Read Komrem EZRA 6 Bible Online

EZRA 6 - Komrem bible

EZRA 6

¹Khava jâra rengkalen Darius in Babylona antada renghei lekharabu hei kha jongsōtna sik a ṭong masōna anei jo.

²Tâk-kha Media ramṭhen shunga Ekbatana khōpui heia lekha inze kha anleihmu jo khana hiva ṭonghei hi inzet hei:

³“Cyrus vairôn kum hma inkeia rengkalen khan inthoina leh roa tōkna sik a Jerusalema Bek-inn kha sak mantherna sik ṭong pekna aleinei hei. A’nshâng in metre 27 khana avai metre 27 nanta manchang sik kae.

⁴Abanghei kha hlung 3 athō dunga mansena chunga thingtlōn inkhat et khang nôk heia sak sik leikae. Sêr kahlut sik rakip reng karōi bukna inphut pek sik hei kae.

⁵Khana Jerusalem Bek-inna inphut sana leh dangka be leh bûr hei Reng Nebuchadnezzar in Babylona aleichoisōt hei kha Jerusalem Bek-inna anhmun et a damale sik hei kae.”

⁶Khava sōa Rengkalen Darius in hiva ṭong masônna hi aleitir: “Tlaitlâk Euphrates tinga ram vaikarôn Tattenai khana Shethar Bozenai khana tlaitlâk Euphrates a naloi ṭōnkarônhei seng hnenga hrina kae. Bek-inna inphut sesōt ruh

⁷khava sakna kha ting mak hei ruh. Judah ram vaikarônpa leh Jehudihei hlamkakei he’n Pathen Bek-inn kha hmatak a aleingirna hmun a sakmanther nôk hei rasoh.

⁸Hinahin sak mantherna kha nan-inthōpuina sik a ṭong kahei pek chei kae. Ṭōn kha heite a’nkhâr makna sik a, anmani sêr manhlut sik rakip kha tlaitlâk Euphrates ram a inphut ramsêrṭhei vânga pek sik hei kae.

⁹Ani katai, Jerusalema thempu he’n antarangei rakip ngekna chei kha nangni’n sôilo jen a nantapek sik hei kae: Marvân Pathen hnenga roa tōksōt sik a sehrât chete hei, kemōng, achangmak leh kemōngte khana gehu, chi, ju leh olive thai nantapek sik hei kae.

¹⁰Anmani’n Marvân Pathen tarahlâng thei inthoinahei a’ntōksōt theina sik khana kei leh kasapahei sik a vâng ander theina sik a hivahi a’ntlo sik kae.

¹¹Ke’n ṭong kapeksa chei kae khachu tu inkhat in hiva ṭongpek ajuimak inchu a-inna inphut thingtlōn inkhat losōt a ahmor manngeijap a amipa taksa kha sun hlon sik kae. Khana a-inn kha neinâk kabōk hei manbukna manchang sik kae.

¹²Jerusalem kha ama kamukna sik a indeisōt Pathen khan, reng leh jât ralak anchanga, hiva ṭongpek hi vōkkhōina sik akatlo leh khava hmun a Bek-inn manhmangna sik akatlohei kha suk manhmang rasoh. Hiva ṭongpek hi Darius ke’n kapek kae. Hivahi pui katluk a jui sik kha kae.”

¹³Ram vaikarôn Tattenai, Shethar Bozenai, khana anloi ṭōnkarôn he’n rengkalen ṭongpekna dungjuitak a anleitlo jo.

¹⁴Sânkathem Haggai leh Zechariah he’n mathokna anpek heia, Jehudi hlamkakeihei Bek-inn sakna kha hma ansepui hêra kae. Israel Pathen leh Cyrus, Darius khana Persia reng Artaxerxes hei ṭongpek dungjuia Bek-inn sak kha anleichai joa kae.

¹⁵Bek-inn sak kha Darius rengkalen vairônna kum 6 tlukna Diva thla ni 3 tluk ning anchai jo.

¹⁶Khava sōa Israel mihei, thempu, Levi khana rehringa surmi ajōng inle hei leh Bek-inn kha inpâktak a tōksōtna annei jo.

¹⁷Tōksōtna khan sehrâtche 100, kemōng 200, kemōngte 400 inthoina anleitōk, khana set-inthoina keche 12 Israel phung rakip he’n inkha-khat antōksōt a kae.

¹⁸Moses lekharabu a’nzet dungjuia Jerusalema Bek-inna ṭōn katlo sik thempuhei leh Levihei kha inlôikhômna ansyempek heia kae.

¹⁹Rehringa ajōng inle mipuihei khan Rakan Kût kha anôk kum a thla hmakakei ni 14 tluk ning anleitlo.

²⁰Thempu leh Levi rakip anbinga insi inthengna antloa beklanga intheng jo hei. Levi he’n rehring surmi ajōng inle hei sik, thempuhei leh anbinga sik a ran anleithat hei.

²¹Inthoina kha Israelhei rehring sura inphut ahong inle hei khana ram shunga aka-om mihlop-hei, khōvel omchen kadahlon rakip leh Israel Pathen RŌNGPU inmuk sik a akahong seng in anleisâk a kae.

²²Che philo Buhlom Revei kha ni 7 anleitlo. Rōngpu’n Assyria rengkalen kha anchunga lungsetna amannei heia, ama’n Israel Pathen Bek-inn sak nôkna a’nthōpui hei jâra anmani inpâk hêr heia kae.