Read Komrem THUHMINGHEI INHNINA 31 Bible Online

THUHMINGHEI INHNINA 31 - Komrem bible

THUHMINGHEI INHNINA 31

¹Revei kha a’nchaisō pha, Israel mipui rakip in Judah ram shunga khōpui rakip a vakase heia hlung kachohei anvōkkhōi hei, pathennu Asherah limhei antuktan hei, khana khōvelhei maichâm leh kamukna hmunhei ansuk manhmang hei. Anmani’n khang’khan Judah, Benjamin, Ephraim leh Manasseh ramṭhen rakip a anleitlo; khava sōa anmani ankhenga inna hong inle hei.

²Rn Hezekiah khan thempu leh Levihei inloikhômna aleiphut, hiva shunga hin anmani inkhat et in ṭōn matu sik anleinei. Hiva shunga hin ro-inthoina leh inloikhômna tōkna, Bek-inna kamukna inveisa sik khana Bek-inna ahlop-hlop amanpâkna leh achoi ka-ânna nei sik hei hi kae.

³Ama kemōng rup leh serup heia inphut ani kataia jîngkâr khōhleia ro-inthoina sik a, Châmhngat kani, Thlather ninga leh revei ralak sik a, RŌNGPU Dân tarangei dungjuia ran aleitōk hei.

⁴Khava chunga, rengpa’n Jerusalema mipuihei hneng thempuhei leh Levi he’n RŌNGPU Dân rangeina dungjuia anpha kha a’ntōksōt torna sik a, anmani chen sik a tōknahei kha anhei choina sik a amanthei hei.

⁵Ṭong kha amasō lim leh, Israel mipuihei khan anmani hmuchi, ju, olive thai, khōihning leh anhlei karahei akaṭhapen kutchoi kha anheichoi hei, khana antanei seng sem sôma inkhat kha’m anheichoisa hei.

⁶Judah khōpuia aka-om mipui rakip in ansehei, kemōnghei sem sôma inkhat anheichoi hei, khana anmani’n kutchoi katamtatak RŌNGPU an-Pathen hnenga tōk sik hei kha anheichoi hei.

⁷Kutchoihei kha thla 3 changna heikatlung hei khana khahei manbukna kha thla 4na katlunga antlo manjōm.

⁸Reng Hezekiah leh aṭōn karônhei khan khangtuk katam pekna kha anhmu pha, anmani’n RŌNGPU leh ami Israelhei chunga amanpâk heia kae.

⁹Rengpa khan hiva kutchoi chunga thempuhei leh Levihei hneng ṭong ahri pek hei,

¹⁰khana Zadok sōn Azariah Thempu Kalen in ahnenga ahri, “Mipui he’n ankutchoi kha Bek-inna anheichoi manphut jo jâra sâk leh in katluk set jo khana akatamtak inhlei jo. RŌNGPU’n amihei mahâmṭhat apek hei jâra hihei seng hi nichen jo kae.”

¹¹Rengpa ṭongpek a anmani’n Bek-inn hnenga karōi bukna ansyem jo

¹²khana khava shunga kutchoihei leh sem sôm rakip kha kaṭhatak a dana sik a anthōn manhlut hei. Levi arahming Conaniah intipa kha khava ka-ensuia anda khana anaipa Shimei kha ama inthōpui sik a ankadei.

¹³Anmani thōia ṭōn katlo sik a Levi 10 annganse hei: Jehiel, Azazia, Nahath, Asahel, Jerimoth, Jozabad, Eliel, Ismakhia, Mahath, khana Benaiah. Hihei rakip hi Reng Hezekiah leh Thempu Kalen Azariah hei ratha neina thōia a’ntlo hei kae.

¹⁴Levi mi, Imna sapa Kore, Bek-inn Nisō Kekot kahrunga lu kachingpa kha RŌNGPU hnenga kutchoi tōkna neinâk inhlâng sik leh akasem sik a manngan kae.

¹⁵Thempuhei omna khōpui ralak-heia, Levi ralak he’n hiva ṭōnna hin malung inthengtak a inthōpuina anpek a kae: anmani kha Eden, Miniamin, Jeshua, Shemaiah, Amariah, khana Shecaniah hei hi kae. Anmani hin thlai kha ansap changpui Levihei hneng anṭōn matuna dungjuia in-anghrep a ansempek heia kae,

¹⁶hivahi anphung ṭhen dungjuia semna khachu changmak. Anmani hin pase rakip kum 30 katluk jo leh akakhe seng hnenga anṭōn matu dungjuia ani katai Bek-inna ṭōnkarônhei kha chen anpek heia kae.

¹⁷Thempuhei hi anphung ṭhen dungjuia ṭōn anpek hei, khana Levihei hi kum 20 leh achung senghei kha ruprup a ṭōn anpek hei.

¹⁸Anmani annuhmei, ansahei khana antamanhring rakip hei kha leh ankhenga rahming ankhum manhlut hei, ajârchu anmani hi pha rakip a anṭōn intheng kha tlosōtna sik a inrin ṭhak a an-omna sik a kae.

¹⁹Aaron sōnhei hnenga a’npek khōpui heia achangmak leh khava khōpuihei ramhâng heia aka-om thempuhei kâra, thempu innshunga pase rakip hnenga leh Levi phungṭhen rahming inzet rakip hei hnenga thlai kasem a a’nṭang sik a nganse mi leika-om hei.

²⁰Judah pumpui shunga, Reng Hezekiah khan akadik leh apathen RŌNGPU tlaina kha aleitloa kae.

²¹Ama khan hmesōna anei, ajârchu ama’n Bek-inn leh Dân juina sik aleitlo rakip, apathen hneng pui katluk a ṭong juina leh kamukna malunga aleitlo heia kae.