Read Komrem THUHMINGHEI INHNINA 29 Bible Online

THUHMINGHEI INHNINA 29 - Komrem bible

THUHMINGHEI INHNINA 29

¹Hezekiah kha akum 25 atluk pha Judah reng hongkachang, khana ama’n Jerusalem kha kum 29 vai aleirôn. Ama nu kha Zechariah sanu Abijah kae.

²Apusōn David omchen kha ajuia, ama’n RŌNGPU tlaina aleitloa kae.

³Hezekiah khan reng ahong changna kum a thla hmakakei shunga, Bek-inn kekot-hei kha amahlâng nôk jo hei khana asyem manther jo hei.

⁴Ama’n thempu leh Levi rup khat hei Bek-inn nisōtinga lâmtea amantûp hei

⁵khana khan anhnenga ṭong ahri pek hei. Ama’n ati, “Levi nangni nanbinga intheng sōtna nantatlo sik kae khana RŌNGPU, nanpu sōnhei Pathen Bek-inn kha manthengna nantatlo sik kae. Bek-inn bukna akachang neinâk rakip kha losōt hei ruh.

⁶Nipusōnhei kha RŌNGPU ni-Pathen hnenga taksenthei leichang mak hei khana ama madu makna kha anleitloa kae. Ama omna hmun kha anmani’n donmak heia hnung ansungsia kae.

⁷Anmani’n Bek-inn kot-hei kha ankama, thaihmei kha anhip that hei, bero romak hei khana Israel Pathen Bek-inna ro-inthoina tlomak heia kae.

⁸Hiva jâra hin RŌNGPU kha Judah leh Jerusalem chunga ahnuk kana jo, khana anhnenga aheitlo omchen khan mi rakip lung natna leh inpirna amannei jo hei.

⁹Nipahei kha re shunga anleithat hei, ninuhmei leh nisahei kha rehringa anleikei hei.

¹⁰“Tûnchu nichunga ahnuk anat makna sik a, ke’n Israelhei Pathen RŌNGPU leh intepna nei sik a intluk jo eng.

¹¹Kasapahei, pha manhmang mak ruh. RŌNGPU’n ahnenga bero karo sik leh kamukna heia mipui hlamkakei sik a akadeisōt chei kha nangni kae.”

¹²Hiva Levihei hi khana khan leika-om hei: Kohath phungṭhena inphut, Amasai sapa Mahath leh Azariah sapa Joel Merari phungṭhena inphut, Abdi sapa Kish leh Jehallelel sapa Azariah Gershon phungṭhena inphut, Zimma sapa Joa leh Joa sapa Eden Elizaphan phungṭhena inphut, Shimri leh Jeuel, Asaph phungṭhena inphut, Zechariah leh Mattaniah Heman phungṭhena inphut, Jehuel leh Shimei Jeduthun phungṭhena inphut, Shemaiah leh Uzziel, hiseng.

¹⁵Hiva mihei hin anloi Levihei kha anmantûp heia ankhenga beklanga intheng sōtna anneia kae. Khava sōa, antatlo sik a reng in ṭong apek hei kapōa, RŌNGPU Dân dungjuia, Bek-inn kha beklanga manthengna anphut jo.

¹⁶Thempuhei khan Bek-inn manthengna sik a kahlut heia beklanga a’nthengmak rakip kha Bek-inn sumpuk a ankeisōt hei. Khana inphut Levihei khan akhenga Kidron Phaichama anvathak jo hei.

¹⁷Ṭōn kha thla hmakakeia kani hmakakei ning a’nphut a akhenga ni 8 tluk ning Bek-inn hlutna innden inveisana anleichai jo. Khava sōa abân ni 8 nôk ṭōn anleitloa athla shunga ni 16 katlunga, kamukna sik a Bek-inn syemna inṭang hei.

¹⁸Levihei khan Reng Hezekiah hneng hiva thangkōina hi anleinei: “Bek-inn akhenga, ro-inthoina maichâm leh buhlom intheng dana dokhâng khana khahei hmangchâk rakip beklanga mantheng sōtna kha kanchai jo.

