Read Komrem THUHMINGHEI INHNINA 33 Bible Online

THUHMINGHEI INHNINA 33 - Komrem bible

THUHMINGHEI INHNINA 33

¹Manasseh kha Judah reng ahongchang pha akum 12 katluk jo, ama’n Jerusalema kum 55 vai aleirôn.

²Pathen mihei khan re hmating anhei jōn pha, RŌNGPU’n ram shunga inphut ahnong sōt jât-hei omchen, mater ka-om kha ajuia Manasseh khan RŌNGPU dōina setna aleitlo jo.

³Khōvelhei kamukna hmun, apa Hezekiah taleisuk manhmang hei kha asak manther nôk hei. Baal kamukna maichâm asak hei, Asherah pathennu limhei asyem hei, khana ârsi akamuk heia kae.

⁴RŌNGPU’n ahei tik a ama kamukna hmun kae aleitina khan ama’n Bek-inn shunga khōvelhei maichâm asyema kae.

⁵Bek-inn lâmte 2 heia ama’n ârsi kamukna maichâm asyem hei.

⁶Ama’n asapahei kha Hinnom Phaichama ro-inthoina aleitōk hei. Ama’n rahmang sânna leh dôi leh ai tlona aneia khana vâng ka-en hei leh rathla inbekpui thempuhei hneng ṭong ader heia kae. Ama’n RŌNGPU dōina setna inhnaktak atloa ahnuk amannat pek a kae.

⁷Ama’n limsyem inkhat Bek-inn shunga aleimatung, Pathen in David leh asapa Solomon hnenga hinga ṭong aleihrina hmun a khan, “Hiva Jerusalema, hiva Bek-inn shung hi, Israel phung 12 hei ramṭhen pumpuia inphut kei kamukna sik a kakadeisōt hmun kha kae.

⁸Khana Israel mipui he’n kaṭong pek rakip anjuia khana kasōkpa Moses tapek hei, Dân rakip annit inchu ke’n anmani kha anpu sōnhei hneng kaleipek ram shunga inphut mihei manhnongsōt mak hei ning.”

⁹Pathen mihei khan re hmating anhei jōn pha RŌNGPU’n aleihnongsōt jât-hei taleitlo kanek a akakhe chet setna tlona hlam a khan Manasseh’n Judah mipuihei kha aleiṭhōi hei.

¹⁰RŌNGPU’n Manasseh leh amipuihei kha gîkna apek he’num, anmani’n rangei hnōm mak hei.

¹¹Khava jâra RŌNGPU’n Assyria remi hlamkakeipa kha Judah chunga re amansōa kae. Anmani’n Manasseh kha ansur jo, ataksa chunga kōikim anmando jo, thirhrui vânga ankhit jo, khana Babylona ankei jo.

¹²Ama inrengna shunga khan ama hong insinsak jo, apathen hnenga hong inhe jo, khana inthōpuina sik a ader jo.

¹³Pathen in Manasseh derna kha ahnōm pek jo khana amasôn joa Jerusalema amansea vai amanrôn nôk a kae. Hiva hina inphut Manasseh khan RŌNGPU kha Pathen kae tia ahnōm jo.

¹⁴Hivasōa, Manasseh khan David khōpui nisōtinga vâng intong bang kha asak manshâng jo, Nga Kekot sak tinga phaicham shunga Gihon Tuiripût a inphut Ophel khōpuia ram rajei katlung. Ama’n Judah khōpui rekur tukkhum rakip a, remi rup inkhat et chunga, rehlam kakei inkhat et amatung hei.

¹⁵Ama’n aleida hei ram hlop pathenhei leh limhei kha Bek-inna inphut alosōt jo hei, khana Bek-inn matungna hmebung heia leh Jerusalem hmun ralak a aka-om khōvelhei maichâmhei kha alosōt jo hei; hihei rakip hi alosōt heia khōpui vângting avahlonsōt jo hei.

¹⁶RŌNGPU kamukna hmun a maichâm kha asyem manther a khava chunga inloikhômna tōkna leh manpâkna tōkna inthoina anei hei. Ama’n Judah mipui rakip Israel Pathen, RŌNGPU kamukna sik a ṭong aleipek hei.

¹⁷Mipuihei khan kamukna hmun ralak a inthoina kha antōk manjôn inum, anmani’n RŌNGPU hneng rōk a anleitōk joa kae.

¹⁸Manasseh ṭōn leitlo rakip, apathen hnenga derna aneina, Israelhei Pathen, RŌNGPU rahminga ahnenga ṭongkahri sânkathemhei ṭonghei, ankhenga Israel Renghei Thuhming Rabu a inzet heia kae.

¹⁹Rengpa derna khana Pathen masôna, ama’n amalung athleng mak hma asetna tlohei, ṭhatmak atlo hei, khōvelhei kamukna hmun, khana ama’n aleisyem Asherah pathennu limhei, khana ama’n akamuk limsyem ralak-hei ankhenga Sânkathemhei Thuhming Rabu a inzet heia kae.

²⁰Manasseh kha kathia reng-innpuia anleihre jo khana asapa Amon khan athlenga reng kachang jo.

²¹Amon in Judah reng ahongchang pha akum 22 katluk jo, khana ama’n Jerusalema kum 2 vai aleirôn.

²²Apa Manasseh kapōa, RŌNGPU dōina setna aleitlo, khana apa takamuk limhei kha aleikamuk heia kae.

²³Tâk-kha apa leh in-ang loa, ama kha insinsak mak, khana RŌNGPU hneng hong inhe mak a kae; apa kanek a kakhea kasetchet a kae.

²⁴Amon ṭōnkarônhei khan ama chunga lungthim antloa reng-innpuia anleithat jo.

²⁵Judah mipuihei khan Amon kathat-hei kha anthat nôk heia asapa Josiah kha reng anmanchang jo.