Read Komrem THUHMINGHEI INHNINA 25 Bible Online

THUHMINGHEI INHNINA 25 - Komrem bible

THUHMINGHEI INHNINA 25

¹Amaziah kha akum 25 atluk pha reng hongkachang, Jerusalema kum 29 vai aleirôn. Anu kha Jerusalema Jehoaddin kae.

²Ama khan RŌNGPU tlaina ṭōn aleitlo, tâk-kha inkei-chio pum a aleitloa kae.

³Ama khan kahnet a ratha aheinei pha, apa aleikathat ṭōnpui karônhei kha athat jo hei.

⁴Achang inum ansahei chu leithat mak hei, tâk-kha Moses Dân a RŌNGPU ṭongpek kha ajuia kae khachu: “Ansahei ṭhena jâra annu leh anpa that mak sik hei kae, khana annu leh anpa ṭhena jâra ansa that mak sik hei kae; mihei hi ama ama set tlona rōk jâra that sik hei kae.”

⁵Reng Amaziah khan Judah leh Benjamin phung mi rakip hei kha remi rup a asyem jo hei, anphung ṭhen et dungjuia, mi 1,000 leh 100 rup-hei hlamkakei et amatung hei. Hinahin pase kum 20 leh achungting seng invei jo hei, ankhenga 300,000 hei kae. Anmani hi re sik a inrintak a aka-om, kasei leh pho hmangje akathem jo hei kha kae.

⁶Hiva chunga, ama’n remi 100,000 Israel a inphut dangka akahrik kilograme 3,400 apek heia aleineksa hei.

⁷Tâk-kha sânkathem inkhat rengpa hneng kasea ahnenga ati, “Hiva Israel mihei hi ṭhōi mak hei roh. RŌNGPU’n hiva Sak tinga Rengram mihei hi ompui mak hei.

⁸Anmani’n re shunga anmanhrat chet sik che tia namandon thei, tâk-kha retorna leh hmaimôkna pekna ratha kanei khachu Pathen kae, akinchu ama’n na’nrepuihei kha nang chunga mantorna amannei sik hei.”

⁹Amaziah khan sânkathem hneng ader, “Khan chu anhnenga khaseng dangka kaleipek jo khachu heikhonga sik jo?” Sânkathem khan amasôn, “RŌNGPU’n khava kanek a apek male tor che!”

¹⁰Khava jâra Amaziah khan aremi nek hei kha atir male jo hei, inna inlena sik a amanthei hei. Khan chu anmani inna inle jo heia Judah mipuihei chunga anhnuk kana hêr jo.

¹¹Amaziah khan malunga thouna aneia aremihei kha Chi Phaichama aṭhōi jo hei. Khana khan anmani re intuk heia Edom remi 10,000 anleithat hei

¹²khana ahlop a 10,000 anleisur heia kae. Khava rehring surmihei kha Sela khōpuia hlungkare chunga anṭhōi heia khana khan annam mathlâk heia, khava thōia hlung chunga anmani kha anthatpet jo hei.

¹³Khava shung senga khan Amaziah’n re shunga aleiṭhōimak Israel remihei khan Samaria leh Beth Horon kâra aka-om Judah khōpui heia re anleitlo joa mi 3,000 anleithat hei, neinâk katamtak anleichom jo.

¹⁴Amaziah khan Edomhei kha atorsō heia ahong inle pha khan chu, anmani milim ahei choi hei kha amatungsōt jo hei, akamuk jo hei, khana anhnenga bero aro joa kae.

¹⁵Hivahin RŌNGPU kha ahnuk anmannat jo, khava jâra sânkathem Amaziah kha atir jo. Sânkathem khan ati jo, “Heisa mo ram hlop pathen, nang ratha neina inphut anmihei kapha akahuk tor mak hei kha nakamuk hei?”

¹⁶Amaziah khan aṭong akhâra, “Heitik khana inphut mo nang hi rengpa mansena kanei sik a kantakadeisōt che? Naṭong hri bâng roh, achangmak inchu kathat sik che kae!” ati. Sânkathem kha kabâng jo, tâk-kha hivahi alahrisōt a kae, “Tûnchu nang in hiva rakip hi natloa khana kei mansena nadonmak jo jâra Pathen in nang manhmangna sik a amantluk jo ti hi kamanhret jo.”

¹⁷Judah Reng Amaziah leh ama mansena kaneihei khan Israel chunga ṭōn mantlukna annei jo. Khava sōa ama’n Israel Reng, Jehoahaz sapa khana Jehu tupa Jehoas hnenga ṭong aleitir, re intlona sik a aleihri.

¹⁸Jehoas khan hiva masônna hi Amaziah hneng aleitir, “Pha khat a Lebanon Tlâng heia rahlingbuk inkhat in cedar kung inkhat hneng ṭong aleitir: ‘Nasanu kha kei sapa hnenga ompui sik a apek roh.’ Ramsha inkhat kahonga rahlingbuk kha achōn rachi jo.

¹⁹Tûnchu Amaziah, Edomhei nator hei jâra nang inlensak che, tâk-kha kahri pek che kae na-inna omhnâm roh. Heisa mo inrengna kha namajōr ṭhak? Khava khan nang leh namipuihei sik a inrengna rōk ahei rôn sōt sik.”

²⁰Tâk-kha Amaziah khan ṭong kha leirangei mak a kae. Amaziah hmaimôk sik kha Pathen lungdo kae jo, ajârchu ama’n Edomhei limsyem akamuk a kae.

²¹Khava jâra Israel Reng Jehoas kha Judah Reng Amaziah re dōina vakase jo. Anmani Judah ram a Beth Shemes a intō hei,

²²Judea remihei kha antor jo hei, khana remihei kha an-innting katlânsōt jo hei.

²³Jehoas khan Amaziah kha asur joa Jerusalema aṭhōi jo. Khava pha ama’n khōpui bang Ephraim Kot a inphut Arakir Kot katlunga, metre 200 kaseia asuk mathlâk jo.

²⁴Bek-inn shunga sana leh dangka, Obed Edom sōnhei tahrung Bek-inn shunga hmangchâk-hei, khana reng-innpuia karōi achomsōt hei kha Samariating achoi jo hei. Ama’n rehring surmi aṭhōisa heia kae.

²⁵Judah Reng Amaziah khan Israel Reng Jehoas kha kum 15 hringsei kasôt akhea kae.

²⁶Amaziah’n aleitlo rakip, avai rônna a’nphut a inphut achaina katlunga Judah leh Israel Renghei Thuhming Rabu a inzet a kae.

²⁷RŌNGPU dōina re aleitlo pha khana inphut, Jerusalema ama chunga lungthim tlona leika-om joa kae. Achaina ama Lachish khōpuia katlân jo, kha’num a’nrepuihei khan anjuia anthat a kae.

²⁸Akalōng kha Jerusalema shakor chunga anchoia, David khōpuia renghei thlâna anvûm jo.