Read Komrem THUHMINGHEI INHNINA 26 Bible Online

THUHMINGHEI INHNINA 26 - Komrem bible

THUHMINGHEI INHNINA 26

¹Judah mipui rakip in Amaziah sapa kum 16 akatluk jo Uzziah kha apa kathlenga reng sik a ankadei jo. (

²Uzziah khan Elah khōpui ahlō nôk a asyem manther kha Amaziah thisōa kae.)

³Uzziah khan akum 16 atluk a reng hongkachang, ama’n Jerusalema kum 52 vai aleirôn. Anu kha Jerusalema Jecoliah kae.

⁴Apa omchen ajuia, ama’n RŌNGPU tlaina aleitloa kae.

⁵Ama beklanga mansena kaneipa Zechariah ahring lai seng chu ama’n RŌNGPU kha taksentak a arazen Pathen in mahâmṭhat apek a kae.

⁶Uzziah khan Philistihei dōina re aleitlo. Ama’n Gath, Jamnia khana Ashdod khōpuihei bang avōk khōipek hei khana Ashdod hnenga leh Philisti ram ralak a rekur tukkhum khōpui asyemsōt hei.

⁷Pathen in Philistihei, Gurbaal a aka-om Arab-hei, khana Meunihei torna sik a ale’nthōpuia kae.

⁸Ammon he’n Uzziah hnenga ramsêrṭhei anleipek, khana ama kha ratha aneihêr joa Egypt katlunga arahming leikase.

⁹Uzziah khan Jerusalema Arakir Kot a, Phaicham Kot a, khana bang rakir heia ber inshâng aleisyem heia rekur kha amanhnet chet a kae.

¹⁰Ramhâng heia rekur tukkhumna berte inshâng amatung hei khana tuikhur amankhōr hei, ajârchu tlaitlâk hmebung leh phaicham heia ran katamtak anei heia kae. Ajârchu hlei leh be thlōna aratha kahrok a mipuihei hneng hmebunghei leh ram thai omna vomhrui rahōn anthōna sik a amathok hei.

¹¹Ama’n re katlo sik a’ntlukdek remi katamtak anei hei. Khava mazet manhlutna lekha kha rengpa ṭōnkarôn mi Hananiah ensuina thōia, ama lekha inzet Jeiel leh Maaseiah he’n anda heia kae.

¹²Remihei kha ṭōnkarôn 2,600 he’n hlam ankei hei.

¹³Anmani thōia rengpa inrepuihei chunga kahrângtak a a’ntukpui tor sik remi 307,500 ka-om hei.

¹⁴Uzziah khan remihei hneng pho, kasei, lukhu, revon, sai leh the, saiphi sik a saihlung apek hei.

¹⁵Jerusalema ama hmangchâk ther kasyem he’n ber inshâng heia leh khōpui bang rakir heia inphut kâpsōt sik a the hei leh hlung kalen anleisyem hei. Ama rahming hmuntina inthang jo, ama kha Pathena inphut inthōpuina achen jâra ratha ahongnei hêr jo.

¹⁶Tâk-kha Reng Uzziah kha ratha aheinei jo pha, ama kha ṭong heirangei mak jo, khava khan ama tlâksukna amannei jo. Ama’n Bek-inn shunga kasea bero maichâma bero rona sik atloa apathen RŌNGPU kha ahnōise jo.

¹⁷Thempu Azariah kha thempu ratha kanei leh ngarsōna kanei 80 he’n anjuia rengpa kha

¹⁸ khâmna sik a anleijui. Anmani’n anti, “Uzziah! Nang in RŌNGPU hnenga bero rona sik a ratha neimak che. Aaron a inphut sōn leh pâr thempu rōk hei kha khava tlona sik a manthengsōt hei kae. Hiva hmun intheng hi dahlon roh. Nang in RŌNGPU Pathen kha nasuk manbōi jo, nang in ama mahâmṭhatna chenmak jo che.”

¹⁹Uzziah kha Bek-inn shunga bero maichâm hnenga bero rona kōklei amatua leika-om. Ama’n thempuhei chunga ahnuk hongkana jo, khava phatak a khan vunnat kasetak amachea hongkachu joa kae.

²⁰Azariah leh thempu ralak-hei kha ṭitpum a rengpa mache kha anlei en khana Bek-inn kha rumhrat tak a amandahlon jo. Inranga kasōksōt jo, ajârchu RŌNGPU’n karâkna apek joa kae.

²¹Rn Uzziah kha ahringkhō katlung bit a anat jâra khan beklanga intheng mak jo. Bek-inn shunga hlut tor loa, ama abinga inna ka-om jo, ṭōn rakip heite tlomak jo, hiva shunga asapa Jotham in ram vai kha arôn jo.

²²Amoz sapa Isaiah thempu khan Reng Uzziah vairôn laia aleitlo ralak rakip aleimazet a kae.

²³Uzziah kha kathi jo khana renghei thlân hmun a anhre jo, tâk-kha ama kha natse arôn jâra renghei thlân shunga chu hremak jo hei. Asapa Jotham khan athlenga reng kachang jo.