Read Komrem THUHMINGHEI INHNINA 30 Bible Online

THUHMINGHEI INHNINA 30 - Komrem bible

THUHMINGHEI INHNINA 30

¹Khava thla hmakakei shunga khan mipui he’n Rakan Kût kha aphahrep a nittor mak jo hei, ajârchu thempuhei anja katluk a beklanga intheng sōtna neimak jo hei khana mipuihei Jerusalema akatamtak intûp mak heia kae. Khava jâra khan Reng Hezekiah leh aṭōn karônhei khana Jerusalema mipuihei khan abânna thla shunga nit sik a inhnōmtō jo hei, khana rengpa khan Israel leh Judah mipuihei hnenga ṭong amanrôn jo hei. Ephraim leh Manasseh phunghei hnenga khôk saktak a chithi atira, Jerusalem Bek-inna Israelhei Pathen, RŌNGPU kajana Rakan Kût nitna anhongna sik a aleibek hei.

⁴Rengpa leh mipuihei kha anṭōn mantlukna chunga leikatlai hei,

⁵khava jâra sak tinga Dan a inphut thlâng tinga Beersheba katlunga Jerusalema anhong leh Dân dungjuia Rakan Kût annitna sik khana hmalaia kanek a mipui antampenna sik a Israel mi rakip anleibek hei.

⁶Rengpa leh aṭōn karônhei ṭongpekna dungjuia tirlehei khan Judah leh Israel pumpuia hiva bekna ṭong hi anchoia kase jo hei: “Israel mipuihei, nangni Assyriahei ram hlōna shunga inphut kahringsōt jo chei. Tûnchu Abraham, Isaac, leh Jacob RŌNGPU hnenga he’nle ruh, khana ama’m nanhnenga he’nle sik a kae.

⁷Nanpu sōnhei leh nan-Israel u leh naihei, an-Pathen RŌNGPU hnenga ṭong kajuimak hei kha pōmak hei ruh. Nantahmu jo kapōa, ama’n inhnaktak a karâkna apek heia kae.

⁸Anmani kapōa ṭong inngeimak changmak ruh, tâk-kha RŌNGPU kha jui ruh. RŌNGPU nan-Pathen in ahei tik a sik amanthengsōt Jerusalem Bek-inna hong ruh, khana nanchunga ahnuk anat nôk makna sik a kamuk ruh.

⁹Nangni’n RŌNGPU hneng nanhong inle’nchu, khava nan-u leh nannaihei kha rehringa ankaṭhōi hei khan lungset anrôn heia innting anheitir male sik hei. Nan-Pathen RŌNGPU kha lungset marit kathem kae, ahnenga nan-in le’nchu ama’n arahlâng sik chei.”

¹⁰Tirlehei khan Ephraim leh Manasseh phunghei ramṭhen rakip a, sak tinga Zebulun phunghei katlunga kase hei, tâk mipui he’n anmanuisō hei khana sem anmanlo hei.

¹¹Kha’num, Asher, Manasseh leh Zebulun phung heia inphut ṭhahrep hei chu Jerusalema hong sik a anmadu.

¹²Pathen inum Judah shunga ṭōn aheitloa khana mipuihei kha rengpa leh aṭōn karônhei ṭongpek anjuia Pathen lungdo tlona sik an-intlukna chunga khan inchuntheina amannei heia kae.

¹³Che philo Buhlom Revei nitna sik a thla 2 changna khan Jerusalema mipui katamtak hong intûp jo hei.

¹⁴Jerusalema inthoina leh bero rona ale’nhmang maichâmhei kha anlosōt heia Kidron Phaichama anvahlonsōt jo hei.

¹⁵Khana khava thla kani 14 ning khan Rakan Kût sik a kemōngte anleithat hei. Beklanga a’nthengmak thempu leh Levihei kha inzak hêr heia anbinga RŌNGPU hnenga inthengsōt jo hei, khantō khan Bek-inn shunga ro-inthoina antōk tor jo.

¹⁶Anmani kha Pathen mi, Moses Dân mansena dungjuia Bek-inn shunga hmun anhlōa kae. Levihei khan inthoina thisen kha thempuhei hneng anpek heia maichâm chunga ankathing thlōna kae.

¹⁷Ajârchu mi katamtak beklanga intheng mak hei, Rakan Kût kemōnghei kha thattor mak hei, khava jâra anmani sik a Levihei khan antlo pek hei khana kemōnghei kha RŌNGPU hnenga tōkna anneipek heia kae.

¹⁸Hiva chunga, mi katamtak Ephraim, Manasseh, Issachar khana Zebulun phunga inphut he’nchu beklanga intheng sōtna kha leitlo mak hei, khava jâra Rakan Kût kha angaitak a leinit mak hei. Anmani sik a hiva derna hi Reng Hezekiah khan atōkpek hei:

¹⁹“O RŌNGPU, kanpu sōnhei Pathen, nang ṭhatna vânga khan hiva malung pumpuia nang inmuk hei hi, beklanga inthengna annei mak inum rangei mandam hei roh.”

²⁰Hezekiah derna kha RŌNGPU’n amasôn pek; mipuihei kha arangei mandam hei khana suk manset mak hei.

²¹Jerusalema a’ntûp mipuihei khan ni 7 Che philo Buhlom Revei kha inpâktak a annit a ani katai Levihei leh thempuhei khan anratha neina rakip a RŌNGPU kha anchoi ka-ânna kae.

²²Levihei khan RŌNGPU kamukna kha kasing tak a hlam ansât jâra Hezekiah khan aleimanpâk hei. Anpu sōnhei Pathen RŌNGPU manpâkna inthoina antōkna shunga ni 7 kha athleng jo pha

²³anmani ankhenga ni 7 inkhat nôk nitsa sik a intluk jo hei. Khanga inpâktak a anleinit jo.

²⁴Reng Hezekiah khan mipui sik a sehratche 1,000 leh kemōng 7,000 that sik leh sâk sik a aleitōk, khana ṭōnkarônhei khan sehratche 1,000 leh kemōng 10,000 anleipeksa hei. Thempu katamtak beklanga intheng sōtna anleineia kae.

²⁵Khava jâra mi rakip le’npâk jo hei, Judah mihei, thempuhei, Levihei, sak tinga akahong mipuihei khana Israel leh Judah ram shunga aka-omthang jo ram hlop mihei seng.

²⁶Jerusalem khōpui kha inpâk na’n kasip jo, ajârchu hinghiva hi David sapa Reng Solomon pha khana inphut leisōk hêrmak a kae.

²⁷Thempu leh Levihei khan mipui sik a mahâmṭhatna RŌNGPU hneng anleider. Marvâna a-inna inphut Pathen khan anderna kha athei pek hei khana arahlâng heia kae.