Read Komrem THUHMINGHEI INHNINA 36 Bible Online

THUHMINGHEI INHNINA 36 - Komrem bible

THUHMINGHEI INHNINA 36

¹Judah mipuihei khan Josiah sapa Joahaz kha ankadeia Jerusalema reng sik a thai anmanthi jo.

²Joahaz khan Judah hei reng achang pha akum 23 katluk jo, khana ama’n kum 3 vai aleirôn.

³Egypt Reng Neko khan rehringa aleisura Judah hei kha dangka kilograme 3,400 leh sana kilograme 34 reng ramsêrṭheia aleimanpek hei.

⁴Neko khan Joahaz naipa Eliakim kha Judah reng amanchang jo khana arahming kha Jehoiakim tia aphō jo. Neko’n Joahaz kha Egypt a aṭhōi jo.

⁵Jehoiakim in Judah reng achang pha akum 25 katluk jo, ama’n Jerusalema kum 11 vai aleirôn. Ama’n apathen RŌNGPU hnenga setna aleitlo jo.

⁶Babylon Reng Nebuchadnezzar khan Judah chunga re aleisōa Jehoiakim kha aleisur khana thirhrui vâng akhit a Babylon ting aleikei.

⁷Nebuchadnezzar khan Bek-inn karōi bukna inphut ṭhahrep aleichoisōt jo khana ama reng-innpuia aleida jo hei.

⁸Jehoiakim in aleitlo rakip, mater ka-om leh akaṭhamak aleitlo rakip kha Israel leh Judah Renghei Thuhming Rabu shunga inzet a kae khana asapa Jehoiachin in athlenga reng kachang jo.

⁹Jehoiachin in Judah reng ahongchang pha akum 18 katluk jo; khana ama’n Jerusalema thla 3 leh kani 10 vai aleirôn. Ama kha’m RŌNGPU dōina setna aleitlo.

¹⁰Zerkhō ahong pha, Reng Nebuchadnezzar khan Jehoiachin kha surmi inkhat a Babylona aṭhōi jo khana Bek-inna karōihei kha achoisōt jo hei. Khava sōa Nebuchadnezzar khan Jehoiachin apakasin Zedekiah kha Judah leh Jerusalema reng aleimanchang jo.

¹¹Zedekiah khan Judah reng ahongchang pha akum 21 katluk jo, khana ama’n Jerusalema kum 11 vai aleirôn.

¹²Ama’n RŌNGPU dōina setna aleitlo jo khana RŌNGPU ṭong kahrile sânkathem Jeremiah ṭong kha insinsak tak a rangei mak a kae.

¹³Zedekiah khan Reng Nebuchadnezzar chunga adōi jâra ama’n Zedekiah kha rumhrat tak a ṭongpek ajuina sik a Pathen rahminga inhâksêrna amanneia kae. Ama khan RŌNGPU Israel Pathen hneng ahong inhe sik leh malung athleng sik kha rahe kasetak a leihnōm mak.

¹⁴Khava chunga, Judah hlamkakeihei, thempuhei, khana mipuihei khan ankimvea aka-om jât ralak-hei limsyem kamukna setna omchen kha anleijui jo hei, khana RŌNGPU ama khet tamanthengsōt Bek-inn kha anmanbōk joa kae.

¹⁵RŌNGPU, anpu sōnhei Pathen khan amihei gîkna kapek sik a sânkathem ajōngtir manjôn hei, ajârchu ama’n anmani leh Bek-inn kha aṭhensōt hnōm heia kae.

¹⁶Tâk-kha anmani’n Pathen ṭongkarônhei kha sem manlona annei heia anṭonghri donpek mak hei khana asânkathemhei kha anmanuisō pek hei, khana achaina amihei chunga RŌNGPU hnuk natna kha inhnak hêr joa inkhatbek tlânsōt tor mak jo hei.

¹⁷Khava jâra RŌNGPU’n Babylon reng kha ankabuhlu sik a aheiṭhōi. Rengpa khan Judah retherhei kha Bek-inn shunga kapha aleithat hei. Ama’n rether leh kater, pase leh nuhmei, akana leh akadam ṭhenloa lungset leirôn mak hei. Pathen in ankhengpet a ahnenga aleipek sōt hei.

¹⁸Babylon reng khan Bek-inn, Bek-inn karōi bukna, rengpa leh aṭōn karônhei karōihei kha aleichom hei, khana Babylona heirakip aleichoisō jo hei.

¹⁹Ama’n Bek-inn leh khōpuihei hmei aleiro hei, reng-innpuihei leh karōihei seng khana khōpui bang aleivōk-khōi hei.

²⁰Ama’n akahring senghei kha Babylona aṭhōi hei, khana khan Persia Rengram ahei sōksōt mak hma seng ama leh asōnhei kha anmani’n sōk kapōa anleirazen hei.

²¹Khava jâra RŌNGPU’n Jeremiah sânkathem hnenga ṭong alei manhridek kha hui katlung jo: “Ram hi kum 70 ramhânga ka-om sik, nit loa aleika-om jo Châmhngat kani inhngatna kha nit mathlungna sik a kae.”

²²Persiahei reng Cyrus khan rengkalen achangna kum hma inkeia khan, RŌNGPU’n sânkathem Jeremiah hneng ṭong aleimanphông kha hui amathlung jo. Hiva athōia ṭongpek-hei hi Cyrus khan amasōna sik khana mazetsōt a arengram shung rakip a teisōtna sik a tirna sik aleikahnot jo:

²³“Hivahi Persia Rengkalen, Cyrus ṭongpek kae. Marvân Pathen RŌNGPU’n kei hi vânhnōi pumpuia vaikarôn amanṭang jo eng khana ama sik a Bek-inn inkhat Judah ram a Jerusalema syemna sik a amanngan jo eng. Tûnchu, nangni Pathen mi rakip, sonting se jo ruh khana nan-Pathen RŌNGPU’n ompui chei rasoh.”