Read Komrem THUHMINGHEI INHNINA 6 Bible Online

THUHMINGHEI INHNINA 6 - Komrem bible

THUHMINGHEI INHNINA 6

¹Khava sōa Reng Solomon in ader, “RŌNGPU, nang in sumtuk shunga leh inthim kâra om sik namadu jo.

²Tûnchu kumleikōa na-omna sik hmun, nang sik a bek-inn kalentak kasak jo.”

³Israel mipui rakip khana khan kangir hei. Reng in inhea ahnget hei khana anchunga Pathen mahâmṭhatna aderpek hei.

⁴Ama’n ati, “Israelhei Pathen RŌNGPU kha choi ka-ânna om rasoh! Kapa David hnenga intepna aleisyem kha anit jo; ama’n hinga aleiti kha,

⁵‘Egypt a inphut ke’n kamihei kaṭhōisōt lai heia inphut tûn katlung, ke’n Israel ram shunga bek-inn sakna sik, kei kamukna sik khōpui inkhatbek kadei mak eng, khana kami Israel kaching sik a tûte inkhat kadei mak eng.

⁶Tâk-kha tûnchu ke’n Jerusalem hi kei kamukna sik a kakadei jo, khana David nang hi kamihei vai karôn sik a kakadei jo che.’”

⁷Khana Solomon in amanjōm, “Kapa David in Israel Pathen RŌNGPU kamukna sik a bek-inn sakna sik aleimantluk,

⁸tâk-kha RŌNGPU’n ahnenga ati, ‘Kei sik a bek-inn sakna sik namadu kha kadik che,

⁹tâk-kha nang in sak hêrmak tin che. Kei bek-inn kasak sik khachu nasapa khet kha kae.’

¹⁰“Tûnchu RŌNGPU’n a-intepna kha anit jo: Ke’n kapa kahlânga Israel reng kachang jo eng, khana ke’n Israel Pathen RŌNGPU kamukna bek-inn kha kasak jo.

¹¹RŌNGPU’n Israel mipuihei leh intepna aleisyem hlungpek omna, Intepna Bôm kha Bek-inn shunga kada jo.”

¹²Khava sōa mipuihei hma kunga Solomon in kasea maichâm hma vakangira akut akalânga derna anei. (

¹³Solomon in sum-êng vânga hmun inshâng inkhat aleisyem khavakha tetlâng laia amatung. Khavakha adung avai in-angtling metre 2.2 et kae, khana metre 1.3 inshâng. Hiva hmun inshânga hin amatunga, mi rakip hmit hmun a amarkhup athlep a, marvânting akut akalânga kae.)

¹⁴Ama’n derna anei, “RŌNGPU Israel Pathen, marvân leh ralei pumpuia nang kapō pathen om mak. Namihei leh naṭong tepna kha nang in nanit khana anmani’n malung pumpuia naṭong anjui inchu anchunga nalungsetna kha namalârpek heia kae.

¹⁵Kapa David hnenga naṭong leitepna nanit a tuning chu ṭong rakip kha hui katlung jo.

¹⁶Tûnchu, Israel Pathen RŌNGPU, keipa hnenga nalei intepna aralak-hei kha’m nit mathlung hei roh, ama tatlo kapōa asōn he’n inrintak a nadân anjui inchu ankâra inkhat in Israel a ahei tik a reng kachanga vai arôn sik kae tia ahnenga naleihri.

¹⁷Achang jâra tûnchu, Israel Pathen RŌNGPU, nasōk David hnenga nalei intepna rakip kha hui tlung jo rasoh.

¹⁸“Tâk-kha, Eh Pathen, nang kadiktak a raleia hin pase leh nuhmeihei kâra aka-om tor sik che mo? Marvân pumpui inum nang chu aken mak tin, khan chu heikhong inmo hiva kei tasak Bek-inn hin aken sik che?

¹⁹RŌNGPU ka-Pathen, kei hi nasōk eng kae. Kaderna hi arangei pek roh khana kangekna che hi apek roh.

²⁰Hiva Bek-inn hi sûn leh jân ensui roh. Hivahi nang kamukna akachang sik kae tia nang le’ntep che, achang jâra ke’n hivahi kahnget a derna kanei pha kaṭong arangei pek roh.

²¹Kei derna athei pek roh khana namipui Israel he’n hiva hmun hi anhnget a derna annei pha anderna theipek hei roh, Marvâna na-inna khan kanderna kha thei inna arangei mandam roh.

²²“Mipui he’n khat leh khat themmô inpekna anneia hiva Bek-inn shunga anhonga, ṭhena neimak ung tia intepna sik a anheiṭhōi hei pha,

²³O RŌNGPU marvâna leirangei roh khana nasōk-hei kha anṭong tanpek hei roh. Antlona dungjuia akaṭhepa kha karâkna pek roh, ṭhenakase kha masō roh.

