Read Komrem THUHMINGHEI INHNINA 32 Bible Online

THUHMINGHEI INHNINA 32 - Komrem bible

THUHMINGHEI INHNINA 32

¹Rn Hezekiah’n RŌNGPU kha taksentak a arazenna omchen khaseng asōksōa, Assyria rengkalen Sennacherib khan Judah chunga re aheisō jo. Rekur tukkhum khōpuihei kha akekhum jo hei khana aremihei kha khōpui bang anvōkkhōi hei leh anhlutna sik a ṭong apek jo hei.

²Sennacherib khan Jerusalem katlung buhlu sik a intluk jo ti kha Hezekiah khan ahmu sōt jo pha,

³khana Assyria he’n Jerusalem hnenga anheitlung pha tui in sik anhmu makna sik a khōpui vângtinga tui lōngna dung kha tingtan sik a ama leh ama aṭōn karônhei khan intluk jo hei. Ṭōnkarônhei khan mi katamtak anṭhōisōt heia tuiripût rakip a tui ahei sōk makna sik a antingtan jo hei.

⁵Rengpa khan khōpui banghei, achunga ber inshâng hei asyem manther heia khana vâng intong bang asyem heia khōpui hrungna kha amanhnetdet a kae. Khava chunga, ama’n Jerusalem inn marō nisōtinga, ralei pi kasiptak a dengna chunga a’nsak rekurhei kha asyem manther hei. Ama’n kasei leh pho katamtak anei hei.

⁶Ama’n khōpui shunga pase rakip rehlam kakeihei thōia ada hei khana anmani kha khōpui kekot a ramhâng tetlânga amantûp hei. Ama’n anhnenga ati,

⁷“Intluk ruh khana inngamna nei ruh, khana Assyria rengkalen achangmak leh aremi heiṭhōi hei kha ṭitmak hei ruh. Ama’n ratha anei kanek a eini’n ratha nineichet a kae.

⁸Ama’n mihring ratha anei, tâk-kha eini chu nire katuk sik a RŌNGPU ni-Pathen kha ninei.” Mipuihei kha hiva anrengpa ṭong hin mathokna anei jo hei.

⁹Pha bongkhat sōa, Sennacherib leh aremi he’n Lachish a anleiom lai shunga, ama’n Hezekiah leh Jerusalema a-ompui Judah mipuihei hnenga ṭong hi aleimanrôn hei:

¹⁰“Assyria Rengkalen Sennacherib ke’n kakekhum jo Jerusalema nan-omna sik a inngamna kha mipui nangni hnenga hei-inmo apek chei tia kader chei kae.

¹¹Keini ratha neina inphut RŌNGPU nan-Pathen khan ahuk sik chei tia Hezekiah khan amanthei chei, tâk-kha Hezekiah khan ahōn chei kae khana vonṭâm leh tuihrea athat sik chei kae.

¹²Ama kha RŌNGPU kamukna hmun kasukset inkhat kae khana Judah leh Jerusalem mipuihei hneng maichâm inkhat rōk a kamukna leh bero rona sik a mi intheipa kha kae.

¹³Kapu sōnhei leh ke’n jât ralak-hei hnenga heimo kantaleitlo hei kha manhret mak chei mo? Assyria rengkalen kut a inphut tu jât ralak-hei pathen in amihei ahuk jo aka-om mo?

¹⁴Khava ram rakip a pathenhei khan heitik khan mo keini kut a inphut anram antahuk aka-om jo?

¹⁵Tûnchu Hezekiah khan hōnmak chei rasoh khana khang’khan akaletting ṭhōi mak chei rasoh. Ama kha taksen mak ruh! Assyria rengkalen tu inkhat a inphut tu jât inkhat pathen in amihei huk tor hêrmak heia kae. Khava jâra nangni pathen hinum nangni ahuktordek mak tin!”

¹⁶Assyria ṭōnpui karônhei khan RŌNGPU Pathen leh RŌNGPU sōkpa Hezekiah chunga ṭong kaṭhamakchet anhrisa joa kae.

