Read Komrem NEHEMIAH 3 Bible Online

NEHEMIAH 3 - Komrem bible

NEHEMIAH 3

¹Khōpui bang antasak kha hing’hin kae. Thempu Kalen Eliashib leh athempu changpui hei khan Kemōng Kekot kha ansak, antōksōt khana kekot-hei kha ahmun et a anmatung hei: Anmani’n, bang kha tōksōtna annei, Reikhat Ber leh Hananel Ber katlunga anleitōksōt jo.

²Jericho mihe’n abân kha anleisak. Imri sapa Zaccur in abân kha aleisak.

³Hassenaah phungṭhen he’n Nga Kekot kha anleisak. Anmani’n thingtlōnhei leh kekot-hei kha ahmun et a anmatung hei, khana kekot kirna thirbong leh akhârna thirtlōn anmando hei.

⁴Uriah sapa khana Hakkoz tupa Meremoth in abân kha aleisak. Berechiah sapa khana Meshezabel tupa Meshullam in abân kha aleisak. Baana sapa Zadok in abân kha aleisak.

⁵Tekoa mihe’n abân kha anleisak, tâk anchunga anka-ensui he’n anhnenga antanganse ṭōn tlo sik kha khōpui shunga hlamkakei he’n leihnōm mak hei.

⁶Paseah sapa Joiada leh Besodeiah sapa Meshullam in Jeshana Kekot kha ansak manther. Anmani’n thingtlōn leh kekot-hei kha ahmun et a amatung hei, khana akirna thirbong leh akhârna thirtlōn amando hei.

⁷Gibeona Melatiah, Meronoth a Jadon, khana Gibeon leh Mizpah mihe’n abân kha anleisak, tlaitlâk Euphrates ram vaikarônpa omna katlunga.

⁸Sana kakhengpa Harhaiah sapa Uzziel in abân kha aleisak. Thai marim katui kasyempa Hananiah in abân kha Bang Kalen katlunga aleisak.

⁹Jerusalem ramṭim inkhat a vaikarônpa Hur sapa Rephaiah in abân kha aleisak.

¹⁰Harumaph sapa Jedaiah in a-inn hnenga abân kha aleisak. Hashabneia sapa Hattush in abân kha aleisak.

¹¹Harim sapa Malchijah leh Pahath Moab sapa Hashub in abân kha leh Ratap Berhei kha anleisak.

¹²Jerusalem ramṭima vaikarônpa, Hallohesh sapa Shallum in abân kha aleisak. (Asanu he’n khava ṭōn kha anleibôm.)

¹³Hanun leh Zanoah khōpuia aka-om he’n Phaicham kekot kha ansak manther. Anmani’n kekot-hei kha ahmun a anmatung hei, akirna thirbong leh akhârna thirtlōn anmando hei, khana Akachok Kekot katlunga bang kha metre 440 anleisyem manther a kae.

¹⁴Beth Haccherem ramṭhen a vaikarônpa Rachab sapa Malchijah in Akachok Kekot kha aleisak manther. Ama’n kekot-hei kha ahmun a amatung hei, khana kot kirna thirbong leh akhârna thirtlōn amando hei.

¹⁵Mizpah ramṭhen a vaikarônpa Colhozeh sapa Shallum in Tuiripût Kekot kha asak manther. Ama’n kekot hlam kha asyemsa, kekot-hei kha ahmun et a amatung hei khana akirna thirbong leh akhârna thirtlōn amando hei. Shelah Tuikhura renghei rahōn hnenga bang kha David Khōpuia inphut heiṭumsukna katlunga aleisyem.

¹⁶Bethzur ramṭhen vaikarônpa Azbuk sapa Nehemiah in abân kha David thlân, tuikhur, khana rekurhei katlunga aleisak.

¹⁷Athōia Levihei hin, bang abân ṭhen katamtak hei kha anleisak: Bani sapa Rehum in abân kha aleisak; Keilah ramṭim khat vaikarônpa Hashabiah in ama ramṭhen kahlânga abân kha aleisak.

¹⁸Keilah ramṭim hlop vaikarônpa Henadad sapa Bavvai in abân kha aleisak.

¹⁹Mizpah a vaikarônpa Jeshua sapa Ezer in re hmangchâk dana hma a inphut bang arakir katlunga aleisak.

²⁰Zabbai sapa Baruch in abân kha Thempu Kalen Eliashib inn hlutna katlunga anleisak.

²¹Hakkoz tupa khana Uriah sapa Meremoth in abân kha, Eliashib inn hmor katlunga aleisak.

²²Athōia thempuhei hin abân bang ṭhen ralak-hei kha anleisak ther hei: Jerusalem kimve rajeia thempu he’n abân kha anleisak;

²³Benjamin leh Hasshub in an-inn hma heia abân kha anleisak; Ananias tupa, Maaseiah sapa Azariah in a-inn hma bât a abân kha aleisak;

²⁴Henadad sapa Binnui in Azariah inna inphut bang rakir katlung abân kha aleisak.

²⁵Uzai sapa Palal in abânna, bang rakira inphut re kahngâk-hei omna hnenga reng-innpui chunga ber katlunga aleisak; Parosh sapa Pedaiah in abâna, nisōtinga Tui Kekot hnenga leh Bek-inn hrungna ber katlung asak. (Hivahi Bek-inn ṭōn katlohei omna, Ophel inti khōpui hnenga ṭhen kha kae.)

²⁷Tekoa mihe’n anmani sik a 2 tlukna abân kha, Bek-inn hngâkna ber inshâng kahnget khana inphut Ophel hnenga bang katlung anleisak.

²⁸Thempu rup khat in abân kha anleisak, Shakor Kekot a inphut sak ting, an-inn et hma heia.

²⁹Immer sapa Zadok in a-inn hma abân kha aleisak. Nisō kekot kahngâkpa Shecaniah sapa Shemaiah in abân kha aleisak.

³⁰Shelemiah sapa Hananiah leh Zalaph sapa karuk tlukna Hanun in anmani sik 2 tlukna, abân kha anleisak. Berechiah sapa Meshullam in a-inn hma a abân kha aleisak.

³¹Sana kakhengpa Malchijah in abân kha aleisak, bek-inn kasak hei leh Miphkad Kekot hnenga aka-om invei katlohei taleihmang inn, sak-nisō intonga bang rakir chunga aka-om innden hneng katlunga.

³²Sana kakheng hei leh invei katlohei khan abân ṭhen kha anleisak, arakira inden a inphut Kemōng Kekot katlunga.