¹⁹Reng Ahaz in Pathen hneng taksenthei achang makna pha shunga aleichoisōt hmangchâk rakip hei kha’m kahei choi male jo hei, khana avea kantōk manther jo hei. Khavakha RŌNGPU maichâm hmaikunga a’ntlo kae.”

²⁰Insumlo jen a Reng Hezekiah khan khōpui shunga hlamkakeihei kha amantûp heia, ankhengpet a Bek-inna leikase hei.

²¹Rn innshunghei leh Judah mipuihei setna losōtna sik leh Bek-inn mantheng sōtna tōkna inkhat a, sehratche 7, kemōng 7, kemōngte 7, khana ke 7 anleikei hei. Rengpa khan Aaron sōn thempuhei hneng ranhei kha maichâm chunga inthoina tōkna sik a amanthei hei.

²²Thempuhei khan sehratchehei kha hmatak a anthat hei, abânna kemōnghei, kemōngte hei khana inthoina rakip a thisen kha maichâm chunga ankathinga kae.

²³Achaina ke kha rengpa leh kamukna kaneihei hneng ankei heia anmani’n anchunga ankut vâng anmajui hei.

²⁴Khava sōa thempu he’n kehei kha anthat sik hei khana anthisen kha maichâm chunga mipui rakip hei setna losōtna sik a inthoina thisen kha ansun mathlâk sik, ajârchu rengpa khan Israel pumpui sik a ro-inthoina leh set-inthoina neina sik a ṭong pekna aleinei heia kae.

²⁵RŌNGPU’n Reng David hnenga, reng sânkathem Gad leh Nathan heia inphut mansena aleinei kha rengpa hin aleijuia kae; Levihei kha, Reng David in aleihmang hei

²⁶serângdâr leh sumkutben inthōa Bek-inna amatung hei.

²⁷Ro-inthoina sik a tōkna sik a Hezekiah khan ṭong apek hei; tōkna kha anphut pha, mipui he’n RŌNGPU manpâkna hla ansak a, mahring inhring he’n pengkun leh hmangchâk rakip antum sik hei.

²⁸Khana aka-om mi rakip in kamukna kha invei sik hei, inthoina kha ro manchai mak kârseng hlasakna leh mahring kanei rakip kha anmanjom sik a kae.

²⁹Khava sōa Reng Hezekiah leh mipuihei khan inkun heia Pathen ankamuk sik.

³⁰Rengpa leh jât hlamkakeihei khan Levihei hneng David leh sânkathem Asaph talei sun RŌNGPU choi ka-ânna hla ansakna sik a anmanthei hei. Khava jâra mi rakip in inkun heia inpâktak a hla ansak a Pathen ankamuk a kae.

³¹Hezekiah khan mipui hnenga ahri, “Tûnchu nangni beklanga intheng jo chei, RŌNGPU hnenga manpâkna tōkna inkhat a inthoina kha heichoi jo ruh.” Aṭong kha anjuia, anmani ṭhahrep he’num roa tōkna inthoina sik a ranhei kha pek hnōmtak a anheikei hei.

³²Anmani’n sehratche 70, kemōng 100, kemōngte 200 RŌNGPU sik aro-inthoina sik anheikei hei;

³³anmani’n mipui inthoina antasâk sik a sehratche 600 khana kemōng 3,000 anhei keisa hei.

³⁴Hiva ranhei kathat sik a thempu katluk a anleiom mak jâra, ṭōn kha a’nchaimak kârseng Levi he’n anlei inthōpui hei. Khava sōa, thempu katamtak in beklanga intheng sōtna anleitloa kae. (Thempuhei kanek a Levi he’n beklanga intheng sōtna hi taksen theitak a anleinit a kae.)

³⁵Pumroa inthoina tōkna chunga hin, mipuihei sâkna sik a, inthoina inphut sathai rona sik leh ro-inthoina shunga a’ntōksa juhei sunna kha thempuhei tatlosa sik ṭōnhei kae. Khang’khan Bek-inna kamukna kha anphut nôk jo.

³⁶Reng Hezekiah leh mipuihei kha inpâk jo hei, ajârchu hiva rakip hi inranga tlosōtna sik a Pathen in a’nthōpui heia kae.