Read Komrem THUHMINGHEI INHNINA 28 Bible Online

THUHMINGHEI INHNINA 28 - Komrem bible

THUHMINGHEI INHNINA 28

¹Ahaz kha akum 25 atluk pha reng hongkachang, Jerusalema kum 16 reng kachanga kae. Ama khan apusōn Reng David omchen juimak a khava kanek a RŌNGPU tlai makna jôk aleitlo,

²Israel renghei omchen aleijuia kae. Ama’n thir vânga Baal limsyem anei hei,

³Hinnom Phaichama bero aleiro hei, Israel he’n hmating re anhei jōn pha ram shunga inphut RŌNGPU’n aleihnongsōt mihei omchen kha ajuia, limhei hnenga asapahei inthoina aleinei hei.

⁴Khōvelhei kamukna hmunhei, hmebung chunga, thingkung hnōi heia Ahaz khan inthoina leh bero ro mankhutna anei hei.

⁵Reng Ahaz khan setna atlo jâra, apathen RŌNGPU’n Syria rengpa kha mantorna amanneia Judea mi katamtak Damascus a khummia aleiṭhōi hei. Khana RŌNGPU’n Israel reng, Remaliah sapa Peka khan Ahaz kha amantora Judea remi kahrângpen 120,000 hei ni khat a anleithat heia kae. Anpu sōnhei Pathen, RŌNGPU’n hiva omchen kasōk sik hi amanṭhat, ajârchu Judah mipuihei khan ama kha anleidahlon joa kae.

⁷Israel remi arahming Zichri intipa khan Reng Ahaz sapa Maaseiah, reng-innpui ka-ensuipa Azrikam khana rengpa remi hlamkakei inhnina Elkana hei kha aleithat hei.

⁸Judeahei kha an-innshung sōkpui anchangjen ravâng, Israel remihei khan nuhmei leh naipang khum mi sik a 200,000 anleisur hei khana chomsōt karōi katamtak hei kha leh Samariating anleiṭhōi jo hei.

⁹Oded inti RŌNGPU sânkathem inkhat Samaria khōpuia leika-om. Ama’n Israel remihei khan Judea khum mihei kha anheiṭhōi heia khōpui anhlut sik ting khan avaratō heia avahri, “Nanpu sōnhei Pathen RŌNGPU’n Judah hei chunga ahnuknat a nangni amantor chei kae, tâk-kha nangni’n rahe kasetak a nantathat hei kha ama’n athei jo.

¹⁰Khana tûnchu nuhmei leh pase nansōk manchang sik a nanrei jo hei. Nangni’num nan-Pathen RŌNGPU dōina setna nantlo jo ti hi manhret mak chei mo?

¹¹Kaṭong rangei ruh! Hiva khum mihei hi nansōpuihei kae. Sesōt hei rasoh, achangmak inchu RŌNGPU’n ahnuknat a karâkna apek sik cheia kae.”

¹²Sak tinga Rengram a hlamkakei 4 hei, Jehohanan sapa Azariah, Meshillemoth sapa Berechiah, Shallum sapa Jehizkiah, khana Hadlai sapa Amasa hei hinum remihei ṭōntlo kha leihnōm mak heia kae.

¹³Anmani’n anti, “Khava khum mihei kha hin heiṭhōi mak hei ruh! Eini’n RŌNGPU dōina setna nitlodek jo, eini karâkna sik a katluk a ahnuk nimannat jo. Tûnhin niṭhena kha avea manpungna sik a nanmadu jo,”

¹⁴Khava sōa remihei khan rehring surmihei leh ankarōi heichomsōt hei kha mipuihei leh anhlam kakeihei hneng anpek manhlut jo hei,

¹⁵khana ankarōi heichomsōt khana inphut khum mihei hneng pōn leh der ankapek sik a mi 4 anleikadei hei. Anmani tanei sik a pōn leh der, kekōk khana sâk leh in, khana antak intônna kano sik a olive thai katluk a anleipek hei. Ankea akalôntor mak hei khan shakōrtung anmanchōng hei, khana khum mi rakip hei kha Judea ramṭhen Jericho, kahno khōpuia anṭhōi male jo hei. Khava sōa Israelhei kha an-inn Samaria a inle jo hei.

¹⁶Edom he’n Judah hei chunga re anleisō nôk heia rehringa mi katamtak anleisur hei, khava jâra Reng Ahaz khan Assyria rengkalen Tiglath Pileser hneng inthōpuina ahei tirna sik aleider.

¹⁸Hiva phatak a hin Philisti he’n tlaitlâk bungkung leh thlang tinga Judah ram a re anleisō jo. Anmani’n Beth Shemes, Aijalon khana Gederoth khōpuihei leh Socoh, Timnah khana Gimzo khōpuihei leh ankhōte hei anhlō jo hei khana ahei tik a sik a khō anvât jo.

¹⁹Judah Reng Ahaz khan amipuihei raṭha neina kha donmak a khana RŌNGPU kha ahnōise jâra, RŌNGPU’n Judah chunga inrengna kha ahei rôna kae.

²⁰Assyria rengkalen khan Ahaz kha abôm sik kanek a, aleidōia ahnenga inrengna aleipek a kae.

²¹Khava sik jâra Ahaz khan Bek-inna, reng-innpuia, mipui hlamkakeihei inna inphut sana akhôm mantûp a rengkalen hneng aleipek, tâk-kha khava kha’m hnemdek mak a kae.

²²Ama kha inrengna’n ahlō chet-chet jo pha, Ahaz intipa khan RŌNGPU dōina setna kha atlosa chet-chet joa kae.

²³Ama’n ama kator, Syria pathenhei hnenga inthoina aleitōk heia kae. Ama’n ati, “Syria pathen he’n Syria renghei a’nthōpui hei, khava jâra ke’n inthoina kapek he’nchu, kei um an-inthōpui khâk sik eng.” Hiva tlona hin ama leh ajât-hei chunga inrengna ahei rôn joa kae.

²⁴Hiva chung nôk a, ama’n Bek-inn hmangchâk rakip alosōt a avōk mannōi jo hei. Bek-inn kha akam joa Jerusalema hmuntina maichâm asyem manphut jo hei.

²⁵Judah ram shunga khōpui leh khōte rakip a, ram hlop pathenhei hnenga bero ro mankhutna sik a khōvel kamukna hmun asyemsōt heia kae. Hing’hin ama bing chunga apusōnhei Pathen, RŌNGPU hnuk natna kha ahei rôna kae.

²⁶Ama vairôn shunga omchen kasōk rakip aphutna inphut achaina katlung Judah leh Israel Renghei Thuhming Rabu shunga inzet a kae.

²⁷Reng Ahaz kha kathi jo khana Jerusalema anhre jo, tâk renghei thlâna chu changmak. Ama sapa Hezekiah khan athlenga reng kachang jo.