Read Komrem THUHMINGHEI INHNINA 20 Bible Online

THUHMINGHEI INHNINA 20 - Komrem bible

THUHMINGHEI INHNINA 20

¹Pha chomkhat sō leh Moab leh Ammon remi he’n anmani inthloppui, Meun hei leh Judah chunga re ansō jo.

²Ṭongkarôn ṭhahrep kahong heia Reng Jehoshaphat hnenga phôngsōtna annei: “Nang kabuhlu sik a Tuipui Kathi rekhat tinga Edoma inphut remi katamtak kahong jo hei. Anmani’n Hazazon Tamar anhlōsō jo.” (Hivahi Engedi rahming hlop inkhat kae.)

³Jehoshaphat kha ṭit-inpirna aneia RŌNGPU hneng inthōpuina sik ader. Khava sōa ram pumpuia buhngōina sik a ṭong masōna anei.

⁴Judah khōpui rakip a mihei kha inranga Jerusalema kase heia RŌNGPU mansena anvader,

⁵anmani leh Jerusalema mipuihei Bek-inn sumpuk athera khan intûp jo hei. Reng Jehoshaphat kha anhmating vakangira

⁶kare inhnaktak a ader, “O RŌNGPU kanpu sōnhei Pathen, nang in vânhnōia jât rakip chunga marvâna inphut vai najōng rôn hei. Nang chu ratha hratna leh torna katluk a nanei, tu inkhat in dōi tor mak tin che.

⁷Nang keini Pathen che kae. Nami Israel he’n hiva ram shunga anlônle pha, khana aleika-om mipuihei kha nahnong sōt heia ram kha naṭhōnpa Abraham sōnhei hnenga ahei tik a ankarōi sik a napek hei.

⁸Khana khan anmani ka-om heia nang kajana bek-inn ansak

⁹anmani karâkna sik anchunga insuk inhmangna ajōngtlâk pha — re, hrise, vonṭâm hei asōk pha, anmani khava nang kamukna Bek-inn hma khan kahong sik heia kha vakangir sik hei ti hi anmanhret a kae. An-inrengna heia nahnenga ander theina sik, khana nang in nathei pek heia khana nahukna heia kae.

¹⁰“Tûnchu Ammon, Moab, khana Edom he’n re anbuhlu jo ung. Kanpu sōnhei khan Egypt a inphut anheisōk pha, khava ramheia anhlut sik hnōmpek mak hei che, khava jâra kanpu sōnhei khan ankimvea injôk heia leisukset mak hei.

¹¹Hivahi kanchunga anphuhlōna kae, nang in napek ung ram hinna inphut kan kahnong sōt sik a anmani kahong jo hei.

¹²Nang keini Pathen che kae. Karâkna pek hei roh, keini kabuhlu remi katamtak hei hmaikunga keini heite tlotor mak jo ung. Keini heimo tlo sik manhret mak ung, kha’num inthōpuina madu jâra nang langting kanhei en che.”

¹³Judah mi rakip, annuhmei leh ansahei, Bek-inna khan kangir hei.

¹⁴Mipui kâra aka-om Levi inkhat chunga RŌNGPU rathla jōng kaṭum. Ama rahming kha Zechariah sapa Jahaziel inti; ama kha Asaph phungṭhen mi kae khana ama kha Asaph sōnhei Mattaniah, Jeiel khana Benaiah heia inphut ajōng kakōn kae.

¹⁵Jahaziel in ati, “Reng Kalûr, khana Judah leh Jerusalem mipui rakip, hiva remi katamtak hei indōipui sik a nanmalung mathlâk mak ruh khana ṭitna neimak ruh tia RŌNGPU’n ahri. Re kha Pathen tatlo sik kae, nangni tatlo sik changmak.

¹⁶Ajîng kania anmani’n ramri rakanna Ziz a anheitlung pha buhlu hei ruh. Nangni’n anmani kha Jeruel hnenga ramhâng sena phaicham hmora nanratō sik hei.

¹⁷Hiva re hi nangni tatuk sik changmak. Nan-omna hmun rōk kha inhlō unna hngâk hnâm hei ruh; RŌNGPU’n retorna apek sik chei kha nanhmu sik. Judah leh Jerusalem mihei, inkei-chiona khana ṭitna neimak ruh. Re sik a sesōt jo ruh, RŌNGPU’n a-ompui sik chei!”

