Read Komrem NEHEMIAH 1 Bible Online

NEHEMIAH 1 - Komrem bible

NEHEMIAH 1

¹Hivahi Hacaliah sapa Nehemiah in aleitlosōt chungchânga ṭong kae. Artaxerxes in Persia rengkalen achanglai kum 20 tlukna Karam thla a Nehemiah, kei, reng khōpui Susa a leika-om eng.

²Ka-u kanai hei kâra Hanani intipa hin mi ahlek leh Judah inphut heikatlung hei, khana Jerusalem chungchânga leh Babylon tinga sura aleika-om kan-Jehudi changpui hei chungchânga kaleider hei.

³Anmani’n antamanthei eng khachu khava akahringa aka-om hei khana an-inn ramting ahong inle hei kha khōdeng katheitak a ka-om hei, khana anhnenga aka-om ram hlop mihe’n anhnōise hei tia anleihri. Anmani’n anhrisa a, Jerusalem bang kha kakōia laka-om ṭhak khana akekot-hei kha anro mankâng ninga inphut lasyemsōt mak hei anti.

⁴Hiva rakip hi kathei phat a, kei in-ong enga kaṭap eng. Kani katamtak ṭajai kasuia, heite leisâk mak eng. Pathen hneng kaleider,

⁵“RŌNGPU, Marvân Pathen! Nang chu kalen che, nang kaṭit a keini kangir ung. Nang inlungset leh naṭongpek kajuihei chunga na’ntepna kha taksentak a natlosōt.

⁶RŌNGPU ahei-en roh, nasōk Israelhei sik a sûn leh jân kaderna hi athei pek roh. Israel mipui keini hi kaset jo ung tia kahrisōt kae. Kapu kapahei leh kei kaset jo ung.

⁷Nang kadōia ṭhatmak kantlo jo khana naṭongpek kha tlomak jo ung. Nasōkpa Moses a inphut napek ung dân kha keini’n juimak jo ung.

⁸Moses hnenga naleihri pek kha tûn mandonsōt roh: ‘Israel mipui nangni’n kahnenga taksenthei nanchangmak inchu ke’n nangni kha jât-hlop hei kâra kakathek sik chei kae.

⁹Tâk-kha nangni’n kahnenga nanhei inhea khana kaṭong pek chei kha nantlo’nchu, nangni raleichung inchaina katlunga nanlei inchek ṭhen jo’num kei kamukna sik a kakadeisōt hmun a khan kaheiṭhōi nôk sik chei.’

¹⁰“RŌNGPU, anmani hei hi nasōk leh nami khet hei kae. Naratha neina leh nahratna vânga nalei huksōt jo hei kha kae.

¹¹Tûnchu nang kajana akanei hnōm kei derna leh nasōk ralak-hei derna rangei roh. Tuning hin hmesōna apek roh, khana rengkalen kha kei chunga lungset kathem manchang roh.” Khava lai khan kei hi rengkalen ju katinta leikachang enga kae.