Read Komrem EZRA 7 Bible Online

EZRA 7 - Komrem bible

EZRA 7

¹Kum katamtak sōa, Artaxerxes in Persia reng achanglai, Ezra inti mi inkhat leika-om. Ama’n apusōn Thempu Kalen Aaron katlunga ankung thuhming ajongsōt, hinga kae: Ezra pa Seraiah, Seraiah pa Azariah, Azariah pa Hilkiah,

²Hilkiah pa Shallum, Shallum pa Zadok, Zadok pa Ahitub,

³Ahitub pa Amariah, Amariah pa Azariah, Azariah pa Meraioth,

⁴Meraioth pa Zerahiah, Zerahiah pa Uzzi, Uzzi pa Bukki,

⁵Bukki pa Abishua, Abishua pa Phinehas, Phinehas pa Eleazar, Eleazar pa Aaron, hiseng hi kae.

⁶Ezra kha Israel Pathen RŌNGPU’n Moses hnenga aleipek Dân ṭong kaṭha nenga inhret inkhat kae. Ajârchu Ezra’n RŌNGPU apathen vângpek aleichena ama tader rakip rengkalen khan aleipek a kae. Artaxerxes vairônna kum 7 tlukna, Ezra khan thempuhei, Levihei, bek-inn hlakasak hei, bek-inn kahrunghei khana ṭōn katlohei inveina Israel rup khat leh inṭhōia Babylona inphut Jerusalema heikasōk jo hei.

⁸Anmani’n Babylon kha thla hmakakeia kani hmakakei ning andahlona, Pathen inthōpui jâra Jerusalema thla 5 tlukna kani hmakakei ning jōng katlung hei.

¹⁰Israel mihei hneng dân leh chôndân rakip mantheina sik leh manjuina sik RŌNGPU dân kha inthem chûkna sik a Ezra’n ahringkhō apek sōt a kae.

¹¹Israelhei hnenga Pathen in aleipek ṭongpek leh dân rakip kaṭha nenga inhret jo lekha kathem leh thempu, Ezra hnenga Artaxerxes khan hiva lekha hi ahei pek:

¹²“Rengkalen Artaxerxes inphut Marvân Pathen Dân kathem, thempu Ezra hnenga.

¹³“Karam pumpuia aka-om Israel mihei, thempuhei, khana Levihei akase hnōm rakip Jerusalema nang leh inṭhōia setheina sik ṭong kamasō kae.

¹⁴Nahnenga manngan jo che kae, na-Pathen Dân kha heituk kaṭhatak a Jerusalem leh Judah shunga antajui mo tia ensuina sik a kei leh mansena ani kanei mi 7 in kantatir che kae.

¹⁵Jerusalema ka-om Israelhei Pathen hneng kei leh mansena ani kaneihei tapek hnōm sana leh dangka tōknahei kha nang in narôn sik hei kae.

¹⁶Babylon ramheia inphut nakhômsōt sana leh dangka khana Israel mihe’n khana anthempu he’n Jerusalema an-Pathen Bek-inna antatōk hei kha nang in nachoisa sik hei kae.

¹⁷“Hiva sêr hi kaṭhadek a natahmang sik kae khana sehrâtche, kemōngche, hmuchi leh juhei nantarachôk sik khana Jerusalema maichâm chunga nantatōk sik hei kae.

¹⁸A’nhlei sana dangkahei khachu na-Pathen lungdo dungjuia, nang leh nami he’n kaṭha sik tia nantamandon dungjuia, nahmang thei sik.

¹⁹Bek-inn hmangchâk sik a a’npek che be leh bûr rakip kha Jerusalema Pathen hneng natōksōt sik kae.

²⁰Bek-inna akahlut sik rakip nang in reng karōi bukna inphut nalothei sik.

²¹“Marvân Pathen thempu leh Dân kathem Ezra ngekna rakip kha anpekbâtna sik a tlaitlâk Euphrates ramkeia sêr leh sum katinta rakip hei hneng ke’n ṭong pekna kanei jo hei,

²²Dangka kilograme 3,400, gehu kilograme 10,000, ju litre 2,000, olive thai litre 2,000 katlunga khana chi chu arangei dungjuia pekna sik a kahri jo.

²³Marvân Pathen in a Bek-inn sik a amadu arangei kha pekna sik a a’nsingthei sik che kae, kei chunga achangmak leh kei kahnunga vai heikarôn sik hei chunga ahnuk anat makna sik a tlo roh.

²⁴Thempuhei, Levihei, hlakasak hei, kot kahngâk-hei, ṭōn katlohei, khana hiva bek-inna inṭangna kaneihei rakip a inphut chu ramsêrṭhei lothei mak tin che.

²⁵“Ezra, nang in na-Pathen tapek che singna kha hmang inna tlaitlâk Euphrates a na-Pathen Dân kajuihei vai karôn sik leh ṭong katan sik hei khan akadei sik hei kae. Khava Dân kha a’nhret mak hei hneng namanthei sik hei kae.

²⁶Tu achang innum na-Pathen dân leh rengram dân kajuimak kha karâkna pekbât sik kae: thina, hnongsōtna, akarōi chomsōtna, a-emak leh kurkhum a dana nei sik hei kae.”

²⁷Ezra’n ati, “Kanpu kanpahei Pathen, RŌNGPU kha choi ka-âna om rasoh! Ama’n rengkalen kha Jerusalema RŌNGPU Bek-inn kajana kha hing’hin amannei jo.

²⁸Pathen lungset a ke’n rengkalen leh ama mansena kaneihei khana ama ratha kaneia ṭōnkarôn rakip hei lum lona kha kachen jo; RŌNGPU ka-Pathen in hmesōna apek eng, khana ke’n Israel phungṭhen alu kachang hlamkakei katamtak hei kha kei leh inlesapna sik a kajôr manhnōm tor hei.”