Read Komrem THUHMINGHEI INHNINA 34 Bible Online

THUHMINGHEI INHNINA 34 - Komrem bible

THUHMINGHEI INHNINA 34

¹Josiah kha reng ahongchang pha khan ama kum 8 katluk jo, ama’n Jerusalema kum 31 vai aleirôn.

²Ama’n RŌNGPU tlaina aleitlo; ama’n apusōn Reng David omchen aloa Pathen dân rakip ajuia kae.

³Josiah reng changna kum 8 atluk jo pha, anaipang changlai khan, apusōn Reng David Pathen kamukna kha aleiphut jo. Kum 4 kahnunga khōvel kamukna hei, Asherah Pathennu limsyem, khana limsyem ralak-hei suk manhmangna kha aleiphut jo.

⁴Ama mansena thōia Baal kamukna maichâmhei kha anvōk mathlek jo hei, khana khahei hnenga ka-om bero maichâm anṭhetsō heia kae. Asherah limhei leh limsyem ralak-hei kha raleia ansuk mandi hei khana khava ravut kha inthoina tōkna aleikaneihei, akathi jo hei thlân heia anva kathek thlōn hei.

⁵Ama’n khōvel thempuhei ru leh râng hei kha anmani kamukna maichâm heia aro manvâm hei. Hihei rakip hi atloa, Judah leh Jerusalem kha avea beklanga amantheng nôk hei.

⁶Khōpui heia, Manasseh, Ephraim khana Simeon a suk manset jo ramkei heia khana sak tinga Naphtali katlunga in-anghrep a khanga aleitloa kae.

⁷Sak tinga Rengram a ramṭhen rakip a maichâmhei leh Asherah limhei kha avōk rabun hei, limhei kha raleia akahnur mannōi hei, khana bero maichâmhei kha ahar-ahak a anvōkkhōi hei. Khava sōa ama Jerusalema inle jo.

⁸Avai rônna kum 18 shunga, khōvel kamukna amanbânga ram leh Bek-inn manthengna aneisōa, Reng Josiah khan RŌNGPU Pathen Bek-inn syem mantherna sik a mi 3 aleitir hei: Azalia sapa Shaphan, Jerusalema vaikarôn Maaseiah, ṭōnpui karôn Joahaz sapa Joa.

⁹Bek-inna akahngâk Levihei sêr mantûp seng kha Thempu Kalen Hilkiah hnenga anpek manhlut jo. (Khavakha Ephraim leh Manasseh khana Sak tinga Rengram a inphut, khana Judah, Benjamin khana Jerusalem miheia inphut khômsōt sêr kae.)

¹⁰Khava sêr kha Bek-inn syem mantherna nganse mi 3 hei hneng anpek manhlut hei, anmani’n

¹¹Judah reng he’n antamanrō jo innhei syem mantherna sik a, thingṭōn katlohei leh syem mantherna katlohei hneng hlung leh thingpum rachôkna sik a anpek jo hei.

¹²Khava ṭōnkatlo mihei kha anmalung intheng hêr. Anmani kha Levi 4 he’n an-ensui hei: Merari phungṭhena Jahath leh Obadiah, khana Kohath phungṭhena Zechariah leh Meshullam. (Levihei kha hlasakna akathem rōk hei kae.)

¹³Levi ralak-hei kha neinâk rathakna leh ṭōn hlop-hlop a ṭōn katlohei mansena kaneihei kae, khana aralak-hei khan lekharabu antinta khana neinâk hrungna ṭōn antloa kae.

¹⁴Sêr bukna den khana inphut sêr kha anlosōt pha, Hilkiah khan RŌNGPU Dân Lekha, Pathen in Moses hnenga aleipek Dân kha aleihmu jo.

¹⁵Ama’n Shaphan hnenga ati, “Ke’n Dân Lekha kha Bek-inna hin kahmu jo.” Khana ama’n Shaphan hnenga lekha kha apek jo,

¹⁶Shaphan in khavakha rengpa hneng achoi jo. Ama’n ahri pek, “Nang in ṭong napek ung rakip keini’n kantlo jo.

