Read Komrem EZRA 4 Bible Online

EZRA 4 - Komrem bible

EZRA 4

¹Israelhei Pathen, RŌNGPU Bek-inn kha rehring sura ahon’le he’n sak mantherna anphut jo ti hi Benjamin leh Judah hei ka-en kada he’n anleithei jo.

²Khava jâra Zerubbabel leh phungṭhen alu kachang hlamkakeihei inhmupui sik a vakase heia anti, “Bek-inn sak nôkna kha bôm chei rung. Nangni takamuk Pathen kha keini’m kankamuk, khana hiva hmun a omna sik a ani heikatir Assyria rengkalen Esarhaddon pha khana inphut inthoina kanta heitōk ṭhak jo kae.”

³Zerubbabel, Joshua khana phungṭhen alu kachang hlamkakei he’n anti, “Kan-Pathen RŌNGPU bek-inn sakna sik a nangni inthōpuina rangei mak ung. Persia reng kalenpa Cyrus ṭong pekna ung dungjuia kanbinga kansak sik.”

⁴Khana ram shunga aka-om he’n ansak makna sik a Jehudihei kha maṭhitna leh malung mathlâkna antlo pek hei.

⁵Anmani’n Persia vaikarôn leh ṭōnpui karônhei kha anmani dōina ṭōn tlona sik a sêr marûk a anpek hei. Khang’khan Cyrus leh Darius vairôn shung senga hivahi anleitlo ṭhak a kae.

⁶Rengkalen Xerxes vairôn a’nphutbia, Jerusalem leh Judah a ka-om mihei ka-en kada he’n anchunga maherna lekha inzet inkhat anheichoi.

⁷Ave nôk a, Persia rengkalen Artaxerxes vairôn pha, Bishlam, Mithredath, Tabeel khana anloi he’n rengkalen hnenga chithi anleimazet. Chithi kha Aramaic ṭonga anhei mazet, khavakha antei pha leh malesōt sik kae.

⁸Rehum, ram vaikarônpa leh Shimshai, ramṭhen lekha inzetpa’n Artaxerxes hneng Jerusalem chungchânga lekha anmanrôn:

⁹“Ram vaikarôn Rehum, khana khava ramṭhen a lekha inzet Shimshai, anloihei, ṭongkatanhei, khana alak ṭōnkarôn rakip, anphutbia Erech, Babylon khana Elam ram a ka-om Susa miheia inphut kae,

¹⁰hihei hi leh inṭhōia mihlop-hei, akalen ratha kaneitak Ashurbanipal in an-inn et a inphut athonsōt heia Samaria khōpuia leh tlaitlâk Euphrates ramṭhen a khō amathlâk hei kha inveisa hei.”

¹¹Chithi ṭong kha hi kae: “Rengkalen Artaxerxes hneng Euphrates tlaitlâk intonga mi, nasōk heia inphut ṭong manrôn kae.

¹²“Rengkalen nang tamanhret sik a kantamadu khachu nang ramṭhen ralak a inphut akahong Jehudihei kha Jerusalema khō ansât jo khana khava akaṭhamak leh re kadōi khōpui kha ansak manther jo. Banghei kha sakmanther anphut jo khana inranga anchai sik jo.

¹³Reng Kalûr, hiva khōpui hi ansak manther a khana abanghei hi anchaisōt jo’nchu, mihe’n ramsêrṭhei pek mak jo hei ning, khana reng ramsêrṭhei khômna kha hong katlôm sik jo.

¹⁴Tûnhin, keini hi Reng Kalûr thōia aka-om ung kae, hiva akasōk sik omchen hi madu mak ung, khava jâra keini mandonna chu

¹⁵napu, napa hei phat a anta leimazet lekhahei kha manjongsōt hei roh. Khanga natlo’nchu, hiva khōpui hi re katlohrat khana tenlaia inphut renghei leh ramṭhen vaikarônhei chunga khōdeng theina kapek hei kae tia nahmu sōt sik. Amihei hi ahei tik a vairôn intak heia kae. Khava jâra khōpui hi anta leisukset jo kae.

¹⁶Khava jâra keini manhretna khachu hiva khōpui hi ansak manther a khana abanghei hi’m anhei chaisōt jo’nchu, Reng kalûr nang in Euphrates tlaitlâk intonga ramṭhen hi vai rôn tor mak jo tin che.”

¹⁷Rengkalen in hiva masônna hi aleimanrôn hei: “Ramṭhen shunga Ram vaikarônpa, Rehum leh lekha inzetpa, Shimshai khana Samaria leh Euphrates tlaitlâk tinga aka-om anloihei seng hnenga chibei kahei pek chei.

¹⁸“Nangni’n nantahei manrôn eng lekha kha anmalea kahnenga anteipek jo eng.

¹⁹Khava ensuina sik a ṭong kamasō jo, tenlaia inphut Jerusalem hi reng kadōia re katlo ṭhak khana retlo leh khōdeng theina kasip ṭhak leikae jo.

²⁰Ratha kaneitatak reng he’n khana khan vai anleirôn khana Euphrates tlaitlâk a ramṭhen rakip a vai anleirôn, ramsêrṭhei leh hleisân anleipek hei.

²¹Khava jâra, abâna ṭong kahei pek mak kârseng chei khōpui sak mantherna kha anhaina sik ṭong pek hei ruh.

²²Kei lungdo chunga heite ṭhatmak asōk makna sik a hivahi inranga tlo ruh.”

²³Artaxerxes a inphut lekha kha Rehum, Shimshai khana anloihei hmaikunga anteisōt lim leh inranga Jerusalema kase heia Jehudihei khōpui sakmanther kha anmanbâng jo hei.

²⁴Persia rengkalen Darius vairôn kum 2 tlukna khan Bek-inn sakna ṭōn kha kabâng heia inhnga jo hei.