¹⁷Rengkalen tajōng mazet chithi khan Israel Pathen RŌNGPU kha ahnōisetek joa kae. Khana khan ati, “Jât-hei pathen in kei ratha neina inphut huk tor mak hei, khana Hezekiah pathen khan keia inphut amihei huk tor mak ning.”

¹⁸Ṭōnkarônhei khan khōpui kha kabeia hlōna sik a anmandona, khōpui bang chunga aka-om Jerusalem mipuihei malung tlâkna sik a khana maṭhitna sik a hiva ṭong hi Hebrew ṭong vânga ka-ông heia anteisōt jo.

¹⁹Anmani’n Jerusalem Pathen kha mijât ralak-hei pathen, mihring kut vânga ansyem limhei leh in-anghrep a anhrimaset jo.

²⁰Khava sōa Reng Hezekiah leh Amoz sapa sânkathem Isaiah khan Pathen hnenga ander jo, ahnenga inthōpuina derna ka-ông jo hei.

²¹Assyriahei remi leh anṭōn karônhei kathat sik a RŌNGPU’n ngeva ajōngtir jo hei. Khava jâra rengkalen kha inzaktak a Assyria ting inle jo. Ni khat chu apathen bek-inna aleiomlai asapa he’n chemjâm vânga anleituk that jo.

²²Hing’hin RŌNGPU’n Reng Hezekiah leh Jerusalema mipuihei kha Sennacherib ratha neina inphut khana an-inrepui ralak-heia inphut aleihuk hei. Mipuihei kha insak inthlânga ram rakip hei leh kamōnga aleida jo hei.

²³Khava khana inphut chu jât leh phung rakip in Hezekiah kha kajana annei joa RŌNGPU hnenga tōkna leh Hezekiah hnenga kutchoihei anheichoia mi katamtak in Jerusalema kahong jo hei.

²⁴Khava pha khan Reng Hezekiah kha hongkana jo khana kathivet jo. Ama’n derna anei, ama hongdamna sik a mêrchîkna inkhat RŌNGPU’n ahei pek.

²⁵Tâk-kha RŌNGPU’n ama sik a aleitlo pek chunga manpâkna neiloa Hezekiah kha inlensaktak a leika-om, khava sik a Judah leh Jerusalem chu inrengna anleichena kae.

²⁶Achaina, hei-hei achang inum Hezekiah leh Jerusalema mipuihei kha insinsak jo heia Hezekiah athimak kârseng chu RŌNGPU’n karâkna leipek mak heia kae.

²⁷Reng Hezekiah kha ahongnei hêr jo, mi rakip in ankaja jo. Ama’n sana, dangka, hlung mankatam, maru-marâng, pho khana neinâk mankatam ralak dana sik a karōi bukna den aleisyem hei.

²⁸Hiva chunga, ama’n hmuchi, ju, olive thai dana ramsōr asyem hei; khana sehei serōng, kemōnghei anrōng asak pek hei.

²⁹Hihei rakip chunga, Pathen in kemōng leh se khana aralak karōi katamtak apek a khōpui katamtak um asak heia kae.

³⁰Gihon Tuiripût-hei lōngna akatingtan leh Jerusalem bang ashungting tuikhông akasyema tui akapek kha Reng Hezekiah kha kae. Hezekiah kha atlona rakip a hmesōna aneia kae,

³¹khana ram shunga omchen ahlopdet kasōk kha aka-en sik a Babylon palaihei kha ajonglai kha’num, Pathen in Hezekiah kha a-omchen enmansin theina sik a amadu-duna hlam a amansea kae.

³²Rn Hezekiah ṭōn leitlo rakip leh RŌNGPU a-oina hei kha Amoz sapa Isaiah Sânkathem Hmangtalâr lekha leh Judah leh Israel Renghei Thuhming Rabu shung heia inzet heia kae.

³³Hezekiah kha kathia renghei thlân chung intong rup-hei kâra anhre jo. Judah leh Jerusalem mipui rakip in athina kajana kha kalentak a anleipek a kae. Asapa Manasseh khan athlenga reng kachang jo.