²⁴“Nahnenga setna antlo jâra nami Israel kha a’nrepui he’n antor hei pha khana anmani’n nahnengting anhong inhea hiva Bek-inna anhong inchu, khana rangei mandamna sik a insinsaktak a ander che’nchu,

²⁵marvâna leirangei hei roh. Namihei setna rangei mandam hei roh khana anmani leh ansōnhei hnenga napek jo hei ram a khan heiṭhōi male hei roh.

²⁶“Nami he’n nang kadōia setna antlo jâra khō namansûr mak pha, anmani’n anmalung anthlenga anhong insira hiva Bek-inn hi anhei hnget a nahnenga ander che pha,

²⁷O RŌNGPU, marvâna inphut leirangei hei roh khana Israel mipui, nasōk-hei setna kha rangei mandam hei roh. Khana RŌNGPU hiva naram, namihei hneng ankarōi akachang ṭhak sik a napek jo ram chunga hin khōsûr heitir roh.

²⁸“Ram shunga hin vonṭâm aleng joa khana natse asōk joa khana kanisat in hmuchi amanhmangsō joa khana khaikhu he’n ansâk manhmang joa khana namihei hi ankadōi he’n re ansō jo heia, ankâra hri leh rai khana nat leh sat achōr jo pha,

²⁹anmani derna kha theipek hei roh. Nami Israelhei kâra malung natna inkhat jâra ankut ankalânga hiva Bek-innting hin anheider inchu,

³⁰anderna kha theipek hei roh. Marvâna na-inna khan leirangei hei roh khana rangei mandam hei roh. Nang rōk in mihring mandonna namanhret. Kanrahōi kasōk hrep a keini inkha-khat arazen roh,

³¹nami he’n ankajana sik che khana kanpu sōnhei hneng naleipek jo ram shunga an-omlai seng naṭong anjuina sik che hi tlo roh.

³²“Hmun kahlatak a aka-om ram hlop mihei khan nalenna, naratha neina khana nang in ṭōn tlo sik a na’ntluk ṭhakna kha anthei pha, khana anmani hiva Bek-inna hin derna sik a anhong pha,

³³anderna kha theipek hei roh. Na-omna marvâna khan leirangei hei roh khana natlopek sik a anderna che kha tlopek hei roh, nami Israelhei tatlo kapōa, vânhnōia mihe’n anmanhret chea naṭong anjuina sik. Khan chu hiva kei tasaksōt Bek-inn hi nang kamukna sik hmun kae tia anhong manhret sik jo.

³⁴“Nang in namihei kha ankadōihei re kasō sik a ṭong napek hei pha khana nahnenga ander che pha, khova hmun a an-om inum, nang in nakadeisōt khōpui leh hiva ke’n kasak pek che Bek-inn hi anhei hnget pha,

³⁵anmani derna kha theipek hei roh. Marvâna inphut heirangei hei roh khana torna kha pek hei roh.

³⁶“Nami he’n nang kadōia setna antlo pha, khana set akatlomak tûte inkhat an-om mak jo pha, nahnuknat a ankadōihei namantor hei pha khana rehring sura ram hlop a anṭhōi hei pha, ram kahlatak achang inum,

³⁷namihei derna kha theipek hei roh. Khava ram a khan anmalung anthlenga derna annei inchu, anmani heituk a setna kasip leh akaṭhamak hei mo ti kha anbeia anhrisōt inchu, O RŌNGPU anderna kha theipek hei roh.

³⁸Khava ram a khan kadiktak leh malung inthengtak a anmalung anthleng inchu, khana hiva kanpu sōnhei hneng naleipek ram hi, nang in nakadeisōt khōpui hi, khana ke’n kasak pek che Bek-inn hi anhei hnget a anheider che’nchu,

³⁹anderna che kha leitheipek hei roh. Marvâna na-inna leirangei pek hei roh khana lungset a rôn hei roh, namihei setna rakip rangei mandam hei roh.

⁴⁰“Tûnchu, Eh ka-Pathen, kanchunga ahei-en roh khana hiva hmun a derna hei hi rangei pek hei roh.

⁴¹Tûnchu thōi jo roh, RŌNGPU Pathen, naratha neina manhretna, Intepna Bôm leh inṭhōia, Bek-inna hlut inna ahei tik a om jo roh. Nathempu hei kha antlona rakip a mahâmṭhat pek hei roh, khana nami rakip hei kha nang akaṭha nachang jâra inpâk a om hei rasoh.

⁴²RŌNGPU Pathen, nang in nakadeisōt reng kha hlonsōt mak roh. Nasōk David hnenga lungset narônna kha mandonsōt roh.”