Read Komrem EZRA 8 Bible Online

EZRA 8 - Komrem bible

EZRA 8

¹Rengkalen Artaxerxes vairônlai Babylona rehring sura inphut Ezra leh Jerusalema ajōng inle phungṭhen alu kachang hlamkakeihei man-gôrna kha hi kae:

²Phinehas phungṭhena Gershom, Ithamar phungṭhena Daniel David phungṭhena Shecaniah sapa Hattush, Parosh phungṭhena Zechariah, ama phungṭhena mihring 150 hei leh (Anpu anpa khang hrui lekha ka-om hei) Pahath Moab phungṭhena Zerahiah Sapa Eliehoenai, ami 200 hei leh Zattu phungṭhena Jahaziel sapa Shecaniah, ami 300 hei leh Adin phungṭhena Jonathan sapa Ebed, ami 50 hei leh Elam phungṭhena Athaliah sapa Jeshaiah, ami 70 hei leh Shephatiah phungṭhena Michael sapa Zebadiah, ami 80 hei leh Joab phungṭhena Jehiel sapa Obadiah, ami 218 hei leh Bani phungṭhena Joshiphiah sapa Shelomith, ami 160 hei leh Bebai phungṭhena Bebai sapa Zechariah, ami 28 hei leh Azgad phungṭhena Hakkatan sapa Johanan, ami 110 hei leh Adonikam phungṭhena Eliphelet, Jeuel khana Shemaiah, anmani mi 60 hei leh. (Anmani kha hnungdet a jōng inle hei) Bigvai phungṭhena Uthai leh Zaccur, anmi 70 hei leh.

¹⁵Ke’n anmani ankhenga Ahava khōpui langting akatlân tuidung panga kamantûp heia ni 3 khana khan ka-om ung. Ankâra thempu kahmu hei tâk Levi changmak hei.

¹⁶Ke’n hlamkakei 9 kalei tir hei: Eliezer, Ariel, Shemaiah, Elnathan, Jarib, Elnathan, Nathan, Zechariah, khana Meshullam, khana mi lekha inthei sik a 2, Joiarib leh Elnathan.

¹⁷Casiphia ram a jât hlamkakeipa Iddo hnenga, khana ama leh ama inthōpui hei, bek-inn ṭōn katlohei hnenga Bek-inna Pathen inzen sik a mi ahei tirna sik avakader sik a anmani kha kalei tir hei.

¹⁸Pathen maritna jâra anmani’n ṭōn tloje inhret pase inkhat, Mahli phungṭhena Levi mi Sherebiah intipa kha asapa 18 leh a-u anaihei leh kahongsap hei.

¹⁹Anmani’n Merari phungṭhena Hashabiah leh Jeshaiah khana an-u leh nai 20 anheitirsa hei.

²⁰Hiva chungchôna Reng David leh aṭōn karôn he’n Levihei inthōpui sik a antanganse hei mi 220 Bek-inna ṭōn katlo sik a ka-omsa hei. Anmani ankhenga anrahming anmazet heia kae.

²¹Ahava Tuidung hnenga kankhenga kan-Pathen ângshunga buhngōina sik, insinsakna sik khana kanhlam hrona anichingna sik, kansahei leh kankarōi rakip chunga anihrung pekna sik a derna sik a ṭong kamasō jo.

²²Rengkalen hnenga kanhlam hrona kankadōi heia inphut kankahrung sik ashakor remi der sik kha le’nzak eng, ajârchu ke’n ahnenga kaleihri pek khachu kan-Pathen in ama kataksen rakip chunga mahâmṭhat apek hei, khana ama inphut a’nhesōt hei chunga amalung tlaimak a karâkna apek hei kalei ti.

²³Khava jâra bu kanhngōia anihrungna sik ung derna kanleinei, khana kanderna animasôn pek ung.

²⁴Hlamkakei thempuhei kâra Sherebiah, Hashabiah khana alak mi 10 kalei kadei hei.

²⁵Khava sōa rengkalen leh ama mansena kaneihei khana aṭōn karônhei leh Israel mipui he’n Bek-inna hmangchâk sik a antapek sōt khava dangka, sana khana be leh bûr seng kha akahrik kate jo, khana thempuhei hneng kapek manhlut jo hei.

²⁶Ke’n kapek hei kha hihei hi kae: Dangka — ton 22, dangka be leh bûr 100 — kilograme 70 Sana — kilograme 3,400 Sana thlengkam 20 — kilograme 8.4 A’ntheng sum-êng thlengkam 2, sana thlengkam leh anman in-ang hei.

²⁸Ke’n anhnenga kaleihri, “Nanpu-nanpahei Pathen RŌNGPU sik a nangni hi a’ntheng chei kae, khana nanlungdo tak a nanta heitōk sana leh dangka be leh bûr hei hi’m a’ntheng hei kae.

²⁹Bek-inn nantlung mak hma seng kaṭha hrung hei ruh. Khava thempu dân shunga ankahrik tehei ruh khana thempu leh Levi hlamkakeihei khana Jerusalema ka-om Israel hlamkakeihei hnenga pek manhlut hei ruh.”

³⁰Khava jâra thempu leh Levi he’n sana, dangka khana be leh bûr hei kha Jerusalem Bek-inna heichoina sik a intluk jo hei.

³¹Khavakha Jerusalem sorna sik a Ahava Tuidung kantadahlon kha thla hmakakeia kani 12 tluk ninga kae. Kan-Pathen in kanhlam hrona athlop unga kan ka-en kadahei buhluna leh resōna inphut ahrung ung.

³²Jerusalem kantlung pha ni 3 châm inhnga ung.

³³Ni 4 tluk ning khan Bek-inna keini vakase ung, sana, dangka khana be leh bûr hei kha akahrik kante hei, khana Uriah sapa thempu Meremoth kut a kanpek sōt hei. Ama leh Phinehas sapa Eleazar khana Levi 2 hei, Jeshua sapa Jozabad leh Binnui sapa Noadiah leika-om sōm hei.

³⁴Neinâk rakip aja anteia akahrik ante hei, kha leh inṭhōia lekha shunga anmazetpet hei.

³⁵Rehringa sura ahei inle rakip hei khan Israel Pathen hnenga ro-inthoina tōkna anneia kae. Israel rakip sik a sehratche 12, kemōngche 96, kemōngte 77 antōk hei; khana set inthengna sik a ke 12 antōk. Hiva ranhring rakip hi RŌNGPU hnenga inthoina anro manvâm hei.

³⁶Rengkalen tahei pek hei lekha kha anloa tlaitlâk Euphrates a ram vaikarôn leh ṭōnkarônhei kut a anpek hei, khan chu anmani khan mipui leh Bek-inn kamukna anleibôm jo heia kae.