Read Komrem THUHMINGHEI INHNINA 35 Bible Online

THUHMINGHEI INHNINA 35 - Komrem bible

THUHMINGHEI INHNINA 35

¹Rn Josiah’n RŌNGPU kajana Jerusalema Rakan Kût aleitloa kae; thla hmakakei ni 14 ning anmani’n revei ran anleithat.

²Thempuhei hneng Bek-inna anṭōnhlam matu sik kha anganse hei khana injentak a antlosōtna sik a amathok hei.

³Israelhei ojahei, RŌNGPU hnenga a’npek sōt jo hei, Levihei hnenga hiva mansenahei hi’m anei hei: “A’ntheng Intepna Bôm kha David sapa Reng Solomon taleisak Bek-inn shunga da ruh. Nangni’n khavakha hmun khat a inphut hmun khat a nanta’nchoi lele mak sik jo kae, tâk-kha nangni’n RŌNGPU nan-Pathen leh amihei nanta razen sik jo hei kae.

⁴Reng David leh asapa Reng Solomon ṭōn mannganna chei dungjuia, Bek-inna nanphungṭhen et in hmun hlō ruh,

⁵khana mi ṭhahrep in Israel innshung rakip chunga inthōpuina nanpektor heina sik a nanbinga intluk ruh.

⁶Rakan revei kemōng leh kehei nangni’n nantathat sik kae. Tûnchu nangni beklanga intheng sōtna kha tlo ruh, Moses hnenga RŌNGPU mansena kha nansap changpui Israel he’n anjuina sik a inthoina neinâk-hei kha mantluk hei ruh.”

⁷Rakan reveia mipuihei tahmang sik a, Reng Josiah khan ama serup leh kemōng rup-hei kâra inphut kemōng, kemōngte, kete 30,000, khana sehratche 3,000 atōksōt hei.

⁸Ama ṭōnkarôn he’num mipuihei sik, thempuhei sik, khana Levihei hmangna sik a anleitōk hei. Khana Bek-inn ka-ensui ṭōnkarônhei, Thempu Kalen Hilkiah, Zechariah khana Jehiel hei khan kemōngte leh kete 2,600, khana sehratche 300 revei shunga ro-inthoina sik a anleitōk hei.

⁹Levi hlamkakeihei, Conaniah, Shemaiah leh anaipa Nethanel, Hashabiah, Jeiel, khana Jozabad hei hin kemōngte leh kete 5,000 khana sehratche 500 Levihei ro-inthoina hmang sik a a’ntōksōt hei.

¹⁰Rakan revei sik heirakip anmantluk sōa, thempuhei leh Levi he’n rengpa ṭongpek dungjuia, anhmun anhlō jo.

¹¹Kemōngte leh kehei kha anthatsōa, Levihei khan anvun anhlip hei, khana thempuhei khan thisen kha maichâm chunga ankathing thlōn hei.

¹²Khava sōa Moses Dân dungjuia tōkna sik a, inthoina ranhei kha anmani’n innshung innshunga mipuihei kha insem jo hei.

¹³Levihei khan Rakan revei inthoinahei kha chondân dungkajuia hmei chunga anro jo hei, khana bephuhei, betehei, khana Khângbe heia ansōng machōr heia inrangtak a mipui hnenga ansempek hei.

¹⁴Hivahi a’ntlosōa, Levihei khan anbinga sik leh Aaron sōn thempuhei sik a hme kha anpek hei, ajârchu thempuhei kha ran apum aro-inthoina leh athai rona kha jân kathang antlo jâra anṭōn kachina kae.

¹⁵Levi shunga Asaph phungṭhena hlakasak Levihei kha Reng David mansenahei dungjuia anhmuna intung jo hei: Asaph, Heman, khana rengpa sânkathem Jeduthun. Bek-inn kekot kahrunghei khachu anhmun dahlon sik rangei mak, ajârchu Levi ralak he’n Rakan revei kha anmani sik a anmantluk pek heia kae.

¹⁶Achang jâra, Reng Josiah ṭongpekna kapōa, khava ning khan RŌNGPU kamukna sik a heirakip intlosō jo, Rakan Kût sik leh maichâm chunga inthoina tōk sik hei seng kha.

¹⁷Israel mipui akahong senghei khan ni 7 sik a Rakan Kût leh Che philo Buhlom nitna kha anhmang jo.

¹⁸Samuel sânkathem pha khana inphut, hiva kapōa Rakan revei lanit phungmak hei. Reng Josiah leh thempuhei, Levihei khana Judah, Israel leh Jerusalema mipuihei tahmang kapō Rakan revei hi, reng hmakakei tûte inkhat in lahmang phungmak heia kae.

¹⁹Josiah vairôn kum 8 katlung shunga nitna kapōa.

²⁰Reng Josiah’n Bek-inn sik a hiseng atlosōa khan, Egypt Reng Neko khan Euphrates Tuidunga Carchemish hmun a re intukna sik a aremi aheiṭhōi jo hei. Josiah khan ama kha tingna sik a aleitlo,

²¹tâk Neko khan Josiah hnenga hiva ṭong hi aleitir, “Judah Rengpa, kei tatuk sik re hi nang chunga changmak. Kei nang re katuk sik a akahong eng changmak, tâk kei inrepuihei katuk sik a kae, khana Pathen in inranga kasena sik a amanthei eng. Pathen kha kei langting ka-om jo, khava jâra kei ating mak roh, natlo khâk inchu asuk manhmang sik che kae.”

²²Tâk-kha Josiah khan re tuk sik a intluk jo. Pathen in Reng Neko hnenga inphut ajōng hri kha rangei pek mak jo, khava jâra ama’n ahme inhlemsak a Meggiddo phaichama re katuk sik a kase jo.

²³Re shunga khan Egypt remi he’n the inkhat vâng ankâp masuk jo. Asōkpa hneng ṭong apek, “Kei aṭhōisōt jo roh; kei inhnaktak a intôn jo eng!”

²⁴Anmani’n ashakor gâri chunga inphut ankadomsōt a khana aleika-om shakor gâri inkhat a anmanchōnga Jerusalema anleiṭhōi jo. Khana khan ama kathia renghei thlâna anhre jo. Judah leh Jerusalem mipui rakip he’n ama thina kha ṭajai ansuia kae.

²⁵Sânkathem Jeremiah khan Reng Josiah sik a ṭajai suina hla asyemsōt a kae. Khavakha Israel hla kasak, nuhmei-pase he’n ama chunga ṭajai suina anhmanga kae.

²⁶Josiah tatlosōt rakip ama’n RŌNGPU hnenga lum alona, Dân ajuina,

²⁷khana ama thuhming aphutna’n achaina katlung akhenga Israel leh Judah Thuhming rabu shunga inzet a kae.