Read Komrem ESTHER 1 Bible Online

ESTHER 1 - Komrem bible

ESTHER 1

¹Persia reng khōpui Susa a areng in-ongna inphut Reng Xerxes in India ram a inphut Ethiopia ram katlunga aka-om rengram 127 chunga vai aleirôn.

³Avai rônna kum 3 ajōng tluk pha aṭōn katlohei leh avaikarônhei seng sâklôm inkhat aleitlopui hei. Persia leh Media remihei khana ramṭhen vaikarônhei leh akalen akahrâng he’m le’nveisa hei.

⁴Reng-innpuia nei leh hao khana alûrna leh aṭhatna hei kha ama’n thla 6 pui katluk a malârna aleinei.

⁵Khava sōa Susa khōpuia aka-om misara leh akahao rakip sik a Kani vekhat rengpa’n sâklôm kalentak aleitlo. Khavakha Kani vekhat anleihmang khana reng-innpui rahōna anleitlo.

⁶Khava lâmte kha pōn bang leh pōndum pinden kha, dangka kutkhi heia pōn hrui innem akasen vânga ankhit a hlung kachoa anmakheia kae. Sana leh dangka vânga ansyem rakhum hei kha lâmtea khan anda hei, khava chunga simvâr kabang, simvâr kasen, hlung mankatam akadi rik-rak, vapuirei hlung turquoise hei vânga anmakhua kae.

⁷Sana kōklei, inkhatbek in-angtet lo hei vânga ju anleisem khana rengpa khan malung kalentak a renghei chen ju kha aleitōksōt a kae.

⁸Ju kha hiseng in sik tia adân leiom mak; mi rakip in a-intor chenna a-inthei sik tia rengpa khan reng-innpuia asōk-hei hneng ṭong apek hei.

⁹Hiva laitak hin, rengnu Vashti’num reng-innpuia nuhmeihei sik a sâklôm inkhat aleitloa kae.

¹⁰An sâklôm tlona ni 7 tluk ning rengpa kha ju a-ina inpâkna aneia kae, khava jâra taksa insyem asōk pase 7, Mehuman, Biztha, Harbona, Bigtha, Abagtha, Zethar, khana Carkas hei aleibek hei.

¹¹Rengnu kha rengnu lukhu a’nkhuna sik khana revei shunga anheiṭhōina sik anhnenga ṭong apek hei. Rengnu kha hme kaṭhatak nuhmei inkhat kae, rengpa khan akhōhme lâk hei leh avaikarônhei hneng amanu hmeṭhat kha aleimalâr hnōma kae.

¹²Tâk-kha asōk-hei khan Rengnu Vashti hnenga rengpa ṭongpek kha anhri pek pha heisōk hnōm mak jo. Khava jâra rengpa kha ahnuk kana hêr jo.

¹³Tûnchu dân chungchânga a’nhret hei hnenga der sik hi rengpa tlongai leikachang, khava jâra heimo tlo sik tia a’nhret mansena kaneihei kha ama’n aleibek hei.

¹⁴Ama’n mansena sik a akahong ṭhak hei kha Karshena, Shethar, Admatha, Tarshish, Meres, Marsena, khana Memukan — Persia leh Media ṭōnpui karôn 7 hei, rengram shunga ṭōn kalenpen intu hei kha kae.

¹⁵Hiva mihei hneng ama’n ahri, “Reng Xerxes ke’n ṭongpek inkhat leh inṭhōia Rengnu Vashti hneng kasōk-hei kalei tir hei, tâk-kha khavakha leijui hnōm mak! Ama chunga heimo tlo sik tia dân in ahri?”

¹⁶Khava sōa Memukan in rengpa ṭōnkarônhei hneng aleiphôngsōt khachu rengnu Vashti’n rengpa rōk changloa ama vaikarônhei leh arengram shunga mi rakip inzak apek kae!

¹⁷Rengnu’n atlo hi anthei bât leh rengram shunga aka-om nuhmei rakip in anpuisehei hnōisena anphut sik jo. Anmani’n anti sik, ‘Reng Xerxes in Rengnu Vashti kha ahnenga ahongna sik ṭong aleipek, tâk leihnōm pek mak.’

¹⁸Persia leh Media shunga reng inna vaikarôn nuhmei he’n rengnu omchen hi anthei pha kani atlâkmak lai anpuisehei hneng anhri sik jo. Hmun rakip a nuhmei he’n anpuise kajamak jo hei ning, khana anpuisehei kha’n annuhmeihei chunga anhnuk kana sik jo.

¹⁹Reng Kalûr in nahnōm inchu, Vashti’n reng hmaikunga avea a’nlâr nôk makna sik a ṭong phôngsōtna inkhat nei roh. Khavakha a’nthleng torhêr makna sik a Persia leh Media dân shunga mazetna sik a ṭongpek-hei roh. Khava sōa rengnu hmun kha nuhmei akaṭhadet inkhat hneng pek jo roh.

²⁰Naṭong phôngsōtna kha narengram kalentak shunga mi rakip in anthei pha, nuhmei rakip in anpuisehei kha, sara achanga akanei achang inum kajana anpek sik jo hei.”

²¹Rengpa leh avaikarônhei khan hiva ṭong hi anmadu jo, khana Memukan mansena kha rengpa khan aleitlo jo.

²²Rn ramṭhen rakip a aram et ṭonga leh anlekha mazetna ngai dungjuia ṭong aleimanrôn hei, puise rakip in a-innshung kapu leh ratha kaneitak a achaina ṭongkahri kha akachang sik kae anti jo.