Read Komrem THUHMINGHEI INHNINA 7 Bible Online

THUHMINGHEI INHNINA 7 - Komrem bible

THUHMINGHEI INHNINA 7

¹Reng Solomon in derna achai jo pha, marvâna inphut hmei kajōnga inthoina tōkna kha kâng aphut jo, khana RŌNGPU omna vâr kade rik-rak khan Bek-inn kha kasip jo.

²Bek-inn kha vâr ade rik-rak jo jâra thempuhei hlut tor mak jo hei.

³Marvâna inphut hmei ajōngkatla leh vâr in Bek-inn asipsō kha mipui he’n anhmu pha, kehlam chunga khan anhmai in ralei an-ena inbok jo hei, ama ṭhatna leh ahei tik a lungsetna anei jâra khan Pathen kha kamukna leh choi ka-ânna annei jo.

⁴Khan chu Solomon leh mipui rakip in RŌNGPU hneng inthoina tōkna annei jo.

⁵Ama’n sehrat 22,000, kemōng 120,000 hei inloikhômna inthoina atōk hei. Khang’khan ama leh mipui in Bek-inn kha tōkna annei jo.

⁶Thempuhei kha anmani mannganna hmun et heia kangir jo hei, anmani anhnget heia Levihei kha kangir hei, David in aleipek hei mahring kanei anmatua kangir heia RŌNGPU anchoi ka-ân, David in alei manngan hei kapōa hiva hla hi ansak, “Ama lungsetna kha kumleikōa kae!” anti. Mipui he’n anngir pha, thempu he’n pengkun anheituma kae.

⁷Solomon in alaiṭima, Bek-inn hmatinga hmun, sumpuk kha mantheng sōtna anei jo khana khan apum a rona, hmuchi inthoina, khana inloikhômna hmethai hei kha tōkna anei hei. Ama’n hinga atlo hichu ama’n aleisyem sum-êng maichâm kha hihei rakip tlona sik a asinrei jâra kae.

⁸Solomon leh Israel mipui in Rabuk Kût kha ni 7 anleinit. Khana khan mi katamtak sak tinga Hamath Rakanna leh thlâng tinga Egypt ramri katlunga mi kahong hei.

⁹Anmani maichâm tōkna sik a ni 7 leika-om hei khana revei sik a khan ni 7 kakhea ka-om nôk hei. Hnung kakhôrpen ning anmani’n achaina revei antloa kae,

¹⁰khana abân kania thla 7 tlukna kani 23 ning, Solomon in mipuihei kha an-innting atir male jo hei. RŌNGPU’n Israel mipuihei leh David, khana Solomon hnenga mahâmṭhat apek heirakip jâra khan anmani le’npâk hei.

¹¹Rn Solomon in Bek-inn leh reng-innpui sakna achaisō leh, hme kasōtak a aṭōn mantlukna kha achaisō tak leh,

¹²RŌNGPU’n jâna ahnenga jōng inlâra kae. Ama’n ahnenga ati, “Nang derna kha kathei jo, khana hiva Bek-inn hi kei hnenga inthoina tōkna sik a kamanṭhat jo.

¹³Ke’n khō kamansûr mak pha, a-emak leh hmuchi kasâk sō sik a khâikhu a-emak leh kamihei chunga hrise kahei tir pha.

¹⁴anmani’n kahnenga derna anneia, anmalung anthlenga anṭhatmak tlona inphut anhong inhea achang inchu anderna kha marvâna kathei pek sik hei, ansetna karangei mandam sik hei, avea anram kha kara kamanpung pek sik hei.

¹⁵Hiva Bek-inn hi ka-ensui sik, khana hiva hmun a derna tōkna heirakip kha thei pekna sik a intluk ṭhak sik eng,

¹⁶ajârchu hivahi ahei tik a kei kamukna sik hmun inkhat a ke’n kakadeisōt jo khana kaman thengsōt jo kae. Ke’n ahei tik a ka-ensui ṭhak sik khana kahrung ṭhak sik kae.

¹⁷Nang in napa David in aleitlo kapōa, malung kahlut a narazen enga, kadân najuia, khana ke’n ṭong kapek che rakip kha natlo’nchu,

¹⁸Napa David hnenga Israel hi asōn he’n ahei tik a vai anrôn sik tia kaleihri kha ke’n kanit sik.

¹⁹Tâk-kha nang leh nami he’n dân leh ke’n kapek chei ṭongpek kha nanjui hêrmak inchu khana pathen ralak nankamuk jôk inchu,

²⁰ke’n kapek chei ram khana inphut kalosōt sik chei kae, khana hiva Bek-inn, kei kamukna sik a kaman thengsōt hmun hi kadahlon sik kae. Hmun rakip a mihe’n khavakha anhnōise sik khana hnōisetak a antlo sik jo.

²¹“Tûntak chu Bek-inn hi kajana kalentak a anlanei, tâk hnung leh chu ahnenga akathleng lele mi rakip in inlak ansak sik khana inder sik hei, ‘Hiva ram leh Bek-inna hin heisa mo RŌNGPU’n hinga atlo?’

²²Mipui he’n anmasôn sik, ‘Hivahi anmani’n RŌNGPU, anpu anpahei Egypt a inphut anhei kaṭhōisōt kha andahlon jâra kae. Anmani pathen ralak-hei leh inthlopna anneia ankamuk jo hei. Khava jâra khan RŌNGPU’n hiva inrengna hi anchunga amathlung jo kae,’ anti sik.”