Read Komrem THUHMINGHEI INHNINA 24 Bible Online

THUHMINGHEI INHNINA 24 - Komrem bible

THUHMINGHEI INHNINA 24

¹Joas kha akum 7 tlukna Judah reng leikachang, Jerusalema kum 40 vai aleirôn. Anu kha Beersheba khōpuia Zibia kae.

²Jehoiada thempu ahring lai seng ama’n RŌNGPU tlaina aleitloa kae.

³Reng Joas sik a Jehoiada khan nuhmei 2 akadeipek, anmani khan sapa leh sanu anmatet pek.

⁴Pha bongkhat reng achangsōa, Joas khan Bek-inn syem manther sik a amandona kae.

⁵Ama’n thempu leh Levihei kha Judah khōpuia anse leh mipui rakip hnenga inphut kum a Bek-inn syem mantherna tlukna sik a sêr anṭheina sik a ṭong apek hei. Inranga ṭōn antlosōtna sik a ṭong apek hei, tâk-kha Levihei kha in-êng heia kae,

⁶khava jâra ama’n anhlam kakei Jehoiada abek a ader jo, “Heisa mo RŌNGPU sōkpa Moses’n RŌNGPU omna Pōn-inn razenna sik a ramsêrṭhei pekna sik mipui aleingek hei kha, tûnhin Levi he’n Judah leh Jerusalema ṭheina antanei hi nahmu pek mak hei.” (

⁷Nuhmei kaṭhamak, Athaliah kahnung kajuihei khan Bek-inn kha ansuk manset jo khana neinâk intheng katamtak Baal kamukna anleihmang jo.)

⁸Rengpa’n Levihei hneng thingbôm inkhat sêr mathlâkna sik ansyem leh Bek-inn kot kunga andana sik a ṭong apek hei.

⁹Anmani’n Pathen sōk Moses’n ramhânga ahma kakeia ramsêrṭhei aleiṭhei kapōa, Jerusalem leh Judah ram pumpuia mi rakip in RŌNGPU hnenga ramsêrṭhei anhei choina sik a anmani’n ṭong antir jo.

¹⁰Hiva tlona hin mipuihei leh anhlam kakeihei kha katlai jo hei, khana anramṭhei sêr kha anheichoia anthing bôm kha anmansip jo.

¹¹Ani katai Levi he’n thingbôm kha khava katinta rengpa ṭōnpui karônhei hneng anchoia kae. Khavakha asip jo akaia, reng innshunga a’nzet inhlut leh Thempu Kalen kahlang kathlenghei khan sêr kha anlosōt sik khana athing bôm khachu ahmun a anda male nôk sik. Khang’khan sêr katamtak ankhôm mantûp a kae.

¹²Rengpa leh Jehoiada khan sêr kha Bek-inn syem mantherna ka-ensuihei hneng anpek sik hei, anmani khan hlung kakheng hei, thingṭōn katlohei, khana thir ṭōn katlohei hneng syem mantherna sik a anpek sik hei.

¹³Ankhengpet a rahnak a ṭōn antlo, Bek-inn kha ahma kakei kapōa kangar tak a ansyem manther jo.

¹⁴Syem mantherna kha a’nchai jo pha, a’nhlei sana leh dangka kha rengpa leh Jehoiada hneng anpek jo hei, anmani’n hrai leh be leh bûr Bek-inn sik a ansyemna hei. Jehoiada kha ahring lai seng, Bek-inna inthoina injônjet a tōkna anleinei.

¹⁵Ahongter hêr joa akum 130 atluk jo pha kathi jo.

¹⁶Ama’n Israel mipuihei, Pathen khana Bek-inn sik a aleitlo ṭōn manhretna inkhat a David Khōpuia renghei thlâna anmani’n anleihre jo.

¹⁷Tâk-kha Jehoiada khan athia inphut chu, Judah hlamkakeihei khan anṭong kha Reng Joas in arangeina sik a anleijôr jo.

¹⁸Khang’khan mipuihei khan, anpu sōnhei Pathen RŌNGPU Bek-inna kamukna kha anleibâng jo, limsyem leh Asherah pathennu limsyem kamukna anleiphut jo. Hiva setna ṭhena khan Judah leh Jerusalem chunga RŌNGPU hnuk natna kha hong katlung jo.

¹⁹RŌNGPU’n anmani ahnenga anhong inlena sik a gîkna kapek sik a sânkathem aleitir hei, tâk mipuihei khan rangei hnōm mak heia kae.

²⁰Khava sōa Pathen rathla khan thempu Jehoiada sapa Zechariah kha amatu jo. Ama khan mipuihei tahmu theina hmun a kangira ka-ônga, “RŌNGPU Pathen in heisa mo aṭongpek nanta juimak khana nanbing chunga inrengna nanta mathlung tia ader chei! Nangni’n ama nandahlon, khava jâra ama’n nangni adahlon chei kae!” ati.

²¹Zechariah dōina marûk ṭōn mantlukna kha Reng Joas kha inveisa jo, khana rengpa ṭongpek a Zechariah kha Bek-inn sumpuk a hlung vânga anleidêng hlon jo.

²²Zechariah apa Jehoiada ṭong leipekna, reng innshunga ṭōn tlo sik ahlam kasōk hei kha rengpa khan amahngi jo heia, ama’n Zechariah kha aleithat jo kae. Zechariah khan athi pha, ama ka-ônga, “Nang in natlo kha RŌNGPU’n hmu rasoh khana karâk che rasoh!” ati.

²³Khava kum a ṭhekhō ahong pha, Syria remi he’n Judah leh Jerusalema re anleisō jo, hlamkakei rakip anthat jo hei, khana neinâk chomsōt hei kha Damascus a anchoi jo.

²⁴Syria remihei kha katlôm hei, tâk RŌNGPU’n akatamdet Judea remihei kha aleimantor hei, ajârchu anpu sōnhei Pathen RŌNGPU kha mipui he’n anleidahlon joa kae. Hing’hin Reng Joas kha karâkna inpek jo.

²⁵Ama kha rahnak a intôn jo, remihei kha ansesōtsō pha, ama ṭōnkarôn 2 hei khan intlukna anneia, Jehoiada thempu sapa aleithatna phuhlōna inkhat a ajekhum chunga ama kha anleithat jo. Ama kha David khōpuia anleihre, tâk-kha renghei thlânna chu changmak. (

²⁶Ama dōina ṭōn intluk hei kha Ammon jōr arahming Shimeath intinu sapa Zabad leh Moab jōr arahming Shimrith intinu sapa Jehozabad hei kha kae.)

²⁷Renghei Lekha Hri manchênna rabu shunga Joas sapa thuhming, ama dōina ṭongsân hei, ama’n heikhonga mo Bek-inn asak manther tina hei ka-om hei. Asapa Amaziah khan athlenga reng kachang jo.