¹⁸Khava sōa Reng Jehoshaphat kha inkuna, ahmai in ralei amantôn, khana ama leh inṭhōia mi rakip inkun jo hei khana RŌNGPU ankamuk jo.

¹⁹Kohath leh Korah phungṭhena Levi mihei kha kangir heia kare inhnaktak a Israelhei Pathen RŌNGPU choi ka-ânna annei jo.

²⁰Abâna jîngkâr hmatak a mipuihei kha Tekoa hnenga ramhânga kasōk jo hei. Anmani se anphut pha, Jehoshaphat in hiva ṭong vâng hin mansena anei hei: “Judah leh Jerusalem mipuihei! Nan-Pathen RŌNGPU hnenga nantaksenna kha da ruh, khan chu nanraleia khan kangirtor sik chei. Ama sânkathemhei mantheina chei kha taksen ruh, khan chu hme nansō sik.”

²¹Mipuihei leh inbektō sōa, rengpa khan hlakasak hei kha rōi intheng tlona shunga anngaia anret hei kha invonna sik khana remihei hmating hla sakpuma ansena sik ṭong apek hei: “RŌNGPU kha manpâk a om rasoh! Ama lungsetna khachu kumsôt a sik kae!”

²²Anmani’n hla kha ansak pha, RŌNGPU’n re heikasō remihei kha inhmakna amannei jo hei.

²³Ammon leh Moab-hei khan Edom remihei chunga ansō heia pui katluk a ansuk manhmang jo hei, khava sōa anmani leh anmani rahnak a intuk nôk jo hei.

²⁴Judea remihei khan nêrdiram a akangir ber inkhat hnenga antlung pha, an-inrepuihei kha an-en hei pha anmani kha raleia katlupet heia akathihei kha anvahmu hei. Tûte inkhat tlânsōt mak hei.

²⁵Jehoshaphat leh aremi rup-hei anneinâk chom sik a kahlut heia sehrat katamtak, sâk leh in, pōn leh der, khana mankatam neinâk katamtak anhmusōt hei. Anmani’n neinâk-hei mantûpna ni 3 kahlut hei, tâk-kha neinâk atamrei jâra heirakip kha losōtor mak hei.

²⁶Nimanli changna anmani Beraka Phaichama intûp heia RŌNGPU ṭōntlo rakip chunga manpâkna aneia kae. Khava jâra phaicham kha “Beraka” tia anphō jo.

²⁷Jehoshaphat khan aremi rup-hei kha re atorpui heia Jerusalema aṭhōi male hei, ajârchu RŌNGPU’n anmani indōipuihei kha ator jo heia kae.

²⁸Anmani’n khōpui atlung pha, Bek-inna serângdâr leh pengkun manhring pum a injôk heia kae.

²⁹RŌNGPU’n heikhonga mo Israelhei inrepuihei ator hei tia ṭong kathei jât rakip in ṭitna annei jo,

³⁰hiva jâra hin Jehoshaphat kha kamōng tak a vai arôn tor a kae, khana Pathen in ramkei rakip a inhukna apek a kae.

³¹Jehoshaphat kha akum 35 aheitluk pha Judah reng le’nṭang khana Jerusalema kum 25 reng leikae. Anu kha Shilhi sanu Azubah kae.

³²Ama hma a apa Asa taleitlo kapōa, RŌNGPU hmit-hmua akaṭha kha aleitloa kae;

³³tâk-kha khōvelhei kamukna hmunhei khachu suk manhmang mak heia kae. Mipuihei khan anmalung pumpuia anpu sōnhei Pathen kamukna sik a hong inhe mak hei.

³⁴Jehoshaphat in aleitlo rakip, avairôn a’nphutna inphut achaina katlung, Israel Renghei Thuhming ṭhen khat, Hanani Sapa Jehu Thuhming Rabu shunga inzet a kae.

³⁵Pha khat a Judah Reng Jehoshaphat in Israelhei Reng Ahaziah, ṭhatmak katamtak katlopa leh inthlopna aleinei.

³⁶Eziogeber tui ṭhumhmuna tuipuia akase sik rakōng anleisyem hei.

³⁷Tâk-kha Mareshah khōpuia Dodavahu sapa Eliezer khan Jehoshaphat kha ṭong aleipek, “Nang in Ahaziah leh inthlopna nanei jâra nang tasyem rakōng kha RŌNGPU’n asuk manhmang sik kae.” Khana rakōnghei kha kakōi heia intôr hêrmak jo hei.