Read Komrem NEHEMIAH 2 Bible Online

NEHEMIAH 2 - Komrem bible

NEHEMIAH 2

¹Thla 4 kahnunga ni khat hin Rengkalen Artaxerxes in bu aleisâk. Ke’n ahnenga ju kaleipek. Hma khan chu kei hmaisō hi kachâma aleihmu phung hêrmak,

²khava jâra ader eng, “Heisik a mo nahmaisō akachâm hêr che? Nang akanachu changmak che, khan chu namalung akahōi mak kachang nger sik jo,” ati. Kei inpirbop enga

³kalei masôn, “Reng Kalûr ahei tik a hringṭhak roh! Heikhonga mo kanpu kanpahei leivûmna khōpui inhmang leh akekot hmei takângsō jo kha malung kachâmtak a ka-ena aka-om tor sik eng?”

⁴Rengkalen khan ader eng, “Nang in namadu kha heimo?” ati. Ke’n Marvân Pathen hneng kader,

⁵khana khava sōa rengpa hneng kahri, “Reng Kalûr, nang in nahnōm inchu, khana kaderna che hi napek hnōm eng inchu, kapa-kapuhei anleivûmna khōpui kha athera kasak torna sik a Judah ram a vase hi rong.”

⁶Rengkalen kha asira rengnu kha in-onga, kangekna kha ahnōm pek jo eng. Heituk kasôt akase sik eng, khana heitik leh ahe’nle sik eng tia ama’n aleider eng, khana ke’n kamasôn.

⁷Khava sōa tlaitlâk Euphrates Ramṭhen a ram vaikarônhei hnenga, kei hi Judah ram a kavase theina sik a chithi asun pekna sik eng ke’n kaleider.

⁸Reng ratu kahrungpa Asaph hnenga Bek-inn hrungna kekot sik leh khōpui bang sik a khana kei omna inn sakna sik a thingtlōnhei apekna sik eng, chithi inkhat kadersa a kae. Ke’n kader rakip hei kha rengkalen khan aleipek eng, ajârchu Pathen in kei ale’nthōpui enga kae.

⁹Rengkalen khan rehlam kakei ṭhahrep leh shakor kachōng rup-hei kei inṭhōipui sik a ahei tir hei, khana tlaitlâk Euphrates ting kase jo eng. Khana khan rengkalen chithihei kha ram vaikarônhei hneng kapek jo hei.

¹⁰Tâk-kha Beth Horon khōpuia Sanballat, leh Ammon ramṭhen a Tobiah ṭōnkarônhei hin, Israel mihei ṭhatchômna sik a ṭōn katlo sik tu mo inkhat kava jo ti hi antheia kahōi leisak hêrmak jo hei.

¹¹Jerusalemting khang’khan leikase eng, ni 3 shunga khan

¹²Jerusalem sik a Pathen in amantlo hnōm eng kha tûte hneng manthei mak hei eng. Khava sōa jânṭima kathōi enga kasōksōt eng, kei inthōpui ṭhahrep leh leikase ung. Keini’n kanta leiṭhōi ran inkhat rōk khachu shakōrtung kalei chōng kha kae.

¹³Tlaitlâk tinga Phaicham Kekot a inphut khōpui kha kadahlon pha khō la’nthim ṭhak a kae khana thlâng ting kase unga Rihren Tuiripût kanpetana Akachok Kekot ting kase ung. Khanga kanselai, khōpui bang kakōi leh hmei in aleikâng jo kekot kha ka-en lele heia kae.

¹⁴Khava sōa khōpui nisō sak intongtinga Tuiripût Kekot leh Rengpa Tuikhur ting kase eng. Ke’n kalei chōng shakōrtung khan neinâk kabōk hei kâra sena sik hlam leihmu tor mak a kae,

¹⁵khava jâra ke’n Kidron phaichama kaṭumsuk enga shakōrtung khanga kachōnga banga khan kalei-en. Khava sōa ke’n kahei juina hlam mama a khan inle enga Phaicham Kekot kahlut enga khōpui shunga kase eng.

¹⁶Khava hmun a ṭōnkarôn he’n kei hi khon mo akase eng khana heimo katlo ti hi tûte’n manhret mak hei. Ka-Jehudi changpui hei — thempuhei, hlamkakeihei, ṭōnkarônhei khana ṭōn tlona a’nvei sik hei hnenga leihri mak eng.

¹⁷Tâk-kha tûnchu ke’n anhnenga kahri, “Enruh eini hi heituk a khōdeng theina aka-om jo me mo, ajârchu Jerusalem hi inhmanga ka-om jo, khana akekot-hei hi’m ansuksetsō jo hei! Khōpui banghei hi sakmanther jo hei rih, khana ni-inzakna hi manbâng jo rih.”

¹⁸Pathen in heikhong mo aleiompui eng, aleibôm eng, khana rengkalen in kahnenga heimo aleihri kha ke’n anhnenga kalei hrisōt jo. Anmani’n anleimasôn eng, “Sak mantherna kha phut jo rih!” Khana anmani kha ṭōn phutna sik a inrin jo hei.

¹⁹Sanballat, Tobiah leh Arab mi arahming Geshum intipa hin keini’n tlo sik a kantamantluk kha anthei phat a, anleimanuisō unga anhri, “Nangni’n heimo kantatlo nantati? Rengkalen kha inrepui sik mo nantati?”

²⁰Ke’n kalei masôn hei, “Marvân Pathen in hmesōna apek sik ung. Keini hi ama sōk ung kae, khana inn hi kantasak manphut sik kae. Tâk-kha Jerusalema ka-om karōi chunga nangni chu ratha neimak chei, khana hiva chôndân chunga chen neimak chei.”