Read Komrem THUHMINGHEI INHNINA 23 Bible Online

THUHMINGHEI INHNINA 23 - Komrem bible

THUHMINGHEI INHNINA 23

¹Kum 6 khanga hngâkna a-omsōa Jehoiada thempu khan re dōina pha katluk jo tia amandon jo. Rehlam kakei 5 hei inpunna inkhat asyem jo: Jehoram sapa Azariah, Jehohanan sapa Ishmael, Obed sapa Azariah, Adaiah sapa Maaseiah khana Zichri sapa Elishaphat hei seng kae.

²Anmani kha Judah khōpui rakip a kalôn heia Levihei leh phungṭhen hlamkakei rakip Jerusalema anheiṭhōi hei.

³Anmani ankhenga Bek-inna intûp hei, rengpa sapa Joas leh intepna inkhat ansyem. Jehoiada khan ati, “Hinahin akathi jo rengpa sapa kha ka-om jo. Tûnchu ama hi RŌNGPU’n Reng David sōnhei sik a ale’ntepna dungjuia reng akachang sik jo kae.

⁴Eini tatlo sik kha hi kae. Thempuhei leh Levihei Châmhngat ninga ṭōn inzen sik a anhong pha, ṭhen thuma inkhat in Bek-inn kot kha antahrung sik kae,

⁵ṭhen khat in reng-innpui antahrung sik, khana aṭhen inkhat nôk in Innhmun Kot a matung sik hei kae. Mipuihei seng in Bek-inn sumpuk a a’ntûp sik hei kae.

⁶Ṭōnkatlo thempu leh Levihei teilo tûte inkhatbek Bek-inna akahlutmak sik hei kae. Anmani chu manthengsōt hei anchang jâra kahlut thei sik hei, tâk-kha mi ralak seng chu RŌNGPU mansena antajui sik khana vângting aka-om sik hei kae.

⁷Levihei khan rengpa kimvea anhrunga kangir sik hei, anchem anradok a rengpa sena rakip a anjui sik. Bek-inn shunga ahong kahlut mi rakip that sik hei kae.”

⁸Jehoiada mansena kha Levi leh mipuihei khan antlosōt jo. Châmhngat kani ning ṭōn katlohei kha anṭōnhlam a’nchai jo’num mansesōt mak jo hei, khana ṭōn katlo sik a ahong kahlut hei leh akasōksōt sik hei kha rehlam kakeihei khan ankhâmpet jo hei.

⁹Jehoiada khan Reng David pho leh kasei Bek-inn shunga aleida hei kha remi hlamkakeihei hnenga apek jo hei.

¹⁰Rengpa hukna sik a mihei kha chemjâm anradok a Bek-inn hmatinga akimve senga khan amatung jo hei.

¹¹Khava sōa Jehoiada khan Joas kha mipui intûpna shunga aheiṭhōisōt jo, alu chunga reng lukhu amankhu jo, khana reng invairônna lekha ahnenga apek jo. Khang’khan reng amanchang jo. Thempu Jehoiada leh asa he’n Joas kha thai anmanthi jo, khana mi rakip in ka-ông heia, “Rengpa ahringsei sôt rasoh,” anti.

¹²Athaliah khan mipuihei inpâk a anka-ông kha aleithei, khava jâra mipui intûpna Bek-innting inranga heikahong.

¹³Khana khan amanu’n Reng ather kha Bek-inn hlutna, rengpa sik a matungsōt kacho hnenga angir kha leh remi hlamkakeihei leh pengkun katum he’n antakakebit kha avahmu jo. Mipui rakip inpâktak a ka-ông heia pengkun antum jo, khana Bek-inna hlakasak rup he’n mahring kanei leh inṭhōia rōi kha hlam ankei jo hei. Amanu khachu inrimtak a apōn leh ader akei hlera hong ka-ông, “Reng dōina, Reng dōina!” ati.

¹⁴Jehoiada khan Athaliah kha Bek-inn kimvea that sik kha madu mak a rehlam kakeihei kha abek heia ahri, “Repa kahngâk agôra akangir hei kâra inphut vângting ṭhōisōt ruh, khana tu inkhat in amanu hukna sik aheitlo’nchu ama kha that ruh.”

¹⁵Anmani’n amanu kha ansur jo, reng-innpuia anṭhōi jo, khana Shakor Kekot a khan anthat jo.

¹⁶Jehoiada thempu khan Reng Joas leh mipuihei kha RŌNGPU mi changna sik a intepna shunga amanveisa hei.

¹⁷Khava sō leh ankhenga Baal bek-inna kase heia anvakei hlersō hei. Maichâm leh limhei kha anvōkkhōi hei, khana Baal thempu Mattan kha maichâmhei hma a anthat a kae.

¹⁸Jehoiada khan thempu leh Levihei kha Bek-inn ka-ensuia amanse hei. Anmani khan Reng David ṭōn mannganna hei dungjuia antlosōt sik, Moses Dân dungjuia RŌNGPU hnenga inthoina rona annei sik hei. Anmani hi hlasakna leh rōi shunga ṭōn mantlukna heia manngansa hei kae.

¹⁹Jehoiada khan Bek-inn kekot a repa kahngâk ada hei, beklanga a’nthengmak heimanhlut makna sik a antlo.

²⁰Remi ṭōnkarônhei, mipui hlamkakeihei, ṭōnpui karônhei khana mipui rakip Jehoiada anjuia rengpa kha Bek-inna inphut Reng-Innpuia anhei injôkpui. Anmani Kotpui heikahlut heia reng khan reng in-ongna ahmun kha ahlō jo.

²¹Mipui rakip inpâkna kasip jo hei, khana tûnchu Athaliah kha anthat jo jâra khōpui kha kadai hnger joa kae.