¹⁷Bek-inn shunga sêr kha kanloa ṭōn katlohei leh anka-ensuihei hneng kanpek jo hei.”

¹⁸Khana ahrisa a, “Hilkiah tapek eng lekharabu kha hin kada.” Khana ama’n kare inhnaktak a rengpa hneng atei pek jo.

¹⁹Lekha intei kha rengpa’n athei pha, malung inrenga apōn akeihler jo,

²⁰khana Hilkiah, Shaphan sapa Ahikam, Micaiah sapa Abdon, reng inna lekha inzetpa Shaphan, rengpa inzen Asaiah hei hnenga hiva ṭongpek hi apek jo hei:

²¹“Kei leh kami Israel leh Judah ram a alaka-om hei sik a vase inna RŌNGPU kha vader ruh. Hiva lekha mantheina chungchânga jongsōt ruh. Nipusōn he’n RŌNGPU ṭong anjuimak jâra khana hiva lekha hin tlo sik a ahri kha leitlo mak heia RŌNGPU’n nichunga ahnuk akana jo kae.”

²²Rengpa ṭongpek a khan Hilkiah leh alak-hei seng kha Jerusalem innther ṭhen khat a aka-om Hulda intinu hneng ṭong kader sik a kase jo hei. (Amanu puise kha, Harhas tupa, Tikva sapa Shallum kha Bek-inn pōn leh der katinta kae.) Amanu hneng omchen kasōk kha anhri pek jo,

²³khana anmani rengpa hneng ani’nlena sik a khana ahnenga

²⁴RŌNGPU a inphut athōia ṭonghei hi anvahri pekna sik a amanthei hei: “Rengpa hnenga a’ntei jo lekha shunga aka-om hâksêrna kapōa ke’n Jerusalem leh amipui rakip chunga karâkna kapek sik kae.

²⁵Anmani’n anhlonsōt enga pathen ralak hnenga inthoina anneia kae, anṭōntlo rakip hei khan kahnuk anmannat a kae. Kahnuknat kha Jerusalem chunga inhnak a kae, khana hivahi bângmak jo ning.

²⁶Rengpa sik a chu, RŌNGPU Israel Pathen in hivahi kahri kae: Lekha shunga a’nzet kha narangei jo,

²⁷khana ke’n Jerusalem leh amihei karâkna sik a kamaṭhit hei pha, kahma kunga insir chea insinsak jo che, napōn nakei hlera kaṭap che. Naderna ke’n kathei jo,

²⁸Jerusalem chunga karâkna kha nathi mak lai seng heirônsōt mak ning. Malung kamōng tak a kamanthi sik che.” Mipa kha hiva ṭong hi arôna Reng Josiah hneng inle jo.

²⁹Reng Josiah’n Judah leh Jerusalema hlamkakei rakip abek hei,

³⁰ankhenga Bek-inna kahong hei, thempu leh Levi khana sara heisa, mipui he’n anjui hei. Anmani hmaikunga rengpa khan intepna lekha, Bek-inn shunga a’nhmu kha akhenga kare inhnaktak a atei pek hei.

³¹Ama’n reng chopui hnenga kangira RŌNGPU ṭong juina sik, amalung leh arathla akhenga, adân leh aṭongpek juina sik, khana lekha shunga a’nzet intepna tarangei hei kha ṭōn vânga tlosōtna sik a, intepna inkhat asyem jo.

³²Ama’n Benjamin mipuihei leh Jerusalema aka-om mi rakip, intepna kha nitna sik a, intepna neina shunga amanvei hei. Khava jâra Jerusalema mipuihei khan anpu sōnhei Pathen leh intepna antasyem rangeina kha anjuia kae.

³³Reng Josiah khan Israel ramṭhen shunga aka-om mater ka-om limsyem rakip asuk manhmang hei, khana ama hring lai seng, mipui he’n anpu sōnhei Pathen RŌNGPU kha anrazenna sik a amanse heia kae.