Read Komrem THUHMINGHEI INHNINA 9 Bible Online

THUHMINGHEI INHNINA 9 - Komrem bible

THUHMINGHEI INHNINA 9

¹Sheba rengnu khan Reng Solomon rahming inthang kha aleithei jo, khana amanu kha ahnenga honga ṭong intak hei der a enmansinna sik a Jerusalema kahong. Amanu’n akahrung mi katamtak ahe’nṭhōi hei, sharîngsei hei kha maru-marâng, hira-mukta, khana sana katamtak phur ahei manrôn hei. Solomon leh amanu kha an-intō pha, amanu khan amandon seng kha ṭongderna anei jo.

²Ama’n khahei rakip kha amasôn jo; ama sik a hri manchênna kha a’ntakna heite om pek mak.

³Sheba rengnu khan Solomon singna kha athei jo khana ama tasak reng-innpui kha ahmu jo.

⁴Ama dokhâng chunga thlai dônna, ama ṭōnpui karônhei omna innhei, reng-innpuia ṭōn katlohei inloikhômna leh pōn inre et a si leh keina, revei shunga ama inzen sōk-hei pōnsi, khana Bek-inna inthoina atōknahei kha amanu’n ahmu jo hei. Khahei seng khan amanu khan inlak asak joa kaphuk sântor mak jo.

⁵Amanu’n rengpa hneng ati, “Nang leh nasingna chungchânga ke’n karam a kalei thei kha kadik jo!

⁶Kei kahong leh kahmit khet a kahmu mak lai seng mihei hripekna eng kha leitaksen tor mak eng.

⁷Nang sepa katlohei, nang omna hmun a aka-om khana nasingna ṭong akathei hei heituk a mahâm kaṭha hei mo!

⁸Na-Pathen kha manpâk a om rasoh! Nang reng amanchang chea, ama rahminga vai amanrôn chea nang a-ompui che hi heituk a ama akatlai jo mo ti kha amalâr. Ajârchu ama’n ami Israel kha alungset, ahei tik a kahringa man om sik hei amadu, dân leh akadik kha namanleng ṭhakna sik a anmani reng amanchang che kae.”

⁹Amanu’n akutchoihei kha Reng Solomon hneng aleipek: sana kilograme 4,000 kakhea, maru-marâng leh hira-mukta katamtak hei. Sheba rengnu’n Reng Solomon hnenga aleipek maru-marâng kapōa akaṭha ralak le’nhmu mak a kae. (

¹⁰Reng Hiram leh Reng Solomon rakōng katôrhei, Ophir a inphut sana heikachoi hei khan juniper thing leh hira-mukta anheichoisa a kae.

¹¹Solomon khan thingtlōn kha Bek-inn chung kena leh areng-innpui sakna, khana hlakasak hei serângdâr leh ṭingṭang syemna ahmang châk hei. Khava kapō kha Judah ram shunga hmalai khan le’nhmu phung hêrmak a kae.)

¹²Rn Solomon khan Sheba rengnu tader rakip kha aleipek. Hihei hi amanu’n ahnenga kutchoi ahei rôn kha leh in-anghrep a pekmalena khana achung chôna peksa nôkna hei kha kae. Hivasōa amanu leh akahrung hei seng kha Sheba ramting inle jo hei.

¹³Akum katai invei katlohei leh neinâk katamtak akajōrhei ramsêrṭhei pekna chungchôna,

¹⁴Reng Solomon in sana kilograme 23 kapō alei rahlângsa. Arabia renghei leh Israel ramkeia vaikarôn he’num ahnenga sana leh dangka anheirôn pek.

¹⁵Solomon in pho 200 aleisyem, inkhat et kha sana antakhêng jo kilograme 7 kapō vânga ankatōm,

¹⁶khana akasindet pho 300 asyem hei, inkhat et kha sana antakhêng jo kilograme 3 vânga ankatōm. Ankhenga Lebanon Ratu shunga Inn kalen shunga ada hei.

¹⁷Rengpa’n reng in-ongna kalentak anei. Khava ṭhen khat chu saipui ha vâng ankatōm, aṭhen khat chu sana intheng vânga ankatōm.

¹⁸Reng in-ongna kena kha kethonna 6 indo, khana khan kechōnna anrabeksa, sana vânga ankatōm. Reng in-ongna asir et a khan kut manhngamna anmando hei, asir et a khan shabakkai lim anman ngir hei.

¹⁹Kethonna hei chunga shabakkai 12 lim, kethonna inkhat et ahmor heia anrabek hei. Hinghiva reng in-ongna hi rengram inkhatbek a la-om mak a kae.

²⁰Reng Solomon tui inna kōklei rakip hei kha sana vânga ansyem hei, khana Lebanona Ratu Inn kalena be leh bûr hei kha sana intheng rōk hei kae. Solomon pha shunga dangka chu mankatam inkhat a inteimak a kae.

²¹Ama’n tuipuia akase rakōng rup, Reng Hiram rakōng rup-hei leh a’nthōi ri hei anei hei. Ama rakōng rup-hei kha kum 3 akaia inna hong inle heia, dangka, saipui ha, yông kalen, khana yông kasinhei anheirôn hei.

²²Rn solomon kha vânhnōia reng rakip hei kanek a kahao khana kasing chet a kae.

²³Mi rakip in ahnenga Pathen tapek singna ṭong inngei sik a inbek puina annei ri.

²⁴Mi inkhat et in Solomon hnenga kutchoi anheirôn pek, dangka neinâk, pōn leh der, hmangchâk, maru-marâng, shakorhei, khana shakor kasinhei. Hivahi akum akum a injom ṭhak a kae.

²⁵Reng Solomon in ashakor gâri leh shakorhei dana sik a inn 4,000 anei, khana remi shakor 12,000 anei hei. Ṭhahrep chu Jerusalema ada hei khana alakseng kha hmun hlop-hlop a ada hei.

²⁶Ama kha Euphrates Tuidunga inphut Philisti katlung leh Egypt ramri katlunga ramṭhen shunga chunghnungpen vaikarôn leikae.

²⁷Ama vairôn shunga dangka chu Jerusalema hlung kapōa anhmu, khana cedar kha Judah hmebung kunga sycomore kung kapōa katam hêr hei.

²⁸Solomon in Musri a inphut leh ram katamtak a inphut shakor aheiṭhōi manhlut hei.

²⁹Solomon thuhming katamtak a’nphutna’n a’nchaina katlung Sânkathem Nathan Thuhminga, Shiloa Ahijah Ṭongsâna, Sânkathem Iddo Hmangtalâra, khava Israel Reng Jeroboam vairônna chungchânga omchen akahrisa lekharabu heia inzet hei.

³⁰Solomon in Jerusalema Israel pumpui chunga kum 40 vai aleirôn.

³¹Ama kathia David khōpuia anhre, khana asapa Rehoboam in athlenga reng kachang.