankhorna ṭōn katlo sik a mi 80,000 amanrōi jo hei. Khana khan ṭōntlo ka-en lele sik a mihlop 3,600 ka-omsa hei.

³Solomon in Tyre reng Hiram hneng ṭong amanrôn: “Keipa David leh inveina naleitloa, cedar thingtlōnhei areng inn sakna sik a nalei jōrpek kapōa kei le’m inveina tlo rih.

⁴Ke’n RŌNGPU ka-Pathen kajana bek-inn inkhat kasak a kae. Hivahi hmun intheng, kei leh kamipui he’n marim katui maru-marâng rona, buhlom intheng injônjet a tōkna, jîngkâr khōhleia ro-inthoina tōkna kha leh inṭhōia Châmhngat kani, Thlather reveihei leh RŌNGPU kan-Pathen kajana kani intheng ralak ninga inthoina hmun akachang sik kae. Ama’n hivahi ahei tik a antlo thakna sik Israel hneng ṭong apek kae.

⁵Ke’n bek-inn kalentak sak sik a intluk eng, ajârchu eini Pathen hi pathen ralak-hei kanek a kalen chet a kae.

⁶Kha’num tûte inkhat in Pathen sik a bek-inn akatluk hrep sak tor mak ning, ajârchu marvân hmun karōk bek hinum ama chu kentor mak ning. Kha achang inchu heikhong inmo ke’n Pathen hnenga bero ro mankhutna hrep sik kakhea bek-inn kasak tor sik?

⁷Tûnchu ret kahem inzet kathemhei, sana, dangka, sum-êng ṭōn katlo thei hei, khana vapuirei, aka-êng, leh akasen lâr kanei pōn akasyem thei mi ahei tir pek roh. Khava mi khan kapa David takadeisōt Judah leh Jerusalema kut kathemhei leh ṭōn antlosap sik.

⁸Nang thingṭōn katlo mistrihei kha heituk a akathemhei mo ti kha ke’n kamanhret, achang jâra Lebanona cedar, cypress, leh juniper thingtlōnhei kha ahei tir pek hei roh. Namihei inthōpui sik a kei mi kahei tir sik hei

⁹thingtlōn katamtak kasui sik a, ajârchu ke’n sak sik a kamantluk bek-inn hi akalen leh akalûr sik kae.

¹⁰Nang thingṭōn katlohei sâk leh in sik a, gehu ton 2,000, satun ton 2,000, ju litre 400,000, khana olive thai litre 400,000 kahei tir sik.”

¹¹Rn Hiram in Solomon hneng masônna chithi ahei manrôn. Hinga amazet, “RŌNGPU’n amihei alungset jâra, ama’n nang anreng sik a akadei jo che.

¹²RŌNGPU Israelhei Pathen, marvân leh ralei kasyempa kha choi ka-ânna om rasoh! Ama’n Reng David hneng manhretna leh themna kasip phet, tûn RŌNGPU sik a bek-inn sakna sik a leh abinga sik a reng-innpui sakna sik a a’ntluk, sapa kasing tak kha apek jo.

¹³Ke’n mikasing leh thir ṭōn kathemtak arahming Huram inti hi nahnenga kahei tir.

¹⁴Ama nu hi Dan phunga jōr inkhat kae, khana apa chu Tyre mi kae. Ama’n sana, dangka, sum-êng, thir, hlung leh thinga inphut ret syemdân amanhret. Ama’n vapuirei, aka-êng, leh akasen pōn lâr hei khana hruipōn innem syemna ṭōn atlo tor. Ama hi ret hem-rabekna rakip leh syem sik a ahnenga mansena rakip kha ajuitor. Ama hi nang mi kut kathemhei leh napa Reng David leh ṭōn alei katlosap hei kha leh inṭangsap hei rasoh.

¹⁵Achang jâra tûn nang intepna kapōa gehu, satun, ju, olive thai kanhnenga heitir jo roh.

¹⁶Lebanon tlânga inphut namadu cedar thing kantuktan sik, phôp kansyema kankhit manchun heia tuipuia Joppa katlunga kanhei tôr sik. Khava hmun a inphut Jerusalema nan-inchoi thei sik.”

¹⁷Reng Solomon in Israel ram shunga ram hlop mi aka-om rakip, apa David in aleitlo kapōa mija atei jo. Khana khan ram hlop mi 153,600 leika-om hei.

¹⁸Mi 70,000 hei kha neinâk rathakna sik a khana 80,000 hei khan tlângrama hlung kakheng sik a amanngan hei, khana ṭōn kha kaṭhatak a antlona sik a aka-ensui sik a mi 3,600 akadei hei.