Read Komrem NEHEMIAH 6 Bible Online

NEHEMIAH 6 - Komrem bible

NEHEMIAH 6

¹Hlutna hlam a kekot-hei kha kanla manngir mak ravânga, bang syemsōna leh khana akave heite om mak jo ti ṭong hi Sanballat, Tobiah, Geshem khana kan-inrepuihei khan anleithei jo.

²Khava jâra Sanballat leh Geshem in ṭong anhei manrôn eng, khōhei kâra Ono Phaichama anmani inhmupuina sik anhei manṭhat a kae. Hivahi kei manhmangna sik a antatlo lungthim inkhat kae.

³Anhnenga hinga akahri sik a ṭongkarôn kalei tir hei, “Kei ṭōn kakhôk a kalatlo khana khan kei jōng tor mak ning. Nangni inhmupuina hongna sik a kanṭōntlo hi haimak ning.”

⁴Anmani’n in-angtlinga ṭong kha vōi 4 anhei manrôn eng, khana aphat rakip a ke’num in-angtlinga kalei masôn hei.

⁵Khava sōa Sanballat in asōk inkhat ahei tira vōiranga tlukna ṭong ahei manrôn eng, hiva hichu a’nhlâng pet chithi inkhat kae.

⁶Hinga ati: “Nang leh Jehudi mihe’n re tlo sik nanmandon jâra bang kha nanta sakther kae tia sak leh thlanga mipuihei hneng ṭong inthang jo tia Geshem in kahnenga amanthei jo eng. Ama’n ahrisa khachu nang reng changna sik a intluk che

⁷khana nang Judah reng nachangna kha Jerusalema akaphôngsōt sik a thempu ahlek namantluk jo hei ati. Reng Kalûr in hivahi athei nger sik jo kae, khava jâra nang leh kei hiva chungchânga inbek me sona chai jo rih.”

⁸Ke’n masônna ṭong kalei tir: “Nang in nahri hi inkhatbek dikmak. Nabinga nasyemsōt kae.”

⁹Ṭōn manbângna sik a anmani’n maṭhitna anleinei eng. Ke’n kader, “Tâk-kha tûnchu, Pathen, amanhrat jo roh.”

¹⁰Khava pha khan, a-inn kadahlon tor mak Mehetabel tupa, Delaiah sapa Shemaiah kaphâk sik a kei leikase eng. Ama’n kahnenga ahri, “Nang leh kei akase mea Bek-inna A’ntheng Hmun a khan a’nthup mea kot nikake sik kae, ajârchu nang thatna sik a anmani kahong jo hei. Tûnchu jân inkhat a nang kathat sik a kahong sik jo hei.”

¹¹Ke’n kalei masôn, “Kei chu akatlân leh a’nthup sik mi kha changmak eng. Kahringkhō hukna sik a Bek-inna a’nthup sik a namandon eng mo? Tlomak ning.”

¹²Hivahi ke’n kamandon phat a Shemaiah hneng Pathen in ṭong leihri mak ti hi ke’n kamanhret jo, tâk hiva maṭhitna ṭong hi kahnenga hrina sik a Tobiah leh Sanballat in ahnenga marûk sêr antapek leikae jo.

¹³Kei rahming mansetna sik leh inzak pekna sik khana kei maṭhitna pek a setna mathlâkna sik a ama hi antanêk leikae.

¹⁴Ke’n kader, “Pathen, Tobiah leh Sanballat tatlo kha mandon roh khana karâkna pek hei roh. Kei maṭhitna sik anikarei nuhmei Nodiah leh thempu alak-hei kha mandonsōt hei roh.”

¹⁵Ṭōn tlona kani 52 sōa Dôipa thla ni 25 tluk ning khan bang kha inchai jo.

¹⁶Keini kimvea inrepuihei khan hivahi anthei phat a, hmai neimak jo ung tia inhret jo hei, ajârchu ṭōn kha Pathen inthōpuina vânga ale’ntlo kae ti hi mi rakip in anmanhret joa kae.

¹⁷Hiva phat shunga hin Jehudi hlamkakeihei leh Tobiah kha ṭong le’ntheitō hei.

¹⁸Aterpu Ara sapa Shecaniah jâra Judah ram a mi katamtak in Tobiah langting leikangir hei. Khava chung nôk a, asapa Jehohanan khan Berechiah sapa Meshullam sanu kha aleiompui.

¹⁹Tobiah in ṭōn kaṭha aleitlo rakip kha mihe’n kahmai kunga anleihri, khana ke’n kahri rakip kha’m ahnenga anleihri pek. Khana kei maṭhitna sik a chithi ahei tir heia kae.