Read Komrem THUHMINGHEI INHNINA 21 Bible Online

THUHMINGHEI INHNINA 21 - Komrem bible

THUHMINGHEI INHNINA 21

¹Jehoshaphat kathi jo khana David khōpuia renghei thlâna anhre jo khana asapa Jehoram in athlenga reng kachang jo.

²Judah Reng Jehoshaphat sapa Jehoram khan a-u leh nai 6 anei hei: Azariah, Jehiel, Zechariah, Azariahu, Michael, khana Shephatiah.

³Anmani pa khan sana, dangka, khana aralak mankatam karōihei anhnenga asempek hei, khana anmani inkhat et rekur tukkhum Judah khōpui inkhat et a aka-ensuia ada hei. Khana Jehoram kha upapen achang jâra Jehoshaphat khan ama kathlenga amatung jo.

⁴Jehoram khan rengram kha kahnet a amatu jo pha, a-u leh anai seng khana Israel ṭōnkarônhei kha’m athatpet jo hei.

⁵Jehoram kha akum 32 atluk pha reng kachanga, Jerusalema kum 8 vai aleirôn.

⁶Ahab sanu inkhat aleiompui jâra Reng Ahab leh Israel reng ralak-hei ṭhatmak chôndân kha aleijuia kae. RŌNGPU dōina setna aleitlo,

⁷tâk-kha RŌNGPU’n David reng hrui hei kha manhmang sik a madu mak, ajârchu ama’n David leh intepna aleisyem khana ama sōn he’n ahei tik a vai antarôn manjôn sik a le’ntep a kae.

⁸Jehoram vairônna pha shunga Edom in Judah chunga re aleituk khana ning leh hnōma aka-om rengram inkhat kachang jo.

⁹Khava jâra Jehoram leh ama ṭōnkarônhei kha shakor gâri vânga kasōk heia Edom chunga re anvasō jo. Khana khan Edom remihei khan anke khum jo hei, kha’num jân pha shunga anmani khan hlam ansuktana katlânsōt hei.

¹⁰Khava pha khana inphut Edom kha Judah a inphut ning leh hnōma hong ka-om jo. Hiva pha shunga hin Libnah khōpui khan re aleitlo nôk, ajârchu Jehoram khan apusōnhei Pathen, RŌNGPU kha leidon mak heia kae.

¹¹Judea hmun inshâng heia ama’n khōvelhei kamukna hmun kapha aleisak hei khana Judah leh Jerusalema mipuihei kha RŌNGPU dōina setna tlona aleiṭhōi jo hei.

¹²Elijah sânkathem khan Jehoram hnenga chithi aleitir, hing’hin aleimazet: “Napusōn David Pathen, RŌNGPU’n masetna apek che ajârchu napa Reng Jehoshaphat khana napu Reng Asa chôndân kha juimak che.

¹³Khava kanek a, Israel renghei chôndân najui jo khana Ahab in Israelhei kha ṭong juimakna ting aleiching hei kapōa Judah leh Jerusalema mipuihei kha Pathen ṭong juimakna ting naching jo hei. Nang kanek a mikaṭha, na-u nanaihei kapha nathat jo hei.

¹⁴Khava kara khachu, RŌNGPU’n namihei, nasahei, nanuhmeihei inhnaktak a karâkna sik apek hei, nakarōihei asuk manhmang sik hei.

¹⁵Nangkhet um nat inhnaktak, ani katai akakhôk chet-chet sik kha nathōk sik.”

¹⁶Philisti leh Arab-hei ṭhahrep tuipui panga Ethiopia hei khō tlâkna hnenga ka-om hei. RŌNGPU’n anmani kha Jehoram dōina re amantlo hei.

¹⁷Anmani’n Judah chunga re antloa reng-innpui anchomsōt a kae, khana reng nuhmei rakip leh asapahei seng, asapa mathlum pen Ahaziah tei loa, alakseng khum mi sik a aleiṭhōi jo hei.

¹⁸Hiva rakip sōa, RŌNGPU’n rengpa chunga vonnat inhnaktak amanrôn jo.

¹⁹Kum 2 shunga nat kha hong kakhôk det-det jo, achaina chu rengpa kha malung kana tak a kathi jo. Amipuihei khan ama pusōnhei sik a leitlona kapōa ama ṭajai suina chu hmeipui mansûkna neimak hei.

²⁰Jehoram kha akum 32 atluk pha reng hongkachang khana Jerusalema kum 8 vai aleirôn. Ama athi pha tûte inkhat malung inreng leiom mak. Ama kha David khōpuia anleihre, tâk-kha renghei thlâna chu changmak a kae.