Read Komrem EZRA 5 Bible Online

EZRA 5 - Komrem bible

EZRA 5

¹Khava pha khan sânkathem 2 Haggai leh Iddo sapa Zechariah khan Israel Pathen rahminga Judah leh Jerusalema ka-om Jehudihei hnenga ṭong anhri manphut jo.

²Shealtiel sapa Zerubbabel leh Jehozadak sapa Joshua he’n anṭong kha anthei pha, Jerusalema Bek-inn kha sak anphut nôk jo, sânkathem 2 he’n an-inthōpui hei.

³Khava phatak a tlaitlâk Euphrates a ram vaikarônpa, Tattenai, Shethar Bozenai, khana anloi ṭōnkarônhei Jerusalema kahong heia ṭong anleider hei: “Tu’n mo Bek-inn hi sakna sik leh ahmangchâk syemna sik a ṭong apek chei?”

⁴Anmani’n Bek-inn sakna an-inthōpui hei rahming rakip kha’m andersa hei.

⁵Tâk-kha Pathen in Jehudi hlamkakeihei chunga aleihrung ṭhak hei khana Persian ṭōnkarônhei khan Darius rengpa hnenga lekha mazetna, aṭong masônna kha anthei mak leh kârseng anchunga heite tlomak sik tia anmandon jo.

⁶Reng kalenpa hneng antamanrôn ṭong kha hivahi kae:

⁷“Rengkalen Darius, kamōng tak a vai narôn chang rasoh.

⁸“Reng Kalûr in namanhret sik kae khachu keini Judah ramṭhen shunga vakase jo ung Pathen kalen Bek-inn hlung kalen tatak vânga antasak leh abang heia thingtlōn antakhang hei kha kanvahmu jo. Ṭōn hi kasing tak a leh injentak a antloa kae.

⁹“Bek-inn sak mantherna ratha hi tu’n mo apek hei ti hi keini’n anhlam kakeihei hneng kander hei.

¹⁰Hiva ṭōn tlona hin tu mo anhlam kakei akachang hei ti kha mantheina sik chea anrahming um kander hei.

¹¹“Anmani’n anmasôn ung, ‘Keini hi marvân leh ralei Pathen sōk ung kae, Israel reng ratha kaneitak hei khan kum katamtak hma khan ahma kakeia anta leisak a anta leimanret Bek-inn kha kanta sakmanther kae.

¹²Tâk-kha kanpu kanpa he’n Marvân Pathen kha ahnuk anleimannat jâra Kaldea phung hruia Babylon rengpa Nebuchadnezzar kha aleimantor heia kae. Bek-inn kha anleisukset a mihei kha rehring sura Babylona anleiṭhōi hei.

¹³Khava sōa Reng Cyrus in Babylon rengkalen ahong changna ahma inkeipen kum a khan Bek-inn kha sakmanther nôkna sik a ṭong aleimasō.

¹⁴Jerusalem Bek-inna sana leh dangka, be leh bûr Nebuchadnezzar in alosōt a Babylona bek-innheia aleida hei kha reng Cyrus in ahei pek male hei. Cyrus kha khava be leh bûr hei kha Sheshbazzar intipa, Judah ram a vai karôn sik a akadeipa hneng pek sōtna anei hei.

¹⁵Rengkalen khan khahei seng kha losōt pet a Jerusalem bek-inna choi malena sik khana Bek-inn kha hma aleingirna hmun a sak mantherna sik a ahnenga amanthei.

¹⁶Khava jâra Sheshbazzar kha kahonga innhmun adeng jo; khana inphut tûn katlung inn sakna kha anmanjom, tâk-kha Bek-inn kha chailoa laka-om ṭhak a kae.’

¹⁷“Tûnchu, Reng Kalûr, natlâi tor inchu, Babylona reng hrui hei lekha mazetna shunga Cyrus in Jerusalema Bek-inn sakna sik ṭong pekna aleinei mo aleinei mak mo ti kha’m a-ensui pek unna hiva chungchânga rengpa lungdo kha ajōng manthei roh.”